பாபிலோன்

பாபிலோன் ஐப்பிராத்து நதிக்கரையில் அமைந்திருந்த ஒரு பண்டைய நகரம் ஆகும். இது அதிகாரத்திற்கும் கலாச்சார செல்வாக்கிற்கும் பெயர் பெற்றது. "பாபிலோன்” என்ற பெயர் ஆதியாகமம் 11 இல் காணப்படும் “பாபேல்” என்னும் நகரத்துடன் தொடர்புடையதாகும், அங்கு மனிதகுலம் பரலோகத்தை எட்ட ஒரு கோபுரத்தைக் கட்ட முயன்றது. பதிலுக்கு, தேவன் அவர்களின் பாஷையைக் குழப்பி அவர்களை பூமியெங்கும் சிதறடித்தார். வேதம் முழுவதிலும், பாபிலோன் தேவனுக்கு எதிரான மனித கிளர்ச்சியின் சக்திவாய்ந்த அடையாளமாக பரிணமிக்கிறது.

பழைய ஏற்பாட்டில், ஏசாயா, எரேமியா, தானியேல் போன்ற தீர்க்கதரிசிகள் பாபிலோனின் ஆணவத்தையும் துன்மார்க்கத்தையும் கடுமையாக கண்டித்தனர், மேலும் அதன் இறுதி அழிவையும் முன்னறிவித்தனர். புதிய ஏற்பாட்டில், வெளிப்படுத்தின விசேஷம் புத்தகம் யோவானுக்கு தரப்பட்ட ஒரு விரிவான தரிசனத்தை வழங்குகிறது; இது இறுதியில் பாபிலோனின் மீது தேவனின் நியாயத்தீர்ப்பு எவ்வாறு வரும் என்பதை வெளிப்படுத்துகிறது.

வேதத்தில் பாபிலோன் என்றால் என்ன?

விபசாரரே, விபசாரிகளே, உலக சிநேகம் தேவனுக்கு விரோதமான பகையென்று அறியீர்களா? ஆகையால் உலகத்துக்குச் சிநேகிதனாயிருக்க விரும்புகிறவன் தேவனுக்குப் பகைஞனாகிறான். யாக்கோபு 4:4

பாபிலோனின் ஆவி என்பது ஆவிக்குரிய விசுவாசமின்மை அல்லது ஆவிக்குரிய வேசித்தனத்தைக் குறிக்கிறது.

திருமணம் நிச்சயிக்கப்பட்ட ஒரு பெண் வேறொரு ஆணைப் பின்தொடர்வது போல் கற்பனை செய்து பாருங்கள் - அதுவே பாபிலோன் பிரதிநிதித்துவப்படுத்தும் விஷயம். நாம் கிறிஸ்தவர்களாக / கிறிஸ்துவில் விசுவாசிகளாக மாறும்போது, ​​நாம் சபையின் ஒரு பகுதியாக இருக்கிறோம், இது இயேசுவுடன் நிச்சயிக்கப்பட்டதைப் போன்றது. ஆனால் சபையில் இருக்கும்போதே, நாம்  இயேசுவுக்கு உண்மையுள்ளவர்களாக இருப்பதற்குப் பதிலாக உலகையும் அதன் இன்பங்களையும் நாடத் தொடங்குகிறோம். அதுதான் பாபிலோன் - தேவனை விட்டு விலகி, உலகத்தை தொடர்வதைப் பிரதிபலிக்கிறது. மனம் உலகத்தை நோக்குகிறது, ஆனால் சரீரம் சபையில் இருக்கிறது.

பாபிலோனின் ஆவி குறிப்பாக விசுவாசிகளுக்கே பொருந்தும், அவிசுவாசிகளுக்கு அல்ல. இது ஒரு ஏமாற்றுகிற மனப்பான்மையாகும், அங்கு ஒருவர் கிறிஸ்துவை பின்பற்றுகிறேன் என்று கூறினாலும், அவரின் இருதயம் உலகத்திற்கும் அதன் இன்பங்களுக்கும் ஈர்க்கப்படுகிறது. வெளிப்பார்வைக்கு, தாங்கள் இயேசுவுக்காக வாழ்கிறோம் என்று கூறலாம், ஆனால் உள்ளுக்குள் அவர்களுடைய விசுவாசம் பிளவுபட்டிருக்கிறது.

• பாபிலோனின் ஆவி கிறிஸ்துவின் நாமத்தை தனிப்பட்ட லாபத்துக்காகப் பயன்படுத்துகிறது.

• கிறிஸ்துவின் நாமத்தை தனது நோக்கங்களுடன் இணைத்து அரசியல் ரீதியாகவோ அல்லது அதிகார ரீதியாகவோ செல்வாக்கைப் பெற முயற்சிக்கிறது.

• இது விசுவாசத்தையும் கிறிஸ்தவ அடையாளத்தையும் வியாபாரம் அல்லது பொருளாதார லாபம் பெறும் கருவியாக பயன்படுத்துகிறது.

• இந்த ஆவி பக்தியைப் போன்று நடிக்கிறது. அது, தேவனுக்கான  உண்மையான அன்புக்குப் பதிலாக சுயநல நோக்கங்களால் இயக்கப்படுகிறது.

பாபிலோனின் ஆவி நம்முடைய உள்ளத்தில் செயல்படும் போது :

• நாம் சுய ஏமாற்றத்தில் வாழ்கிறோம், நம்முடைய உள்ளத்தில் நாம்  பரிசுத்தமென்று எண்ணினாலும், தேவனுடைய கண்களில் நாம் பரிசுத்தமானவர்களல்ல.

• நாம் மாய்மாலக்காரர்களாகி, கிறிஸ்துவைப் பின்பற்றுவதாகக் கூறிக்கொண்டு, உலகத்தின் வழிகளின்படி வாழ்கிறோம். நமக்கு இரண்டு பக்கங்கள் உள்ளன, உலகத்திற்கு ஒன்று நம் அகத்திற்கு ஒன்று.

• நாம் கிறிஸ்துவின் சரீரத்தில் இருக்கலாம் – சபை மற்றும் கிறிஸ்தவ நிகழ்வுகளில் கலந்துகொள்ளலாம். ஆனால் நம் இருதயங்கள் இன்னும் உலகத்தால் இழுக்கப்படுகின்றன. 

• பாபிலோன் தீமையைப் பரப்புவதால் "வேசிகளின் தாய்" என்று அழைக்கப்படுகிறது, இந்த ஆவியால் ஈர்க்கப்பட்ட ஒருவர் தான் வழிதவறிச் செல்வது மட்டுமல்லாமல், சபையிலுள்ள மற்றவர்களையும் வழிதவறச் செய்கிறார்.

பாபிலோனின் ஆவியை தேவன் ஏன் வெறுக்கிறார்?

• இயேசு சிலுவையில் அறையப்படுவதற்குச் சற்று முன்பு பணம் மாற்றுபவர்களை ஆலயத்திலிருந்து விரட்டினார் (மத்தேயு 21:12-13) - இது தமது சபையின் தூய்மையை அவர் எவ்வளவு ஆழமாக மதிக்கிறார் என்பதற்கான தெளிவான அறிகுறியாகும்.

• தம் பிள்ளைகள் தம்முடைய குணாதிசயத்தை பிரதிபலிக்க வேண்டும் என்று தேவன் விரும்புகிறார். நாம் உலகத்திற்குத் திரும்பி அதன் வழிகளைக் கைக்கொள்ளும்போது, அவர் வாசம் செய்யும் அவருடைய சபையாகிய சரீரத்திற்குள் சீர்கேட்டைக் கொண்டுவருகிறோம்.

• இந்த வகையான அசுத்தம் தேவனை கோபப்படுத்துகிறது, ஏனென்றால் பரிசுத்தமில்லாத எதுவும் அவருடைய நீதியான நியாயத்தீர்ப்பைத் தூண்டுகிறது.

• திருச்சபை கிறிஸ்துவின் சரீரம், அவருடைய மணவாட்டி, அது தீட்டுப்படும்போது, தேவன் பொறாமையோடும், பரிசுத்த கோபத்தோடும் பதிலளிக்கிறார்.

• நாம் அனுதினமும் கிறிஸ்துவில் வளர அழைக்கப்பட்டுள்ளோம், வெறுமனே இரட்சிக்கப்படுவதற்கு மட்டுமல்ல, ஒவ்வொரு நாளும் அவரைப் போல ஆக, பரிசுத்தத்தை அதிகமாக விரும்பி பின்பற்ற வேண்டும்.

பாபிலோன் என்றால் உலகத்தை முழுவதுமாக நிராகரித்து தோல்வியுற்றவர்களைப் போல வாழ வேண்டும் என்று அர்த்தமா? இல்லவே இல்லை. உலகத்திலிருந்து நமக்கு சில விஷயங்கள் தேவை. ஆனால், அவை தேவன் அவசியமாகக் கருதுவதாக மட்டுமே இருக்க வேண்டும், நாம் தனிப்பட்ட முறையில் விரும்புவதோ பின்தொடர்வதோ அல்ல. செல்வம், இன்பம், அதிகாரம், அந்தஸ்து எதுவாக இருந்தாலும், தேவையானதை விட அதிகமாக நாம் தேடும் போது, அந்த அதிகப்படியானவை நமது கிறிஸ்தவ வாழ்க்கையில் பாபிலோனின் ஒரு வடிவமாக மாறுகிறது.

இந்த பாபிலோனின் ஆவியை நாம் எவ்வாறு பெறுகிறோம்?

1 யோவான் 2:16 இல் எழுதப்பட்டுள்ளது போல, பாபிலோனின் ஆவி சாத்தானிடமிருந்து வருகிறது, அதைக் கடத்த அவன் மூன்று முக்கிய விஷயங்களைப் பயன்படுத்துகிறான்.

ஏனெனில், மாம்சத்தின் இச்சையும், கண்களின் இச்சையும், ஜீவனத்தின் பெருமையுமாகிய உலகத்திலுள்ளவைகளெல்லாம் பிதாவினாலுண்டானவைகளல்ல, அவைகள் உலகத்தினாலுண்டானவைகள். 1 யோவான் 2:16

சாத்தான் நமக்கு மூன்று காரியங்களைக் கொடுக்கிறான் 

1. மாம்சத்தின் இச்சை - இது உலக இன்பங்களை நாடும் நம்முடைய ஆசையைக் குறிக்கிறது. உதாரணமாக, நாம் உலகியலான பாப் பாடல்கள் /சினிமா பாடல்களைக் கேட்கும்போது அல்லது நம்மை மகிழ்விக்கும் காரியங்களைக்  காணும்போது அந்த உலகியலான ஆவியை தேவாலயத்திற்குள் கொண்டு வரச் செய்வதற்காக சாத்தான் முயற்சி செய்கிறான். இது கிறிஸ்தவப் பாடல்களையும் அது போன்று மாற்றி, உலகியலான இசையைப் போல ஆக்க முயற்சிக்கிறது. அப்பொழுது நம் உள்ளம் உண்மையான ஆராதனையிலிருந்து விலகி இசையில் கவனம் செலுத்தத் தொடங்குகிறது. ஆதாம் ஏவாளின் காலத்திலிருந்தே, சாத்தான் நம்முடைய பலவீனங்களைப் பயன்படுத்தி இந்த ஆசைகளைத் தூண்டி வருகிறான்.

2. கண்களின் இச்சை - உலகமும் அதன் இன்பங்களும் மிகவும் அழகானவை; கண்கள் தான் உடலைக் கெடுக்கும் முதன்மையான வழியாக இருக்கின்றன. உதாரணமாக, ஒருவரின் தோற்றத்தை ஆசையுடன் நோக்குவது மனதில் விருப்பத்தை உருவாக்கி, பின்னர் பேராசைக்கு வழிவகுக்கிறது. அதே போன்று, உணவைக் கண்டவுடன், பெருந்தீனியின் ஆவியைத் தூண்டுவதன் மூலம், அப்போது பசிக்காத போதிலும், அதனை விரும்பி உண்ணும் ஆசை எழுகிறது. சாத்தான் வெளியிலிருந்து அழகாக தோன்றுவதைப் பயன்படுத்தி நம்மை உள்ளிருந்து சேதப்படுத்துகிறான்.

3. ஜீவனத்தின் பெருமை - ஆசீர்வாதங்கள் வரும்போது, பெருமை உள்ளே நுழைகிறது. எல்லா நன்மையும் தேவனுடைய கிருபையினால் உண்டானவை என்பதை மறந்து, பெருமை பேசத் தொடங்குகிறோம். நாம் என்னவாக இருக்கிறோமோ அது அவருடைய கிரியைகளே. பெருமை எப்போதும் சாத்தானிடமிருந்து வருகிறது, ஏனெனில் அது அவனுடைய குணமாகும். நாம் பெருமை அடைந்தவுடன், அவன் தேவனுடைய பிரதான தூதர் நிலையிலிருந்து விழுந்ததுபோல நாமும் அவருடைய கிருபையிலிருந்து விழுந்துவிடுவோம் என்பதை அவன் அறிவான். அவருடைய தயவிலிருந்து நம்மை வீழ்ச்சியடையச் செய்வதற்கும் அவன் அதே தந்திரத்தைப் பயன்படுத்துகிறான். அந்தப்படி, இளைஞரே, மூப்பருக்குக் கீழ்ப்படியுங்கள். நீங்களெல்லாரும் ஒருவருக்கொருவர் கீழ்ப்படிந்து, மனத்தாழ்மையை அணிந்துகொள்ளுங்கள்; பெருமையுள்ளவர்களுக்கு தேவன் எதிர்த்து நிற்கிறார், தாழ்மையுள்ளவர்களுக்கோ கிருபை அளிக்கிறார். 1 பேதுரு 5:5 

இந்த பாபிலோனின் ஆவியை நமக்கு பரப்ப சாத்தான் பின்வரும் தந்திரமான கருவிகளைப் பயன்படுத்துகிறான்

• வஞ்சகம் - அவன் ஆதாம் / ஏவாளுடன் செய்ததைப் போல, தனது பொய்களை நம்புமாறு மக்களை ஏமாற்றுகிறான் - தேவனாகிய கர்த்தர் உண்டாக்கின சகல காட்டு ஜீவன்களைப்பார்க்கிலும் சர்ப்பமானது தந்திரமுள்ளதாயிருந்தது. அது ஸ்திரீயை நோக்கி: நீங்கள் தோட்டத்திலுள்ள சகல விருட்சங்களின் கனியையும் புசிக்கவேண்டாம் என்று தேவன் சொன்னது உண்டோ என்றது. ஆதியாகமம் 3:1

• அவன் நம் கண்களைக் குருடாக்குகிறான் (ஆவிக்குரிய குருட்டுத்தன்மை) - ஜனங்கள் தங்கள் பாவத்தை அடையாளம் காணாதபடி அவர்களைக் குருடாக்குகிறான். தேவனுடைய சாயலாயிருக்கிற கிறிஸ்துவின் மகிமையான சுவிசேஷத்தின் ஒளி, அவிசுவாசிகளாகிய அவர்களுக்குப் பிரகாசமாயிராதபடிக்கு, இப்பிரபஞ்சத்தின் தேவனானவன் அவர்களுடைய மனதைக் குருடாக்கினான். 2 கொரிந்தியர் 4:4

• சோதனைகள் - சோதனைகள் எப்போதும் சாத்தானிடமிருந்து வருகின்றன, நம்மை பாவத்தில் விழச் செய்ய ஆசையைத் தூண்டுகிறான், நாம் பாவத்தில் விழும்போது, அந்த பாவத்திற்கு நாம் தான் பொறுப்பு. சோதிக்கப்படுகிற எவனும், நான் தேவனால் சோதிக்கப்படுகிறேன் என்று சொல்லாதிருப்பானாக; தேவன் பொல்லாங்கினால் சோதிக்கப்படுகிறவரல்ல, ஒருவனையும் அவர் சோதிக்கிறவருமல்ல. யாக்கோபு 1:13

• இச்சையும் பெருமையும் - சாத்தான் அழகால் நிறைந்தவன். அவன் தன் அழகையும், பெருமையையும் பயன்படுத்தி நம்மிடமிருந்து தேவனின் கிருபையை எடுத்து போடும்படிக்கு நம்மை தேவனுக்கு முன்பாகப் பெருமை கொள்ளச் செய்கிறான். காம எண்ணங்களையும் ஆசைகளையும் உருவாக்கி பாவம் செய்ய உலக இன்பங்களுக்கு நம்மை கவர்ந்திழுக்கிறான். அவன் பெருமையால் நிறைந்திருப்பதால் அந்தப் பெருமையை நம்மிடமும் உருவாக்கி, நம்மை தேவனுடைய கிருபையில் இருந்து விழும்படி செய்கிறான். ஏனெனில், மாம்சத்தின் இச்சையும், கண்களின் இச்சையும், ஜீவனத்தின் பெருமையுமாகிய உலகத்திலுள்ளவைகளெல்லாம் பிதாவினாலுண்டானவைகளல்ல, அவைகள் உலகத்தினாலுண்டானவைகள். 1 யோவான் 2:16

 நம்மிடம் பாபிலோன் ஆவி இருக்கும்போது தேவன் நம்மை எவ்வாறு நியாயந்தீர்க்கிறார்? 

பாபிலோனின் ஆவியை உடையவர்களை தேவன் நியாயந்தீர்ப்பது வெளிப்படுத்தின விசேஷம் 17, 18, 19 ஆம் அதிகாரங்களில் தெளிவாக வெளிப்படுத்தப்பட்டுள்ளது. இந்த சீர்கெட்ட, கலகத்தனமான ஆவியின்கீழ் வாழ்கிறவர்களை அவர் எப்படி நடத்துவார் என்பதை இந்த அதிகாரங்கள் விவரிக்கின்றன.

வெளிப்படுத்தின விசேஷம் 17 : வெளிப்பாடு மற்றும் நியாயத்தீர்ப்பு தொடங்குகிறது - பாபிலோன் தேசங்களையும் ராஜாக்களையும் ஆவிக்குரிய வேசித்தனம் மற்றும் சீர்கேட்டுக்கு இட்டுச் செல்லும் ஒரு மகா வேசியாக சித்தரிக்கப்படுகிறது. அவள் தேவனுடைய ஜனங்களின் இரத்தத்தால் வெறிகொண்டிருக்கிறாள், இது சபையைத் துன்புறுத்துவதில் அவளுடைய பங்கைக் காட்டுகிறது. (வெளிப்படுத்தின விசேஷம் 17:1-2,6).

• அவள் மிருகத்தின் மீது சவாரி செய்கிறாள், இது உலக அதிகாரத்தின் அடையாளம்.

• அந்த மிருகமும் அதன் கூட்டாளிகளும் அவளுக்கெதிராகத் திரும்பி, அவளை அழித்துவிடுவார்கள் — இது தீமை இறுதியில் தன்னைத்தானே எப்படி அழித்துக் கொள்கிறது என்பதைக் காட்டுகிறது.

• அவளுடைய விதி பாதாளத்தில் துவங்கி இறுதியில் அழிவை நோக்கி செல்லுகிறது. (வெளிப்படுத்தின விசேஷம் 17:8).

வெளிப்படுத்தின விசேஷம் 18 : பாபிலோனின் வீழ்ச்சி - பாபிலோனின் வீழ்ச்சியை தேவன் அறிவிக்கிறார் - அவள் பேய்களின் குடியிருப்பாகவும், முழுமையான அழிவின் அடையாளமாகவும் மாறுகிறாள்.

• அவளுடைய பாவங்கள் "வானபரியந்தம் குவிந்திருக்கின்றன".

• வர்த்தகர்களும், ராஜாக்களும் அவளுடைய செல்வத்தின் மீதும்  ஆடம்பரத்தின் மீதும் நம்பிக்கை வைத்திருந்ததால் அழுது புலம்புகிறார்கள்.

• அவளின் அழிவு விரைவாகவும் முழுமையாகவும் ஒரே நாழிகையில் நிகழ்கிறது.

வெளிப்படுத்தின விசேஷம் 19 : பரலோகம் அவளுடைய நியாயத்தீர்ப்பைக் குறித்து மகிழ்கிறது - நியாயத்தீர்ப்பு முடிந்ததும் பரலோகம் துதியில் பொங்கி எழுகிறது.

• தேவனுடைய சத்தியமான, நீதியான நியாயத்தீர்ப்புக்காக திரளான ஜனக்கூட்டம் "அல்லேலூயா!" என்று ஆர்ப்பரிக்கின்றனர். (வெளிப்படுத்தின விசேஷம் 19:1-4).

• தேவன் தம்முடைய ஊழியர்களின் இரத்தத்திற்குப் பழிவாங்கி, பாபிலோனின் சீர்கேட்டை முடிவுக்குக் கொண்டுவந்தார்.

• "அல்லேலூயா" என்ற வார்த்தை புதிய ஏற்பாட்டில் நான்கு முறை மட்டுமே தோன்றுகிறது, அனைத்தும் பாபிலோனின் வீழ்ச்சியை கொண்டாடும் இந்த நிகழ்வைக் குறிக்கின்றன. 

இறுதி நியாயத்தீர்ப்பு: அக்கினிக் கடல் - பாபிலோனின் ஆவி இறுதியில் நித்திய நியாயத்தீர்ப்புக்கு வழிவகுக்கிறது.

• மிருகம், கள்ள தீர்க்கதரிசி மற்றும் பிசாசு ஆகியோர் அக்கினிக் கடலில் தள்ளப்படுகிறார்கள், அங்கு அவர்கள் சதாகாலங்களிலும் வாதிக்கப்படுவார்கள். (வெளிப்படுத்தின விசேஷம் 20:10).

பாபிலோனின் ஆவியை எப்படி அகற்றலாம்?

பாபிலோனின் ஆவியை நம்மால் அடையாளம் காண முடியாது - தேவன் மட்டுமே அதை நமக்கு வெளிப்படுத்த முடியும். அது நம் இருதயங்களுக்குள் ஆழமாக மறைந்திருப்பதால் அதை வெளிப்படுத்த தேவனுடைய ஒளி தேவை. நம் கண்கள் சாத்தானால் குருடாக்கப்பட்டிருப்பதால், நம்மிடம் பாபிலோனின் ஆவி இல்லை என்று எண்ணி, மறுத்து, பிறரைப் பார்த்து, அவர்கள் பாபிலோனின் ஆவியுடன் வாழ்கிறார்கள் என குற்றம் சாட்டுகிறோம்.

நமக்குள் இருக்கும் பாபிலோனின் ஆவியை அகற்ற நாம் செய்யக்கூடிய மூன்று காரியங்கள் உள்ளன.

1. தேவனுடைய வேதத்தைப் படித்து தியானித்தல்

• தேவனுடைய வேதத்தை தினமும் வாசித்து, நமது மனதிலும் ஆவியிலும் தியானிப்பது முதல் படியாகும். 2 தீமோத்தேயு 3:16,17 இல் கூறப்பட்டுள்ளபடி, தேவனுடைய வார்த்தை நம்மைத் திருத்துகிறது, நம் கண்களால் பார்க்க முடியாத மறைவான விஷயங்களைக் குறித்து நமக்கு உணர்த்துகிறது. வேதவாக்கியங்களெல்லாம் தேவ ஆவியினால் அருளப்பட்டிருக்கிறது; தேவனுடைய மனுஷன் தேறினவனாகவும், எந்த நற்கிரியையுஞ்செய்யத் தகுதியுள்ளவனாகவும் இருக்கும்படியாக, அவைகள் உபதேசத்துக்கும், கடிந்துகொள்ளுதலுக்கும், சீர்திருத்தலுக்கும், நீதியைப் படிப்பிக்குதலுக்கும் பிரயோஜனமுள்ளவைகளாயிருக்கிறது. 2 தீமோத்தேயு 3:16,17

• உண்மையோடும் மனத்தாழ்மையோடும் தினமும் வேதத்தைப் படிப்பது, நம்மில் என்ன தவறு இருக்கிறது என்பதைப் புரிந்துகொள்ள உதவுகிறது.

• வேதத்தை அலட்சியமாக வாசிக்காதீர்கள் - தேவன் உங்களுடன் பேசுவார் என்று எதிர்பார்த்து அன்புடனும் கவனத்துடனும் படியுங்கள்.

• வேதம் தேவ ஆவியினால் அருளப்பட்டிருக்கிறது, அது உங்களிடம் பேசக்கூடும். மேலும் எலும்பு மற்றும் இருதயத்தின் ஆழத்திற்கு ஊடுருவி, மறைந்திருக்கும் பாவங்களை வெளிக்கொணரச் செய்கிறது.

2. மனந்திரும்புதல்

• இயேசுவின் இரத்தம் நம்மைச் சுத்திகரிக்கிறது என்பது பலருக்குத் தெரியும் (1 யோவான் 1:7), ஆனால் விடுதலையாவதற்கு நம்முடைய பாவங்களையும் அறிக்கையிட வேண்டும்.

• நம்மிடம் பாபிலோன் ஆவி இருந்ததை, அதாவது பெருமை, மறைவான நோக்கங்கள், சுயநல ஆசைகள் மற்றும் தேவனுடைய நாமத்தை தவறாக பயன்படுத்தியது என யாவற்றையும் நாம் அவரிடம் ஒப்புக்கொள்ள வேண்டும். நாம் செய்த மறைவான செயல்களை, நம்மைத் தவிர வேறு யாரும் அறியமுடியாது.

• நாம் நேர்மையாக அறிக்கையிடும்போது தான் தேவன் நம்மை மன்னித்து, சுத்தமாக்கி, அந்த ஆவியை நம்மிடமிருந்து முறித்தெடுப்பார்.

• தேவனிடமிருந்து விலகச் செய்த இரகசிய எண்ணங்கள், பேசப்பட்ட வெற்று வார்த்தைகள் மற்றும் மறைமுக நோக்கங்களுக்காகவும் மன்னிப்பு கேளுங்கள்.

3. தினசரி சுத்திகரிப்பு

• நமது கடைசி மூச்சு வரை சத்துரு ஓயமாட்டான், நாம் எவ்வளவு தூய்மையாக இருந்தாலும் மீண்டும் நம்மை பாபிலோனின் வழிகளுக்கு அழைத்துச் செல்ல அவன் தொடர்ந்து முயற்சிப்பான்.

• ஒரு முறை சுத்திகரிக்கப்பட்டால் மட்டும் போதாது - சுத்திகரிப்புக்காக நாம் தினமும் தேவனைத் தேட வேண்டும்.

• நம் மாம்சத்தையும் ஆவியையும் மாசுபடுத்தும் எல்லாவற்றிலிருந்தும் நம்மைச் சுத்திகரிக்கவும், தேவபயத்தோடே பரிசுத்த வாழ்க்கையை வாழவும் 2 கொரிந்தியர் 7:1 நமக்கு நினைவூட்டுகிறது. இப்படிப்பட்ட வாக்குத்தத்தங்கள் நமக்கு உண்டாயிருக்கிறபடியினால், பிரியமானவர்களே, மாம்சத்திலும் ஆவியிலும் உண்டான எல்லா அசுசியும் நீங்க, நம்மைச் சுத்திகரித்துக்கொண்டு, பரிசுத்தமாகுதலை தேவபயத்தோடே பூரணப்படுத்தக்கடவோம். 2 கொரிந்தியர் 7:1

"ஆவியானவர் சபைகளுக்குச் சொல்லுகிறதைக் காதுள்ளவன் கேட்கக்கடவன்" என்று வெளிப்படுத்தின விசேஷம் 2 மற்றும் 3 ஆம்அதிகாரங்களில் 7 சபைகளுக்கும் சொல்லப்பட்டிருப்பது போல், இது நம் ஒவ்வொருவரையும் நோக்கி தேவன் விடுக்கும் எச்சரிக்கை அழைப்பு ஆகும். பாபிலோனின் ஆவியைக் கவனித்து, முறித்துப் போட்டு தேவனின் கோபத்திலிருந்து நம்மைக் காத்துக் கொள்ளுவோம்.

ஆவியானவர் சபைகளுக்குச் சொல்லுகிறதைக் காதுள்ளவன் கேட்கக்கடவன்; ஜெயங்கொள்ளுகிறவனெவனோ அவனுக்கு தேவனுடைய பரதீசின் மத்தியிலிருக்கிற ஜீவவிருட்சத்தின் கனியைப் புசிக்கக்கொடுப்பேன் என்றெழுது. வெளிப்படுத்தின விசேஷம் 2:7