நான் என்பதன் வல்லமை

இந்த உலகில் ஒவ்வொரு மனிதனும் ஒரு பெயரால் அறியப்படுகிறான். ஆனால் ஒரு பெயர் மட்டுமே அவர்களை பிரபலமானவர்களாக மாற்றிவிடாது — அவர்கள் ஏதாவது சாதிக்க வேண்டும். ஒரு நடிகரின் படம் திரைக்கு வரும்போது அவர் பிரபலமாகிறார். ஒரு அரசியல்வாதி மக்களுக்குச் செய்யும் பணியின் மூலம் அங்கீகாரத்தைப் பெறுகிறார். ஒரு தொழிலதிபர் அவர் கட்டியெழுப்பிய சாம்ராஜ்யத்தால் அறியப்படுகிறார். ஒரு மாணவன் வகுப்பில் எப்படிச் செயல்படுகிறான் என்பதைக் கொண்டு பள்ளியில் அறியப்படுகிறான். எந்தவொரு சூழலிலும், ஒருவருடைய பெயர் அவர் செய்யும் செயல்களாலேயே அறியப்படுகிறது.

ஆனால் தேவனைப் பொறுத்தவரை, அவர் என்ன செய்கிறார் என்பதன் மூலம் அவரது நாமம் அறியப்படவில்லை — அவர் யார் என்பதன் மூலம் அவருடைய நாமம் அறியப்படுகிறது. இது கேட்பதற்கு விசித்திரமாகவும் வித்தியாசமாகவும் தோன்றலாம். அவரது நாமத்தைக் கொண்டு அவர் யார் என்பதை நீங்கள் புரிந்து கொள்ளும்போது, அவர் அளித்த ஒவ்வொரு வாக்குறுதிக்கும் பின்னால் இருக்கும் வல்லமையை நீங்கள் புரிந்து கொள்வீர்கள்.

இதைப் புரிந்து கொள்ள நாம் மோசேயின் வரலாற்றைப் பார்க்கலாம் — தேவன் எவ்வாறு தம்மை "நான் இருக்கிறவராக இருக்கிறேன்" என்று வெளிப்படுத்தினார், பின்னர் எவ்வாறு அந்த அடையாளத்தை ஏழு வல்லமையான வாக்குறுதிகள் மூலம் செயலாக மாற்றினார் என்பதை இதில் காணலாம்.

"நான் இருக்கிறவராக இருக்கிறேன்" என்பது அவர் யார் என்பதை உங்களுக்குச் சொல்கிறது. இந்த வாக்குறுதிகள் அவர் என்ன செய்யப் போகிறார் என்பதை சொல்கிறது.

மோசேயும் தேவனின் சந்திப்பும்

எரியும் முட்செடி

மோசே மீதியான் தேசத்து ஆசாரியனாயிருந்த தன் மாமனாகிய எத்திரோவின் ஆடுகளை மேய்த்துவந்தான். அவன் ஆடுகளை வனாந்தரத்தின் பின்புறத்திலே ஓட்டி, தேவபர்வதமாகிய ஓரேப் மட்டும் வந்தான்.

[யாத்திராகமம் 3:1-4]  அங்கே கர்த்தருடைய தூதனானவர் ஒரு முட்செடியின் நடுவிலிருந்து உண்டான அக்கினிஜூவாலையிலே நின்று அவனுக்குத் தரிசனமானார். அப்பொழுது அவன் உற்றுப்பார்த்தான்; முட்செடி அக்கினியால் ஜூவாலித்து எரிந்தும், அது வெந்துபோகாமல் இருந்தது. அப்பொழுது மோசே: இந்த முட்செடி வெந்துபோகாதிருக்கிறது என்ன, நான் கிட்டப்போய் இந்த அற்புதக்காட்சியைப் பார்ப்பேன் என்றான். அவன் பார்க்கும்படி கிட்ட வருகிறதைக் கர்த்தர் கண்டார். முட்செடியின் நடுவிலிருந்து தேவன் அவனை நோக்கி: மோசே, மோசே என்று கூப்பிட்டார். அவன்: இதோ, அடியேன் என்றான்.

• மோசே வனாந்தரத்தில் ஆடுகளை மேய்த்துக் கொண்டிருந்தார் — அது ஒரு சாதாரண நாள், ஒரு சாதாரண வேலை. ஆனால், அந்த சாதாரண நேரத்தை ஒரு முட்செடியின் நடுவே அக்கினிஜுவாலையாகத் தோன்ற தேவன் தேர்ந்தெடுத்தார்.

• இதில் விசித்திரமான விஷயம் நெருப்பு அல்ல — அந்த முட்செடி கருகாமல் பச்சையாகவே இருந்ததுதான். அது வெந்துபோகாமல் இருந்தது. அந்த விசித்திரமான காட்சி, என்னவென்று பார்க்க மோசேயை அருகில் இழுத்தது. நமக்கும் பல நேரங்களில் அப்படித்தான் நடக்கிறது — நம் வாழ்க்கையில் ஏதேனும் விசித்திரமான நிகழ்வுகள் நடக்கும்போதுதான் நாம் தேவனைச் சந்திக்கிறோம், அவரைத் தேடுகிறோம்.

• தேவன், "மோசே! மோசே!" என்று அவரைப் பெயர் சொல்லி அழைத்தார். வசனங்கள் 5–6 இல், மோசே நின்றுகொண்டிருந்த இடம் பரிசுத்த பூமியாக இருந்ததால், தேவன் அவரைத் தன் கால்களிலிருக்கும் பாதரட்சைகளைக் கழற்றிப்போடுமாறு கூறுவதைக் காணலாம்.

• [யாத்திராகமம் 3:5-6]  அப்பொழுது அவர்: இங்கே கிட்டிச்சேராயாக; உன் கால்களில் இருக்கிற பாதரட்சையைக் கழற்றிப்போடு; நீ நிற்கிற இடம் பரிசுத்த பூமி என்றார். பின்னும் அவர்: நான் ஆபிரகாமின் தேவனும் ஈசாக்கின் தேவனும் யாக்கோபின் தேவனுமாகிய உன் பிதாக்களுடைய தேவனாயிருக்கிறேன் என்றார். மோசே தேவனை நோக்கிப்பார்க்கப் பயந்ததினால், தன் முகத்தை மூடிக்கொண்டான்.

• தேவன் தம்மை "இருக்கிறவராக இருக்கிறேன்" என்று அறிமுகப்படுத்தினார் — ஆபிரகாம், ஈசாக்கு, மற்றும் யாக்கோபின் அதே தேவன். அவர் ஒரு புதிய தேவனோ, வேறுபட்ட தேவனோ அல்ல. அவர் மாறாதவர். நமக்கும் "நான் இருக்கிறவராகவே இருக்கிறேன்" என்றே இருக்கிறார்.

இருக்கிறவராக இருக்கிறேன்

[யாத்திராகமம் 3:13-14]  அப்பொழுது மோசே தேவனை நோக்கி: நான் இஸ்ரவேல் புத்திரரிடத்தில் போய், உங்கள் பிதாக்களுடைய தேவன் உங்களிடத்தில் என்னை அனுப்பினார் என்று அவர்களுக்குச் சொல்லும்போது, அவருடைய நாமம் என்ன என்று அவர்கள் என்னிடத்தில் கேட்டால், நான் அவர்களுக்கு என்ன சொல்லுவேன் என்றான். அதற்குத் தேவன்: இருக்கிறவராக இருக்கிறேன் என்று மோசேயுடனே சொல்லி, இருக்கிறேன் என்பவர் என்னை உங்களிடத்துக்கு அனுப்பினார் என்று இஸ்ரவேல் புத்திரரோடே சொல்வாயாக என்றார்.

வசனம் 6 இல் தேவன் ஏற்கனவே மோசேயிடம் தாம் யார் என்று கூறியிருந்தார். இருப்பினும் மோசே "உம்முடைய பெயர் என்ன?" என்று மீண்டும் கேட்டார். இது தேவன் ஏற்கனவே பதிலளித்த ஒரு கேள்வியாகும். நாம்கூட மோசேயை விட எந்தவிதத்திலும் வித்தியாசமானவர்கள் அல்ல. ஏன் எனக்கு மட்டும்?, எனக்கு என்ன கிடைக்கும்?, நான் போனால் என்ன நடக்கும்? என்று தேவன் ஏற்கனவே பதிலளித்த அதே கேள்விகளைத் தான் நாமும் அவரிடம் கேட்கிறோம். நம்முடைய சுய புலம்பல்களும் கவலைகளும் தான் எப்போதும் முதலாவதாக வருகின்றன.

• தேவனுடைய பதில் அவர் யார் என்பதன் முழு அதிகாரத்தையும் வெளிப்படுத்தியது — இருக்கிறவராக இருக்கிறேன்.

• இருக்கிறவராக இருக்கிறேன் (YHWH — யேகோவா) என்றால்: சுயமாய் இருக்கிறவர், நித்தியமானவர், மாறாதவர், உடன்படிக்கையைக் காக்கின்ற தேவன் என்று பொருள்.

• [வெளிப்படுத்தின விசேஷம் 1:8] இருக்கிறவரும் இருந்தவரும் வருகிறவருமாகிய சர்வவல்லமையுள்ள கர்த்தர்: நான் அல்பாவும், ஓமெகாவும், ஆதியும் அந்தமுமாயிருக்கிறேன் என்று திருவுளம்பற்றுகிறார்.

• ஒரே ஒரு தேவன் மட்டுமே இருக்கிறார் - அவரே இருக்கிறேன் என்பவர். மகிமையும் கனமும் அவருக்கு மட்டுமே உரியவை — அவரே இருக்கிறவரும், இருந்தவரும், வருகிறவருமாகிய சர்வவல்லமையுள்ளவர். அவரே நம்முடைய யேகோவா.

தேவன் நம்முடைய எல்லா கேள்விகளுக்கும் பொறுமையுள்ளவராக இருக்கிறார். அவர் அடுத்து என்ன பதிலளித்தார் என்று பாருங்கள்:

[யாத்திராகமம் 3:15]  மேலும், தேவன் மோசேயை நோக்கி: ஆபிரகாமின் தேவனும் ஈசாக்கின் தேவனும் யாக்கோபின் தேவனுமாயிருக்கிற உங்கள் பிதாக்களுடைய தேவனாகிய கர்த்தர் என்னை உங்களிடத்துக்கு அனுப்பினார் என்று நீ இஸ்ரவேல் புத்திரருக்குச் சொல்வாயாக; என்றைக்கும் இதுவே என் நாமம், தலைமுறை தலைமுறைதோறும் இதுவே என் பேர்ப்பிரஸ்தாபம்.

• வசனம் 6 இல் அவர் அளித்த அதே பதிலைத்தான் மீண்டும் அளித்தார். மோசே அதை மீண்டும் கேட்க வேண்டியிருந்ததால், தேவன் பொறுமையாகவும் தெளிவாகவும் அதைத் திரும்பக் கூறினார்.

• நாமும்கூட பல நேரங்களில் மோசேயைப் போலத்தான் இருக்கிறோம்; இந்தக் கேள்விகளை மீண்டும் மீண்டும் கேட்கிறோம். ஆனால், அவர் நம்முடைய கர்த்தராக இருப்பதால், நம்முடைய பலவீனத்தைப் புரிந்து கொண்டு, நாம் கேட்கும்போது கோபப்படாமல் பொறுமையோடு நமக்கு விளக்குகிறார்.

நாம் கற்றுக்கொள்ளும் பாடம்:

கிரியைகளை விட கிருபையே மேலானது

• நாம்கூட பல நேரங்களில் மோசேயைப் போலத்தான் இருக்கிறோம் — தேவன் ஒருவரே என்பதை நாம் அறிந்திருக்கிறோம், ஆனால் துன்பம் வரும்போது, நாம் அந்த உண்மையை மறந்துவிட்டு, அவரிடம்: "நீங்கள் உண்மையிலேயே இருக்கிறீர்களா? எனக்கு மட்டும் ஏன் இப்படி நடக்கிறது? இந்தச் சூழ்நிலையில் நான் யார்?" என்று கேள்வி கேட்கிறோம்.

• இவை அனைத்திற்குமான பதில் பவுல் விவரிக்கும் காரியத்திலேயே அடங்கியிருக்கிறது. கிருபையினாலே விசுவாசத்தைக் கொண்டு இரட்சிக்கப்பட்டீர்கள்; இது உங்களால் உண்டானதல்ல, இது தேவனுடைய ஈவு; ஒருவரும் பெருமைபாராட்டாதபடிக்கு இது கிரியைகளினால் உண்டானதல்ல; [எபேசியர் 2:8-9]

நாம் மறந்துபோகும் ஈவு

• நீங்களும் நானும் விசுவாசத்தின் மூலமாகவே தேவனுடைய ராஜ்யத்திற்குள் இரட்சிக்கப்பட்டிருக்கிறோம். இது நம்முடைய கிரியைகளால் உண்டானதல்ல — இது "கிருபை" என்றழைக்கப்படும் ஈவாகும்; நாம் பாத்திரராய் இல்லாதபோதே நமக்குக் கிடைத்த தகுதியற்ற தயவு. தேவன் மோசேயைப் பெயர் சொல்லி அழைத்தார்; அதேபோல நம் பாவங்களுக்காகத் தம்முடைய சொந்தக் குமாரனைக் கொடுத்து, நம் ஒவ்வொருவரையும் பெயர் சொல்லி அழைத்திருக்கிறார்.

• ஆனால் நாம் இதை மறந்துவிட்டு மீண்டும் — "ஏன் தேவனே, எனக்கு மட்டும் ஏன்?" என்று கேட்கிறோம். தம்முடைய இரக்கத்தினால் தமக்குள்ள எல்லாவற்றையும் நமக்குத் தந்திருக்கும்போது, நம்முடைய இந்த நம்பிக்கையற்ற செயல் தேவனுடைய இருதயத்தைக் காயப்படுத்துகிறது. எனவே தேவனிடம் "ஏன் நான்?" என்று கேட்பதை நிறுத்துங்கள். அதற்குப் பதிலாக, "என்னால் பார்க்க முடியாத எதை நீர் என்னிடத்தில் காண்கிறீர்?" என்று தேவனிடம் கேளுங்கள்.

கீழ்ப்படிதல் எதிர்ப்பைச் சந்திக்கிறது

யாத்திராகமம் 4 ஆம் அதிகாரத்தை வாசிக்கும் போது, தேவன் மோசேக்கு எல்லாவற்றையும் நிரூபித்துக் காட்டினார் என்று காண்கிறோம். அவர் போகாமல் இருப்பதற்காகச் சொன்ன சாக்குகளைப் பொறுத்துக் கொண்டார்; மேலும் ஆரோனை அவருக்குத் துணையாகக் கொடுத்தார். மோசே வழிநடத்துவார், ஆரோன் தேவனுடைய வார்த்தைகளைப் பேசும் வாயாக இருப்பார்.

யாத்திராகமம் 5 ஆம் அதிகாரத்தின் தொடக்கத்தில், தேவன் இவர்கள் இருவரையும் எகிப்தின் ராஜாவாகிய பார்வோனிடம் பேசுவதற்காக அனுப்புகிறார்.

[யாத்திராகமம் 5:1-2]  பின்பு, மோசேயும் ஆரோனும் பார்வோனிடத்தில் போய்: இஸ்ரவேலின் தேவனாகிய கர்த்தர் வனாந்தரத்திலே எனக்குப் பண்டிகை கொண்டாடும்படி என் ஜனங்களைப் போகவிடவேண்டும் என்று சொல்லுகிறார் என்றார்கள். அதற்குப் பார்வோன்: நான் இஸ்ரவேலைப் போகவிடக் கர்த்தரின் வார்த்தையைக் கேட்கிறதற்கு அவர் யார்? நான் கர்த்தரை அறியேன்; நான் இஸ்ரவேலைப் போகவிடுவதில்லை என்றான்.

இதற்குப் பிறகு, பார்வோன் தன் இருதயத்தைக் கடினப்படுத்தி, இஸ்ரவேலர்களுக்கு அதிக துன்பங்களைக் கொடுத்தான். மோசேயும் ஆரோனும் தேவனை நோக்கி முறையிட்டனர்:

[யாத்திராகமம் 5:22-23]  அப்பொழுது மோசே கர்த்தரிடத்தில் திரும்பிப்போய்: ஆண்டவரே, இந்த ஜனங்களுக்குத் தீங்குவரப்பண்ணினதென்ன? ஏன் என்னை அனுப்பினீர்? நான் உமது நாமத்தைக்கொண்டு பேசும்படி பார்வோனிடத்தில் பிரவேசித்தது முதல் அவன் இந்த ஜனங்களை உபத்திரவப்படுத்துகிறான்; நீர் உம்முடைய ஜனங்களை விடுதலையாக்கவில்லையே என்றான்.

துன்பங்கள் வரும்போது, மனிதர்களுக்கு இயல்பாக எழும் எதிர்வினை இதுவே — "ஏன் எனக்கு இந்த நிலைமை? ஏன் என்னை அனுப்பினீர்?".

நாம் கற்றுக்கொள்ளும் பாடம்:

விருப்பமில்லாத கீழ்ப்படிதல்

• பல நேரங்களில் நாம் மோசேயையும் ஆரோனையும் போலத்தான் இருக்கிறோம் — தேவனுக்கு முழு மனதின்றி, கடமைக்காகக் கீழ்ப்படிகிறோம்; அவர் சொன்னபடியே செய்கிறோம்; ஆனால், ஒரு பிரச்சனை வந்தவுடனேயே: "ஏன் தேவனே? என்னை ஏன் அனுப்பினீர்?" என்று கேட்கத் தொடங்கிவிடுகிறோம்.

ஜெபத்திற்குப் பின் வரும் சோதனைகள்

• பல நேரங்களில் நாம் ஜெபித்த பிறகுதான் அதிகமான பிரச்சனைகளை எதிர்கொள்கிறோம். அந்தப் பிரச்சனை தேவன் நமக்கு உதவ விரும்பவில்லை என்பதால் வருவதில்லை — மாறாக, எதிரியானவன் (சாத்தான்) நாம் ஜெபிப்பதையும், அந்தப் பிரச்சனைக்குத் தீர்வு காண்பதையும் விரும்பவில்லை என்பதால் வருகிறது. ஜெபம் செய்வதால் அதிக துன்பமே வருகிறது என்று நம்மை ஏமாற்றி, நம்மை ஜெபத்தைக் கைவிடச் செய்வதே அவனுடைய ஒரே நோக்கம்.

தேவனின் வல்லமை

[யாத்திராகமம் 6:1]  அப்பொழுது கர்த்தர் மோசேயை நோக்கி: நான் பார்வோனுக்குச் செய்வதை இப்பொழுது காண்பாய்; பலத்த கையைக் கண்டு அவர்களைப் போகவிட்டு, பலத்த கையைக் கண்டு அவர்களைத் தன் தேசத்திலிருந்து துரத்திவிடுவான் என்றார்.

• தேவன் தம்முடைய வல்லமையை விளக்குகிறார் — "பலத்த கையைக் கண்டு அவர்களைப் போகவிட்டு, பலத்த கையைக் கண்டு அவர்களைத் தன் தேசத்திலிருந்து துரத்திவிடுவான்".

• அவருடைய வல்லமை எதிரியை ஏதோ ஒரு இடத்திலிருந்து மட்டும் அகற்றுவதில்லை — அது எதிரியை அந்த தேசத்தை விட்டே முழுமையாகத் துரத்தியடிக்கிறது.

• நாம் விசுவாசம் உள்ளவர்களாக இருந்தால், நமது துன்பங்களிலிருந்தும் நம்மை விடுவிக்க அதே வல்லமை நமக்குக் கிடைக்கிறது:

• [ஏசாயா 35:4]  மனம் பதறுகிறவர்களைப் பார்த்து: நீங்கள் பயப்படாதிருங்கள், திடன் கொள்ளுங்கள்; இதோ, உங்கள் தேவன் நீதியைச் சரிக்கட்டவும், உங்கள் தேவன் பதிலளிக்கவும் வருவார்; அவர் வந்து உங்களை இரட்சிப்பார் என்று சொல்லுங்கள்.

• [2 கொரிந்தியர் 12:9-10]  அதற்கு அவர்: என் கிருபை உனக்குப்போதும்; பலவீனத்திலே என் பலம் பூரணமாய் விளங்கும் என்றார். ஆகையால், கிறிஸ்துவின் வல்லமை என்மேல் தங்கும்படி, என் பலவீனங்களைக்குறித்து நான் மிகவும் சந்தோஷமாய் மேன்மைபாராட்டுவேன். அந்தப்படி நான் பலவீனமாயிருக்கும்போதே பலமுள்ளவனாயிருக்கிறேன்; ஆகையால் கிறிஸ்துவினிமித்தம் எனக்கு வரும் பலவீனங்களிலும், நிந்தைகளிலும், நெருக்கங்களிலும், துன்பங்களிலும், இடுக்கண்களிலும் நான் பிரியப்படுகிறேன்.

• [பிலிப்பியர் 4:13]  என்னைப் பெலப்படுத்துகிற கிறிஸ்துவினாலே எல்லாவற்றையுஞ்செய்ய எனக்குப் பெலனுண்டு.

நான் யேகோவா

[யாத்திராகமம் 6:2-4]  மேலும், தேவன் மோசேயை நோக்கி: நான் யேகோவா, சர்வல்லமையுள்ள தேவன் என்னும் நாமத்தினால் நான் ஆபிரகாமுக்கும் ஈசாக்குக்கும் யாக்கோபுக்கும் தரிசனமானேன்; ஆனாலும் யேகோவா என்னும் என் நாமத்தினால் நான் அவர்களுக்கு அறியப்படவில்லை. அவர்கள் பரதேசிகளாய்த் தங்கின தேசமாகிய கானான் தேசத்தை அவர்களுக்குக் கொடுப்பேன் என்று நான் அவர்களோடே என் உடன்படிக்கையையும் ஏற்படுத்தியிருக்கிறேன்.

• "நான் யார் தெரியுமா? என் வரலாறு என்ன தெரியுமா?" — இதைத்தான் வசனங்கள் 2–4 இல் தேவன் கூறுகிறார்.

• ஆபிரகாம் முதல் யாக்கோபு வரை நம் தேவன் மாறாத ஒரே தேவனாயிருக்கிறார். அவர் சர்வவல்லமையுள்ள யேகோவா — அவரால் கூடாத காரியம் ஒன்றுமில்லை.

• முந்தைய தலைமுறைக்கு, தம்முடைய நாமத்தினால் அவர் தம்மை முழுமையாக வெளிப்படுத்தவில்லை — அவர்கள் வெறுமனே விசுவாசித்து ஆராதித்தார்கள். ஆதியாகமத்தைப் படித்துப் பாருங்கள் — ஆதாம், நோவா, ஆபிரகாம், ஈசாக்கு, யாக்கோபு ஆகியோருக்குத் தேவன் தம்மை முறையாக அறிமுகப்படுத்திக்கொள்ளவில்லை. அவர்கள் தேவனை விசுவாசத்தினாலே அறிந்திருந்தார்கள்.

• வசனம் 4 இல், அவர்களோடு அவர் ஏற்படுத்திய உடன்படிக்கையின் வாக்குத்தத்தம் ஆதியாகமத்திலிருந்து பெறப்பட்டதாகும். [ஆதியாகமம் 17:8]  நீ பரதேசியாய்த் தங்கிவருகிற கானான் தேசமுழுவதையும், உனக்கும் உனக்குப் பின்வரும் உன் சந்ததிக்கும் நித்திய சுதந்தரமாகக் கொடுத்து, நான் அவர்களுக்குத் தேவனாயிருப்பேன் என்றார்.

• [யாத்திராகமம் 6:5]  எகிப்தியர் அடிமைகொள்ளுகிற இஸ்ரவேல் புத்திரரின் பெருமூச்சையும் நான் கேட்டு, என் உடன்படிக்கையை நினைத்தேன். "உங்களை விடுவிக்க நான் ஏன் வந்தேன் தெரியுமா? உங்கள் பெருமூச்சும் கூக்குரலும் என்னை எட்டியது; மேலும் 600 ஆண்டுகளுக்கு முன்பு உங்கள் முற்பிதாக்களுக்கு நான் செய்த உடன்படிக்கையையும் நான் நினைவுகூருகிறேன்" என்று தேவன் கூறுகிறார்.

நாம் கற்றுக்கொள்ளும் பாடம்:

யேகோவா யீரே — நம் தேவைகளைச் சந்திக்கிறவர்

• தேவன் நமது யேகோவா யீரேயாக இருக்கிறார் — அவர் நமது தேவைகளைச் சந்திக்கிறவர். அவரே இருக்கிறவராகவே இருப்பவர். உங்களுக்கு உதவி செய்ய அவரைத் தவிர வேறு யாருமில்லை. நீங்களோ நானோ செய்த கிரியைகளுக்காக அல்ல, மாறாக நம்முடைய பிதாவாகிய ஆபிரகாமுக்கு அவர் செய்த வாக்குத்தத்தத்தின் நிமித்தமே அவர் உங்களுக்கும் எனக்கும் உதவி செய்கிறார்.

• விசுவாசத்தினாலே நாம் அவருடைய பிள்ளைகளாயிருக்கிறோம். ஒரு தகப்பன் தன் பிள்ளைக்கு உதவி செய்யாமல் இருப்பானா? அதேபோல, தேவன் தம்மை நமக்கு வெளிப்படுத்தவும், நமக்கு உதவி செய்யவும் காத்திருக்கிறார். [ரோமர் 4:16]  ஆதலால், சுதந்தரமானது கிருபையினால் உண்டாகிறதாயிருக்கும்படிக்கு அது விசுவாசத்தினாலே வருகிறது; நியாயப்பிரமாணத்தைச் சார்ந்தவர்களாகிய சந்ததியாருக்குமாத்திரமல்ல, நம்மெல்லாருக்கும் தகப்பனாகிய ஆபிரகாமுடைய விசுவாசத்தைச் சார்ந்தவர்களான எல்லாச் சந்ததியாருக்கும் அந்த வாக்குத்தத்தம் நிச்சயமாயிருக்கும்படிக்கு அப்படி வருகிறது.

ஏழு வாக்குறுதிகள்

[யாத்திராகமம் 6:6-8]  ஆதலால், இஸ்ரவேல் புத்திரரை நோக்கி: நானே கர்த்தர்; உங்கள்மேல் எகிப்தியர் சுமத்தின சுமைகளை நீக்கி நான் உங்களை விடுவித்து, உங்களை அவர்கள் அடிமைத்தனத்திற்கு, நீங்கலாக்கி, ஓங்கிய கையினாலும், மகா தண்டனைகளினாலும் உங்களை மீட்டு, உங்களை எனக்கு ஜனங்களாகச் சேர்த்துக்கொண்டு, உங்களுக்கு தேவனாயிருப்பேன்; உங்கள்மேல் எகிப்தியர் சுமத்தின சுமைகளை நீக்கி உங்களை விடுவிக்கிற உங்கள் தேவனாகிய கர்த்தர் நான் என்று அறிவீர்கள். ஆபிரகாமுக்கும் ஈசாக்குக்கும் யாக்கோபுக்கும் கொடுப்பேன் என்று நான் ஆணையிட்ட தேசத்தில் உங்களைக் கொண்டுபோய், அதை உங்களுக்குச் சுதந்தரமாகக் கொடுப்பேன்; நான் கர்த்தர் என்று அவர்களுக்குச் சொல் என்றார்.

"ஆதலால்" என்ற வார்த்தைக்கு, "நான் இருக்கிறவராகவே இருப்பதனால்" என்று அர்த்தம்.

தேவனுடைய சர்வவல்லமையினால், அவர் தம்முடைய வல்லமையினாலும் பராக்கிரமத்தினாலும் தாம் என்ன செய்யப் போகிறார் என்பதை அறிவிக்கிறார்.

1. நான் எகிப்தியரின் நுகத்தடியிலிருந்து உங்களை விடுவித்து வெளியே கொண்டுவருவேன்.

2. உங்களை அவர்கள் அடிமைத்தனத்திற்கு நீங்கலாக்குவேன்.

3. நான் ஓங்கிய கையினாலும், மகா தண்டனைகளினாலும் உங்களை மீட்டுக்கொள்வேன்.

4. உங்களை எனக்கு ஜனங்களாகச் சேர்த்துக்கொள்வேன் — இது ஒரு உடன்படிக்கை உறவு; அவர்கள் அவருக்கு உரியவர்களாக இருப்பார்கள்.

5. நான் உங்களுக்குத் தேவனாயிருப்பேன் — அவரே அவர்களை வழிநடத்தி பராமரிப்பார்.

6. நான் ஆபிரகாமுக்கும் ஈசாக்குக்கும் யாக்கோபுக்கும் தருவேன் என்று ஆணையிட்ட வாக்குத்தத்தத்தின் தேசத்தில் உங்களைப் பிரவேசிக்கப்பண்ணுவேன்.

7. அதை உங்களுக்குச் சுதந்தரமாகக் கொடுப்பேன் — அந்த தேசம் அவர்களின் சுதந்தரமாகும்.

இது "நானே கர்த்தர்" என்பதில் தொடங்கி, அதிலேயே முடிகிறது — அவருடைய இறையாண்மை அடையாளம் ஒவ்வொரு வாக்குத்தத்தத்தையும் அவருடைய அதிகாரத்தினால் மூடுகிறது.

நாம் கற்றுக்கொள்ளும் பாடம்:

மாறாத தேவன்

• அவர் நேற்றும் இன்றும் என்றும் மாறாத தேவனாயிருக்கிறார் — [எபிரெயர் 13:8]  இயேசுகிறிஸ்து நேற்றும் இன்றும் என்றும் மாறாதவராயிருக்கிறார்.

விசுவாசமே வாக்குத்தத்தத்தின் திறவுகோல்

• அவரே தேவன் — இருக்கிறவராக இருக்கிறார், அவரே யேகோவா என்பதை நீங்கள் அங்கீகரித்தால், நீங்கள் இருக்கும் எந்தவொரு சூழ்நிலையிலிருந்தும் உங்களை விடுவிக்க அவர் விருப்பமுள்ளவராயிருக்கிறார். இது விசுவாசத்தினால் மட்டுமே நடக்கும் — [ரோமர் 3:22-24]  அது இயேசுகிறிஸ்துவைப்பற்றும் விசுவாசத்தினாலே பலிக்கும் தேவநீதியே; விசுவாசிக்கிற எவர்களுக்குள்ளும் எவர்கள்மேலும் அது பலிக்கும், வித்தியாசமே இல்லை. எல்லாரும் பாவஞ்செய்து, தேவமகிமையற்றவர்களாகி, இலவசமாய் அவருடைய கிருபையினாலே கிறிஸ்து இயேசுவிலுள்ள மீட்பைக்கொண்டு நீதிமான்களாக்கப்படுகிறார்கள்;

• அவருடைய இரத்தத்தினால் நாம் கழுவப்பட்டு, அவர் மூலமாக நித்திய ஜீவனாகிய ஈவைப் பெற்றிருக்கிறோம். நாம் இயேசுவின் மீது விசுவாசம் வைத்தால் இது நம் அனைவருக்கும் கிடைக்கும் — [ரோமர் 6:23]  பாவத்தின் சம்பளம் மரணம்; தேவனுடைய கிருபைவரமோ நம்முடைய கர்த்தராகிய இயேசுகிறிஸ்துவினால் உண்டான நித்தியஜீவன்.

இஸ்ரவேலர்கள் எப்படி பதிலளித்தார்கள்?

[யாத்திராகமம் 6:9-12]  இந்தப்பிரகாரமாக மோசே இஸ்ரவேல் புத்திரருக்குச் சொன்னான்; அவர்களோ மனமடிவினாலும் கொடுமையான வேலையினாலும் மோசேக்குச் செவிகொடாமற்போனார்கள். பின்பு, கர்த்தர் மோசேயை நோக்கி: நீ எகிப்தின் ராஜாவாகிய பார்வோனிடத்தில் போய், அவன் தன் தேசத்திலிருந்து இஸ்ரவேல் புத்திரரைப் போகவிடும்படி அவனோடே பேசு என்றார். மோசே கர்த்தருடைய சந்நிதானத்தில் நின்று, இஸ்ரவேல் புத்திரரே எனக்குச் செவிகொடுக்கவில்லை; பார்வோன் எனக்கு எப்படிச் செவிகொடுப்பான்? நான் விருத்தசேதனமில்லாத உதடுகளுள்ளவன் என்றான்.

• ஜனங்களுக்கு விசுவாசம் இருக்கவில்லை. தங்களுக்கு முன்பாக இருந்தவற்றை மட்டுமே அதாவது, தங்கள் மனச்சோர்வையும் கடினமான அடிமைவேலையையும் மட்டுமே கண்டதால் அவர்கள் செவிகொடுக்கவில்லை.

• மோசேயும் விசுவாசமில்லாதவராயிருந்தார் — அவர் தேவனிடம் வேறு தொனியில் அதே வார்த்தைகளைக் கூறினார்: இஸ்ரவேல் புத்திரரே எனக்குச் செவிகொடுக்கவில்லை; பார்வோன் எனக்கு எப்படிச் செவிகொடுப்பான்?

• விசுவாசமில்லாமல் தேவனுக்குப் பிரியமாயிருப்பது கூடாதகாரியம் — [எபிரெயர் 11:1]  விசுவாசமானது நம்பப்படுகிறவைகளின் உறுதியும், காணப்படாதவைகளின் நிச்சயமுமாயிருக்கிறது.

• நாம் நம்முடைய நம்பிக்கையை தேவனிடத்தில் வைக்கிறோம். நாம் காணாத தேவனிடத்திலேயே நம்முடைய உறுதியான விசுவாசத்தையும் வைக்கிறோம்.

• ஆபிரகாம், ஈசாக்கு, யாக்கோபு — இவர்கள் அனைவரும் விசுவாசத் தலைமுறையினராக இருந்தார்கள். ஆனால் மோசே தான் காண விரும்பிய காரியத்தின் காரணமாக விசுவாசமற்றவராய் இருந்தார்.

• [எபிரேயர் 11:39-40]  இவர்களெல்லாரும் விசுவாசத்தினாலே நற்சாட்சிபெற்றும், வாக்குத்தத்தம்பண்ணப்பட்டதை அடையாமற்போனார்கள். அவர்கள் நம்மையல்லாமல் பூரணராகாதபடிக்கு விசேஷித்த நன்மையானதொன்றை தேவன் நமக்கென்று முன்னதாக நியமித்திருந்தார்.

நாம் கற்றுக்கொள்ளும் பாடம்:

காண்பதைத் தாண்டிய விசுவாசம்

• பல நேரங்களில் நமது விசுவாசம் நாம் காண்பவற்றிலிருந்தே வருகிறது, ஆனால் தேவன் எதிர்பார்க்கும் விசுவாசமோ, எதையும் காணாமலேயே அவரை நம்புவதாகும். அந்த விசுவாசத்தில் நீங்கள் ஒரு அற்புதத்தைக் காண்பீர்கள்.

• விசுவாசத்தின் வரையறையே இந்தச் செய்திக்கு அடித்தளமாக இருக்கிறது — [எபிரெயர் 11:1]  விசுவாசமானது நம்பப்படுகிறவைகளின் உறுதியும், காணப்படாதவைகளின் நிச்சயமுமாயிருக்கிறது.

தேவன் "நான் இருக்கிறவராகவே இருக்கிறேன்" என்பதில் தொடங்கி, தாம் யார் என்பதை வெளிப்படுத்தினார். அவர் அத்தோடு நின்றுவிடவில்லை; தொடர்ந்து தாம் செய்யப் போகிறதையும் அறிவித்தார். "நான் இருக்கிறவராகவே இருக்கிறேன்" என்பது அவருடைய அடையாளம்; தாம் செய்யப் போவதாகக் கூறியது உங்களுக்கும் எனக்கும் அவர் கொடுக்கும் வாக்குறுதி.

இந்த உலகத்தில் ஒருவருடைய பெயர் அவர் என்ன சாதிக்கிறார் என்பதைக் கொண்டு அறியப்படுகிறது. ஆனால் தேவனுடைய நாமமோ அவர் யார் என்பதைக் கொண்டே அறியப்படுகிறது — "நான் இருக்கிறவராகவே இருக்கிறேன்" என்று அவர் பேசும்போது, அதைத் தொடர்ந்து எப்போதும் அவர் செய்யப் போவதே வரும்.

அவர் உங்களைப் புறப்படப்பண்ணுவார். அவர் உங்களை விடுவிப்பார். அவர் உங்களை மீட்டுக்கொள்வார். அவர் உங்களைத் தம்முடைய சொந்த ஜனமாகச் சேர்த்துக்கொள்வார். அவர் உங்களுக்குத் தேவனாயிருப்பார். தாம் வாக்குத்தத்தம் பண்ணிய இடத்திற்கு அவர் உங்களைக் கொண்டுசேர்ப்பார்.

இயேசுவே ஆண்டவர் என்று நீங்கள் நாவினாலே அறிக்கையிட்டால், நீங்கள் கேட்டதை அவர் உங்களுக்குத் தருவார்; உங்கள் ஜெபத்திற்கும் அவர் பதிலளிப்பார்.

[ஏசாயா 43:1]  இப்போதும் யாக்கோபே, உன்னைச் சிருஷ்டித்தவரும், இஸ்ரவேலே, உன்னை உருவாக்கினவருமாகிய கர்த்தர் சொல்லுகிறதாவது: பயப்படாதே; உன்னை மீட்டுக்கொண்டேன்; உன்னைப் பேர்சொல்லி அழைத்தேன்; நீ என்னுடையவன்.

கேள்வி, "தேவனுக்கு வல்லமை இருக்கிறதா?" என்பதல்ல. "உங்களுக்கு விசுவாசம் இருக்கிறதா?" என்பதே கேள்வி.