தேவனுடைய சித்தமே நியாயத்தீர்ப்பின் ஆரம்பம்

ஒரு இளைஞன் சபையில் பாடுவது, ஜெபிப்பது, காரியங்களை ஒழுங்குபடுத்துவது என தேவாலயத்தின் அனைத்து செயல்களிலும் ஈடுபட்டிருந்தான். எல்லோரும் அவனை தீவிரமான ஆவிக்குரியவனாகக் கருதினர். ஆனால் ஒரு நாள் ஒரு மூப்பர் மெதுவாக அவனிடம், “சகோதரரே, நீங்கள் தேவனுக்காக பல காரியங்களைச் செய்கிறீர்கள். ஆனால் தேவன் உண்மையில் கேட்பதை நீங்கள் எப்போதாவது செய்கிறீர்களா?” என்று கேட்டார்.

அந்தக் கேள்வி அந்த இளைஞனைத் தொந்தரவு செய்தது. அவன் சுறுசுறுப்பாகவும், அர்ப்பணிப்புடனும், உண்மையுடனும் செயல்பட்டவன் - ஆனால் இப்போது தன்னுடைய ஆவிக்குரிய உண்மைத்தன்மையே  கேள்விக்குறியாக்கப்பட்டது போல் உணர்ந்தான். அதைப் பற்றி யோசிக்க யோசிக்க, தன்னிடம் உண்மையான பதில் எதுவும் இல்லை என்பதை உணர்ந்தான்.

தேவனுக்காகப் பல வேலைகளில் ஈடுபட்டிருந்தாலும், தேவனையே தவறவிடுவதும் சாத்தியமாகும்.

இன்றைய உலகில், ஆவிக்குரிய செயல்களையே உண்மையான ஆவிக்குரிய நிலையாகத் தவறாக எண்ணுவது சாதாரணமானதாகிவிட்டது.யாராவது உரக்க ஜெபித்தாலும், நன்றாகப் பிரசங்கித்தாலும், அற்புதங்களின் மத்தியில் நடந்தாலும் தேவன் அவர்கள் நிமித்தம் மகிழ்ச்சியடைகிறார் என்று கருதுகிறோம்.

1. நியாயத்தீர்ப்பும் பிதாவின் சித்தமும்

ஆனால் மத்தேயு 7 ஆம் அதிகாரத்தில், இயேசு ஒரு கடுமையான எச்சரிக்கையைக் கொடுக்கிறார் - இதை நாம் பல நேரங்களில் கவனிக்கத் தவறிவிடுகிறோம்:

பரலோகத்திலிருக்கிற என் பிதாவின் சித்தத்தின்படிசெய்கிறவனே பரலோகராஜ்யத்தில் பிரவேசிப்பானேயல்லாமல், என்னை நோக்கி: கர்த்தாவே! கர்த்தாவே! என்று சொல்லுகிறவன் அதில் பிரவேசிப்பதில்லை. மத்தேயு 7:21

• ஒவ்வொரு மனிதனும் பிதாவின் நியாயாசனத்தின் வழியாகச் செல்ல வேண்டும். அப்போது கேட்கப்படும் கேள்வி என்னவென்றால் :நீங்கள் பிதாவின் சித்தத்தைச் செய்தீர்களா?

2. பிதாவின் சித்தம்

a)   பிதாவின் சித்தத்தைச் செய்வதற்கு பரலோக மனநிலை தேவை.

• இயேசு சிலுவையில் தம்மை சுகந்த வாசனையான பலியாக ஒப்புக்கொடுத்தார் என்பதை எபேசியர் 5:2 இல் வாசிக்கிறோம்.

• கிறிஸ்து நமக்காகத் தம்மை தேவனுக்குச் சுகந்த வாசனையான காணிக்கையாகவும் பலியாகவும் ஒப்புக்கொடுத்து நம்மில் அன்புகூர்ந்ததுபோல, நீங்களும் அன்பிலே நடந்துகொள்ளுங்கள். பிதாவின் சித்தத்தைச் செய்யவே அவர் இந்தப் பலியைச் செய்தார்என்று யோவான் 6:38 இல் வாசிக்கிறோம். என் சித்தத்தின்படியல்ல, என்னை அனுப்பினவருடைய சித்தத்தின்படி செய்யவே நான் வானத்திலிருந்திறங்கி வந்தேன்.

• எல்லாவற்றையும் விட பிதாவின் சித்தமே முக்கியமானது. இதை வேதத்தின் பல இடங்களில் இயேசு தாமே நமக்கு நடந்து காட்டியும் போதித்தும் இருக்கிறார்.

• கர்த்தருடைய ஜெபம் முதன்மையாக பிதாவின் சித்தத்தையே முக்கியமாக வலியுறுத்துகிறது. நீங்கள் ஜெபம்பண்ணவேண்டியவிதமாவது: பரமண்டலங்களிலிருக்கிற எங்கள் பிதாவே, உம்முடைய நாமம் பரிசுத்தப்படுவதாக. உம்முடைய ராஜ்யம் வருவதாக; உம்முடைய சித்தம் பரமண்டலத்திலே செய்யப்படுகிறதுபோல பூமியிலேயும் செய்யப்படுவதாக. மத்தேயு 6:9-10

• தேவன் நம் ஒவ்வொருவருக்கும் பரலோகத்தில் ஏற்கனவே ஒரு தனித்துவமான திட்டத்தை எழுதி வைத்திருக்கிறார். பூமியில் நமது பங்கு அந்தத் திட்டத்தைக் கண்டுபிடித்து அதன்படி நடப்பதாகும். நாம் உண்மையாகவே தேவனின் சிந்தையைத் தேடி, பரலோகத்தை மையமாகக் கொண்ட இருதயத்துடன் வாழாவிட்டால் நம்மால் உண்மையாக பிதாவின் சித்தத்தை நிறைவேற்ற முடியாது.

• நாம் பூமியில் வாழ்ந்தாலும், பிதாவின் பரலோக நோக்கங்களை நம்மால் இன்னும் நிறைவேற்ற முடியும். அவருடைய சித்தத்தைத் தேடுவதற்கும், அவருடைய சித்தத்திற்கு தினமும் கீழ்ப்படிவதற்கும் ஒரு தீர்மானமான மனநிலை தேவை.

b)   ஆவியானவர் பிதாவின் சித்தத்தைச் செயல்படுத்துகிறார்

பின்னும் நான் சொல்லுகிறதென்னவென்றால், ஆவிக்கேற்றபடி நடந்துகொள்ளுங்கள், அப்பொழுது மாம்ச இச்சையை நிறைவேற்றாதிருப்பீர்கள். மாம்சம் ஆவிக்கு விரோதமாகவும், ஆவி மாம்சத்துக்கு விரோதமாகவும் இச்சிக்கிறது; நீங்கள் செய்யவேண்டுமென்றிருக்கிறவைகளைச் செய்யாதபடிக்கு, இவைகள் ஒன்றுக்கொன்று விரோதமாயிருக்கிறது. ஆவியினால் நடத்தப்படுவீர்களானால், நீங்கள் நியாயப்பிரமாணத்திற்குக் கீழ்ப்பட்டவர்களல்ல. கலாத்தியர் 5:16-18

• ஆவியில் நடப்பதன் மூலம் நாம் பிதாவின் சித்தத்தை நிறைவேற்றுகிறோம். பரிசுத்த ஆவியானவர் தாமே தேவன் நம்மை வாழ அழைத்த வாழ்க்கைக்குள் நம்மை வழிநடத்துகிறார். தேவனுடைய ஆவி உங்களில் வாசமாயிருந்தால், நீங்கள் மாம்சத்துக்குட்பட்டவர்களாயிராமல் ஆவிக்குட்பட்டவர்களாயிருப்பீர்கள். கிறிஸ்துவின் ஆவியில்லாதவன் அவருடையவனல்ல. ரோமர் 8:9

• ஆவியால் நடத்தப்படும் மனம் எப்போதும் தேவனுடைய விருப்பங்களைத் தேடுகிறது - அது தேவன் மீதான அன்பிலிருந்து தோன்றுகிறது (ரோமர் 5:5), உதாரணத்திற்கு, அது ஏழைகளுக்கு உதவி செய்வதாக இருக்கலாம், வார்த்தையைத் தியானிப்பதாக இருக்கலாம், ஜெபிப்பதாக இருக்கலாம் அல்லது தேவனுக்கு நன்றி செலுத்துவதாக இருக்கலாம். நாம் உலகத்தில் வாழ்ந்தாலும், தேவன் நம்மை செய்யச் சொல்லும் காரியங்களை நினைத்து செயல்படுவோம். பல நேரங்களில், தேவன் நமக்கு சில கெட்ட காரியங்களையும், தீய காரியங்களையும் காட்டுவார். அது தேவனின் இருதயத்தை நமக்குள் உருவாக்கி, ஜெபிக்க வேண்டிய பாரத்தையும், உதவுவதற்குத் தேவையான பாரத்தையும் கொண்டுவருவதற்காகத் தான். சோதோம் மற்றும் கொமோராவுக்காக ஆபிரகாம் செய்த ஜெபம் (ஆதியாகமம் 18) இதற்கொரு சிறந்த உதாரணம்.

• பிதாவின் சித்தத்தைச் செய்வது என்பது ஒரு முறை எடுக்கப்படும் முடிவு அல்ல - அது தினமும் தேவனுக்காக வாழும் வாழ்க்கை. அது அன்றாட கீழ்ப்படிதல். தினமும் சிலுவையை எடுத்துக்கொண்டு அவருடைய சமூகத்தில் வைத்து, "பிதாவே, இன்று நான் என்னை ஒப்புக்கொடுக்கிறேன், உமது சித்தத்தைச் செய்யும்படி என்னை நடத்தும்" என்று கூறுவதாகும். ஒவ்வொரு நாளும் சவால்களைக் கொண்டிருக்கும், ஆனால் உங்களை அழைத்தவர் உங்களை வழிநடத்துவார். ஆவியின் கிரியைகள் செயல்படும்போது நீங்கள் இதை உணர்வீர்கள்.

• பல கிறிஸ்தவர்கள் தேவாலயத்திற்குச் செல்வதையும் ஜெபக் கூட்டங்களில் கலந்துகொள்வதையும் தேவனின் சித்தத்தைச் செய்கிற செயலாக தவறாக எண்ணுகிறார்கள். இவை நல்ல செயல்களாக இருக்கலாம், ஆனால் அவை பகுதியளவு கீழ்ப்படிதல் மட்டுமே - தேவனுடைய சித்தத்தின் முழுமை அல்ல. இந்த மேலோட்டமான மனநிலைக்கு எதிராக இயேசு எச்சரிக்கிறார்.

• நியாயத்தீர்ப்பு நாளில், சிலர் நம்பிக்கையுடன் இவ்வாறு கூறுவார்கள், அந்நாளில் அநேகர் என்னை நோக்கி: கர்த்தாவே! கர்த்தாவே! உமது நாமத்தினாலே தீர்க்கதரிசனம் உரைத்தோம் அல்லவா? உமது நாமத்தினாலே பிசாசுகளைத் துரத்தினோம் அல்லவா? உமது நாமத்தினாலே அநேக அற்புதங்களைச் செய்தோம் அல்லவா? என்பார்கள். மத்தேயு 7:22

• ஆனால் தேவனின் பதில் நேரடியாக இருக்கும்: அப்பொழுது, நான் ஒருக்காலும் உங்களை அறியவில்லை; அக்கிரமச் செய்கைக்காரரே, என்னைவிட்டு அகன்றுபோங்கள் என்று அவர்களுக்குச் சொல்லுவேன். மத்தேயு 7:23

3. கீழ்ப்படிதல் — தேவனுடைய சித்தத்தைச் செய்வதற்கான அடித்தளம்

ஆகையால், நான் சொல்லிய இந்த வார்த்தைகளைக் கேட்டு, இவைகளின்படி செய்கிறவன் எவனோ, அவனைக் கன்மலையின்மேல் தன் வீட்டைக் கட்டின புத்தியுள்ள மனுஷனுக்கு ஒப்பிடுவேன். மத்தேயு 7:24

அல்லாமலும், நீங்கள் உங்களை வஞ்சியாதபடிக்குத் திருவசனத்தைக் கேட்கிறவர்களாய் மாத்திரமல்ல அதின்படி செய்கிறவர்களாயும் இருங்கள். என்னத்தினாலெனில், ஒருவன் திருவசனத்தைக்கேட்டும் அதின்படி செய்யாதவனானால், கண்ணாடியிலே தன் சுபாவமுகத்தைப் பார்க்கிற மனுஷனுக்கு ஒப்பாயிருப்பான். அவன் தன்னைத்தானே பார்த்து, அவ்விடம்விட்டுப் போனவுடனே, தன் சாயல் இன்னதென்பதை மறந்துவிடுவான். சுயாதீனப்பிரமாணமாகிய பூரணப்பிரமாணத்தை உற்றுப்பார்த்து, அதிலே நிலைத்திருக்கிறவனே கேட்கிறதை மறக்கிறவனாயிராமல், அதற்கேற்ற கிரியை செய்கிறவனாயிருந்து, தன் செய்கையில் பாக்கியவானாயிருப்பான். யாக்கோபு 1:22-25

• பிதாவின் சித்தத்தைச் செய்வதற்குக் கீழ்ப்படிதல்தான் மிக முக்கியமான திறவுகோல். அவருடைய வசனத்திற்குக் கீழ்ப்படியாமல் வெறுமனே கேட்பதும் கூட அவருடைய நியாயத்தீர்ப்பைக் கொண்டுவருகிறது.

• “கர்த்தாவே, கர்த்தாவே” என்று சொல்வது கீழ்ப்படிதலுக்கு மாற்றாகாது, மதச்சார்பான செயல்பாடுகளோ, சடங்குகளோ தேவனுக்கு ஒப்புக்கொடுக்கப்பட்ட வாழ்க்கைக்குப் பதிலாக இருக்க முடியாது.

• சுவிசேஷம் அறிவித்தல், பிசாசுகளை விரட்டுதல் அல்லது அற்புதங்களைச் செய்தல் ஆகியவை உண்மையான ஆவிக்குரிய செயல்களாக இருந்தாலும், அவை இரட்சிப்பை உறுதி செய்வதில்லை. யூதாஸ் கூட இதுபோன்ற செயல்களில் பங்கேற்றிருக்கலாம், ஆனாலும் அவர் உண்மையான விசுவாசி அல்ல. கடைசி நாட்களில், அநேகரை வஞ்சிக்கும்படி சாத்தான் பொய்யான அற்புதங்களைப் பயன்படுத்துவான் (2 தெசலோனிக்கேயர் 2:7–12).

• தம்முடைய வார்த்தையைக் கேட்டு அதன்படி செய்வதற்கு தேவன் நம்மை அழைக்கிறார் (யாக்கோபு 1:22–25). படிப்பதும் கேட்பதும் முதல் படி மட்டுமே; உண்மையான கேட்டல் செயல்பாட்டுக்கு வழிவகுக்க வேண்டும்.

• நாம் கேட்டு, கீழ்ப்படியாமல் இருந்தால், நம்மை நாமே ஏமாற்றிக் கொள்கிறோம். அடுத்த படி எப்போதும் தேவன் கட்டளையிடுவதைச் செய்வது.

• இயேசுவின் உவமையில், வலிமையான வாழ்க்கைக்கு அடித்தளம் தேவனுடைய வார்த்தைக்குக் கட்டுப்படுவதே - இது உண்மையான விசுவாசத்தைக் காட்டுகிறது. (யாக்கோபு 2:14).

• உண்மையான கீழ்ப்படிதல் கிரியைகளை உருவாக்குகிறது — அவை நமது வாழ்க்கையில் பிதாவின் சித்தத்தை நிறைவேற்றும் செயல்கள்.

இந்தக் கீழ்ப்படிதலின் ஆவியை எப்படிப் பெற்றுக்கொள்வீர்கள்?

நீங்கள் என்னிடத்தில் அன்பாயிருந்தால் என் கற்பனைகளைக் கைக்கொள்ளுங்கள். யோவான் 14:15

இயேசு அவனுக்குப் பிரதியுத்தரமாக: ஒருவன் என்னில் அன்பாயிருந்தால் அவன் என் வசனத்தைக் கைக்கொள்ளுவான், அவனில் என் பிதா அன்பாயிருப்பார்; நாங்கள் அவனிடத்தில் வந்து அவனோடே வாசம்பண்ணுவோம். யோவான் 14:23

• ஆண்டவரே, நீர் உலகத்துக்கு உம்மை வெளிப்படுத்தாமல் எங்களுக்கு உம்மை வெளிப்படுத்தப்போகிற காரணமென்ன என்று யூதா கேட்கிறார்.

• தேவனுடைய பிள்ளைகளாகிய நாம் அவருக்குக் கீழ்ப்படிந்து வாழ  வேண்டும். யோவான் 14 ஆம் அதிகாரம், பரிசுத்த ஆவியின் கிரியைகளைப் பற்றிப் பேசுகிறது. நாம் ஒரு பாத்திரமாக இருக்கிறோம், நாம் உலகில் இருக்கும்போது அவர் தமது கிரியைகளைச் செய்ய நம்மைப் பயன்படுத்துகிறார்.

• ஒரு கண்ணாடி தம்ளரை நினைத்துப் பாருங்கள்.

  • ஒரு நாள் அதை சோடா குடிக்க பயன்படுத்துகிறீர்கள்.

  • அதே தம்ளரை தண்ணீர் குடிக்கவும் பயன்படுத்துகிறீர்கள்.

  • மருந்தை கலக்கவும் இதையே பயன்படுத்துகிறீர்கள்.

  • அந்த தம்ளர் நீங்கள் விரும்பும் எல்லாவற்றுக்கும் தன்னை ஒப்புக்கொடுக்கிறது; சோடா என்னை இருண்டதாகக் காட்டுகிறது  என்று எதிர்ப்பதில்லை, நான் காலியாக, நிர்வாணமாக இருக்கிறேன், எனவே தண்ணீர் ஊற்றாதே என்று தடுப்பதும் இல்லை.

• அதேபோல், பூமியில் அவருடைய கிரியைகளைச் செய்ய நாம் தேவனின் ஒரு பாத்திரமாக இருக்கிறோம். இதற்குக் கீழ்ப்படிதல் மிக முக்கியமானது. பரிசுத்த ஆவியானவர் தேவனுடைய வார்த்தையின் மூலம் நம்மை கீழ்ப்படிவதற்குத் தூண்டுகிறார்.

• கீழ்ப்படிதலின் ஓட்டம் இப்படிச் செயல்படுகிறது: பரிசுத்த ஆவியானவர் -> சத்திய வார்த்தையை வெளிப்படுத்துகிறார் -> தேவனுடைய சித்தத்தையும் அவர் நம்மை அழைக்கும் புதிய காரியங்களையும் காட்டுகிறார் -> நாம் கீழ்ப்படிகிறோம் -> தேவனின் பணி நம் மூலம் நிறைவேற்றப்படுகிறது -> தேவனின் மகிமை நமது சரணடைதல் மூலமும் ஆவியின் செயலாலும் வெளிப்படுகிறது.

நாம் கீழ்ப்படிதலின் ஆவியைப் பெற தேவன் எவ்வாறு இந்த ஓட்டத்தைப் பயன்படுத்துகிறார் என்பதைப் பற்றிய விரிவான விளக்கத்தைப் பார்ப்போம்.

1. பரிசுத்த ஆவியானவர் → சத்திய வார்த்தை

• என் நாமத்தினாலே பிதா அனுப்பப்போகிற பரிசுத்த ஆவியாகிய தேற்றரவாளனே எல்லாவற்றையும் உங்களுக்குப் போதித்து, நான் உங்களுக்குச் சொன்ன எல்லாவற்றையும் உங்களுக்கு நினைப்பூட்டுவார். யோவான் 14:26

• பரிசுத்த ஆவியானவர் கிறிஸ்துவின் வார்த்தையை வெளிச்சமிட்டுக் காட்டுகிறார்; அதனால் அவை வெறும் எழுத்துக்களாக இல்லாமல், ஜீவனுள்ள சத்தியமாக மாறுகிறது.

2. வசனம் → தேவனின் சித்தத்தைக் காட்டுகிறது

• சத்திய ஆவியாகிய அவர் வரும்போது, சகல சத்தியத்திற்குள்ளும் உங்களை நடத்துவார்; அவர் தம்முடைய சுயமாய்ப் பேசாமல், தாம் கேள்விப்பட்டவைகள் யாவையுஞ்சொல்லி, வரப்போகிற காரியங்களை உங்களுக்கு அறிவிப்பார். யோவான் 16:13

• ஆவியானவர் வெறுமனே அறிவிப்பதில்லை; அவர் உணர்த்தி வழிநடத்துகிறார்.

• இது தேவனுக்காக செய்ய வேண்டிய புதிய விஷயங்களை நமக்கு உணர்த்துகிறது - தினமும் புதிதாய் கீழ்ப்படியத் தூண்டுகிறது.

3. உணர்தல் → கீழ்ப்படிதல்

• அல்லாமலும், நீங்கள் உங்களை வஞ்சியாதபடிக்குத் திருவசனத்தைக் கேட்கிறவர்களாய் மாத்திரமல்ல அதின்படி செய்கிறவர்களாயும் இருங்கள். யாக்கோபு 1:22

• பரிசுத்த ஆவியானவரின் குரல் வெறும் அறிவிற்காக அல்லாமல் எப்போதும் செயல்படத் தூண்டுகிறது.

4. கீழ்ப்படிதல் → தேவனுடைய கிரியைகள் நிறைவேறுதல்

• ஏனெனில் தேவனே தம்முடைய தயவுள்ள சித்தத்தின்படி விருப்பத்தையும் செய்கையையும் உங்களில் உண்டாக்குகிறவராயிருக்கிறார். பிலிப்பியர் 2:13

• நாம் விட்டுக்கொடுக்கும்போது, நம் மூலம் தேவனின் செயல்கள் நிறைவேற்றப்படுகின்றன.

5. கிரியைகள் → தேவனின் மகிமையை வெளிப்படுத்துகின்றன

• நீங்கள் மிகுந்த கனிகளைக் கொடுப்பதினால் என் பிதா மகிமைப்படுவார், எனக்கும் சீஷராயிருப்பீர்கள். யோவான் 15:8

• இவ்விதமாய், மனுஷர் உங்கள் நற்கிரியைகளைக் கண்டு, பரலோகத்திலிருக்கிற உங்கள் பிதாவை மகிமைப்படுத்தும்படி, உங்கள் வெளிச்சம் அவர்கள் முன்பாகப் பிரகாசிக்கக்கடவது. மத்தேயு 5:16

• அன்போடு கீழ்ப்படிவது தேவனுக்கு வெளிப்படையான மகிமையைக் கொண்டுவருகிறது.

• அன்பு → கீழ்ப்படிதல் → பிதா மற்றும் குமாரனின் உள்ளார்ந்த பிரசன்னம் → ஆவியின் கிரியைகள் → கனி → மகிமை.

• இந்தக் கீழ்ப்படிதல் மனப்பான்மை பக்கவிளைவுகளையும் / நன்மைகளையும் கொண்டுள்ளது.

• இது பாடுகளை சகித்துக் கொள்கிறது — அந்தப் பாடுகளைப் பாதையில் உள்ள சந்தோஷமாகக் காணுகிறது.

• சத்தியத்தால் நடத்தப்படுவதால் சரியான வழியில் நடத்தத் திருத்துகிறது.

• சத்தியத்தின் ஆவியால் வழிநடத்தப்படுவதால் பாவத்திலிருந்து விலகி நிற்கிறது.

• பாவத்தைக் கண்டால், உடல் மற்றும் ஆத்துமா தூய்மையாக இருக்க, அப்பாவத்தை கழுவுவதற்கு பிதாவை வேண்டிக் கொள்ள விரும்புகிறது.

• மேலும் பலவற்றைச் செய்ய பலப்படுத்துகிறது / உற்சாகப்படுத்துகிறது.

• மேலும் அதிகமாகச் செய்ய கிறிஸ்துவின் வைராக்கியத்தை அளிக்கிறது; சுயத்தை வெறுக்கச் செய்கிறது.

• கிறிஸ்துவில் சமாதானத்தையும் இளைப்பாறுதலையும் கொண்டு வருகிறது.

• ஆவியின் கனிகளை உற்பத்தி செய்கிறது.

• தேவனுடனான ஐக்கியத்தில் அதிக நேரம் செலவிட உதவுகிறது.

• இந்த மனிதரை தேவனுடைய சாட்சியாக மாற்றுகிறது.

இறுதிச் சுருக்கம்

தேவனின் சித்தத்தைச் செய்வது சத்தம், புகழ் அல்லது செயல்களில் இல்லை — அது கீழ்ப்படிதலில் உள்ளது.

"பிதாவே, என் சித்தமல்ல, உம்முடைய சித்தமே" என்ற அமைதியான, அன்றாட ஒப்புக்கொடுத்தல்தான் அது.

பிதாவின் சித்தம் பரலோகத்தில் தொடங்கி, பரிசுத்த ஆவியானவரால் அவருடைய வார்த்தையின் மூலம் வெளிப்படுத்தப்படுகிறது, மேலும் அன்போடும் கீழ்ப்படிதலோடும் நாம் நடக்கும் போது அது பூமியில் நிறைவேற்றப்படுகிறது. இதுவே இயேசு "பாறை" என்று அழைத்த அடித்தளம். இதுவே நியாயத்தீர்ப்பு நாளில் நிலைத்திருக்கும்.

நமது வாழ்க்கை வெறும் ஆவிக்குரிய செயல்களால் நிரப்பப்படாமல், உண்மையான ஆவிக்குரிய கீழ்ப்படிதலால் நிரப்பப்படட்டும். நமது செயல்கள் தேவனுக்காக மட்டும் அல்ல, உண்மையாகவே தேவனிடமிருந்து உண்டானவையாக இருக்கட்டும்.

நாம் தேவனுக்கு முன்பாக நிற்கும்போது, தேவனுடைய ஒவ்வொரு பிள்ளையும் ஏங்கிக் கேட்க விரும்பும், “நல்லது, உண்மையும் உத்தமுமான ஊழியக்காரனே” என்ற வார்த்தைகளை நாம் கேட்கக் கூடியவர்களாக இருப்போமாக.

“பிதாவே, நான் ஆவிக்குரியவைகளாகத் தோன்றும் பல காரியங்களைச் செய்து கொண்டிருக்கலாம், ஆனால் நீங்கள் உண்மையிலேயே விரும்புவது இதுதானா? நான் என்னை முழுமையாக உம்மிடம் ஒப்புக்கொடுக்கிறேன். பிதாவே, உமது சித்தத்தை நிறைவேற்ற என்னை வழிநடத்துங்கள்” என்று தேவனிடம் ஜெபத்தில் மனதாரக் கேளுங்கள்.