திருமணம் — தேவனின் வழிகாட்டுதல்

இன்றைய காலகட்டத்தில் திருமணங்கள் நடைபெறும் விதம், நம் பெற்றோரும் தாத்தா பாட்டிகளும் கற்பனை செய்துகூடப் பார்க்க முடியாத அளவிற்கு மாறியுள்ளது. சிலர் முடிவெடுப்பதற்கு முன் டேட்டிங் செயலிகளைப் (dating apps) பயன்படுத்துவதையும், சேர்ந்து வாழ்வதையும் (living together) விரும்புகிறார்கள். சிலர் வரன்களைத் தேர்வு செய்யவும், இரவு உணவுச் சந்திப்புகளை ஏற்பாடு செய்யவும் பெற்றோர்களை சார்ந்திருக்கிறார்கள். சிலர் இன்னும் பாரம்பரிய வழியையேப் பின்பற்றுகிறார்கள் — காதலித்து, குடும்பத்தினரைச் சம்மதிக்க வைத்து,எல்லாமே நல்லபடியாக நடக்கும் என்ற நம்பிக்கையோடு காத்திருக்கிறார்கள். "இதுதான் சரியான வழி" என்று சொல்லக்கூடிய ஒரே சூத்திரம் எதுவுமில்லை. ஒரு திருமணத்தில் சமாதானம் நிலவினால், அது வெற்றி பெறுகிறது. மாறாக, சில வாரங்களிலோ மாதங்களிலோ அது ஒரு போர்க்களமாக மாறினால், அதன் விளைவுகளை நாம் பார்க்க முடியும் — பல வருடங்கள் ஒருவரை ஒருவர் அறிந்திருந்தும் கூட குடும்பங்கள் பிரிந்து போகின்றன.

இது இந்தியாவில் நாம் இதுவரை கண்டிராத வேகத்தில் நம்மைச் சுற்றிலும் நடந்து கொண்டிருக்கிறது. விவாகரத்து விகிதங்கள் அதிகரித்துக் கொண்டே போகின்றன. பல வருடங்களாகக் காதலித்த தம்பதிகள் கூட, திருமணத்திற்குப் பிறகு தாம் சிறிதும் எதிர்பார்க்காத விஷயங்களைக் கண்டறிகிறார்கள். திருமண உறவைத் தாண்டி வெளியே தேடுவதற்கும், துரோகம் செய்வதற்கும், வழிதவறிச் செல்வதற்கும் உள்ள தூண்டுதல் குடும்பங்களைச் சிதைத்துக் கொண்டிருக்கிறது. "இது சரியாக வரவில்லை என்றால், விலகிப் போய் உனக்குப் பிடித்ததைச் செய், உனக்கு ஏற்ற வேறு ஒருவரைக் கண்டுபிடித்துக்கொள்" என்ற மேலைநாட்டு கலாச்சார பாணியை நாம் மெதுவாக இயல்பான ஒன்றாக மாற்றி வருகிறோம். ஆனால், திருமணத்தைக் குறித்த தேவனின் திட்டம் ஒருபோதும் அப்படிப்பட்டது அல்ல என்பதை நாம் நினைவில் கொள்ள வேண்டும்.

இதன் ஆணிவேராக இருப்பது ஒரே ஒரு விஷயம்தான்: நாம் தேவனின் சித்தத்திற்குப் பணியாமல், நமது சுய விருப்பங்களின்படி வாழத் தொடங்குகிறோம். வேதம் இதை 'அனுமதிக்கும் சித்தம்' (Permissive Will) என்று அழைக்கிறது — மனிதன் ஒன்றுக்கு ஆசைப்படுகிறான், அது பெரும்பாலும் தேவனின் திட்டத்திற்கு எதிராகவே இருக்கிறது. தேவன் வேறொன்றை விரும்புகிறார், ஆனால் மனிதன் குறுகிய கால நன்மைகளிலேயே குறியாக இருப்பதால், அதை அவனால் பார்க்க முடிவதில்லை. மனிதன் தேவன் வகுத்த திட்டத்திற்குக் கீழ்ப்படியாவிட்டால், தேவன் அவனை வற்புறுத்தப் போவதில்லை. அது தேவனுக்கு உகந்ததாக இல்லாவிட்டாலும், மனிதன் தன் சொந்த வழியிலேயே செல்ல அவர் அனுமதிக்கிறார். தேவன் மனிதனின் பாவமான தேர்வுகளை ஏற்றுக்கொள்வதில்லை; எனினும் அவற்றை அனுமதிக்கவே செய்கிறார். இருப்பினும், அவர் அவற்றைக் கட்டுப்படுத்தி, மேற்பார்வையிட்டு, தமது நோக்கங்களுக்காகப் பயன்படுத்துகிறார். நாம் நமது சொந்த வழியிலே செல்வதில் பிடிவாதமாக இருக்கும்போது, தேவன் பின்வாங்குகிறார்: இதினிமித்தம் அவர்கள் தங்கள் இருதயத்திலுள்ள இச்சைகளினாலே ஒருவரோடொருவர் தங்கள் சரீரங்களை அவமானப்படுத்தத்தக்கதாக, தேவன் அவர்களை அசுத்தத்திற்கு ஒப்புக்கொடுத்தார். [ரோமர் 1:24]

இதனால் பல குடும்பங்கள் அவதிப்படுகின்றன. அமைதியோ, ஒற்றுமையோ இன்றி, சண்டையும் பிரிவினையுமே எஞ்சுகின்றன. அப்படியானால், நம் வாழ்வின் மிக முக்கியமான முடிவாகக் கருதப்படும் இந்த வாழ்க்கை முடிவை நாம் எப்படி எடுப்பது? இந்த நபரை விட்டுவிட்டு அந்த நபரைத் தேர்ந்தெடுத்தால் இந்தத் திருமணம் நிச்சயமாக வெற்றியாகும் என்று கணித்துச் சொல்வதற்கு யாரிடமும் மாயக் கண்ணாடி எதுவுமில்லை. இந்த ஒரே ஒரு முடிவு உங்கள் வாழ்க்கையை மட்டுமல்ல, உங்களுக்குப் பின் வரும் தலைமுறைகளையும் சேர்த்தே தீர்மானிக்கும். இதற்கான தீர்வை வேதாகம வழியில் காண, ஆபிரகாம் தனது மகன் ஈசாக்கிற்கு எப்படி மணப்பெண்ணைத் தேடினார் என்பதை நாம் பார்க்க வேண்டும். ஆதியாகமம் 24 ஆம் அதிகாரத்தை வாசிக்கும்போது, ஈசாக்கு-ரெபெக்காள் திருமணத்திலிருந்து நாம் கற்றுக்கொள்ள வேண்டிய பல பாடங்களைக் காணலாம். ஆபிரகாம் அதை எப்படிச் செய்தார் என்பதிலிருந்து ஆறு நடைமுறைப் பாடங்களையும், இன்று வாழ்க்கைத்துணையைத் தேடுபவர்களுக்கான ஒரு நடைமுறை வழிகாட்டியையும் அது நமக்கு வழங்குகிறது.

1. செல்வத்தைச் சார்ந்திராமல் தேவனைச் சார்ந்திருத்தல்

ஆபிரகாம் ஐசுவரியவானாக இருந்தார். ஆடு மாடுகள், வேலைக்காரர்கள், வெள்ளி, தங்கம், ஒட்டகங்கள் மற்றும் கழுதைகள் என தேவன் அவரை எல்லா வழிகளிலும் ஆசீர்வதித்திருந்தார். பரிசுத்த வேதாகமம் இதைத் தெளிவாகக் கூறுகிறது:

[ஆதியாகமம் 24:1]  ஆபிரகாம் வயதுசென்று முதிர்ந்தவனானான். கர்த்தர் ஆபிரகாமைச் சகல காரியங்களிலும் ஆசீர்வதித்து வந்தார்

[ஆதியாகமம் 24:35]  கர்த்தர் என் எஜமானை மிகவும் ஆசீர்வதித்திருக்கிறார், அவர் சீமானாயிருக்கிறார்; கர்த்தர் அவருக்கு ஆடுமாடுகளையும், வெள்ளியையும், பொன்னையும், வேலைக்காரரையும், வேலைக்காரிகளையும், ஒட்டகங்களையும், கழுதைகளையும் கொடுத்திருக்கிறார்

• இவ்வளவு செல்வங்கள் இருந்தபோதிலும், ஈசாக்குக்கு மணப்பெண் தேட ஆபிரகாம் தன் செல்வத்தை நம்பியிருக்கவில்லை. அவர் தனது செல்வாக்கையோ, அந்தஸ்தையோ அல்லது பணத்தையோ பயன்படுத்தவில்லை.

• தன்னிடமிருந்த வசதிகளைப் பயன்படுத்துவதை விட, தேவனின் வாக்குத்தத்தத்தைக் கனப்படுத்துவதிலேயே அவர் கவனம் இருந்தது.

• இன்று நாம் குடும்பப் பெயர், சம்பளம், சமூக அந்தஸ்து அல்லது தோற்றம் ஆகியவற்றையே நம்பியிருக்கிறோம்.

• ஆபிரகாம் தேவனின் உடன்படிக்கை வாக்குறுதிக்கே முதலிடம் கொடுத்தார் — அதுவே எல்லா மாற்றங்களையும் ஏற்படுத்தியது.

பாடம் 1

• செல்வம் வசதிகளைத் தரும், ஆனால் அது ஒரு தெய்வீகமான திருமண வாழ்க்கைக்கு உத்தரவாதம் அளிக்க முடியாது.

• உங்கள் சொந்த வளங்களை நம்பாமல், தேவனின் வழிநடத்துதலை நம்பியிருங்கள்.

2. தேவனின் சித்தத்திற்குக் கீழ்ப்படிதல்

அனுமதிக்கும் சித்தம் குறித்து பேசினோம் — மனிதன் தேவனின் திட்டத்திற்கு மாறாக ஒரு காரியத்தை விரும்புகிறான். தேவனோ வேறு ஒன்றை — மேன்மையான ஒன்றை விரும்புகிறார்; ஆனால் அதை நாம் புரிந்துகொள்ளத் தவறுகிறோம். நாம் தேவனின் உடன்படிக்கைக்கு முதலிடம் கொடுக்கும்போது, வாழ்க்கைத்துணையிடம் நாம் எதிர்பார்க்கும் அனைத்து நற்பண்புகளும் தேவனின் சித்தத்தோடு ஒத்துப்போகும்.

ஒரு நிபந்தனை: ஆபிரகாமிடம் நாம் இதைக் காண்கிறோம் — மணப்பெண் கானானியப் பெண்ணாக இருக்கக்கூடாது என்பதில் அவர் மிக உறுதியாக இருந்தார்.

[ஆதியாகமம் 24:3–4]  நான் குடியிருக்கிற கானானியருடைய குமாரத்திகளில் நீ என் குமாரனுக்குப் பெண்கொள்ளாமல்; நீ என் தேசத்துக்கும் என் இனத்தாரிடத்துக்கும் போய், என் குமாரனாகிய ஈசாக்குக்குப் பெண்கொள்வேன் என்று, வானத்துக்குத் தேவனும் பூமிக்குத் தேவனுமாகிய கர்த்தர் பேரில் எனக்கு ஆணையிட்டுக்கொடுக்கும்படிக்கு, நீ உன் கையை என் தொடையின்கீழ் வை என்றான்

• இந்த நிபந்தனையைக் காத்துக்கொள்ள அவர் எந்த எல்லை வரை செல்கிறார் என்பதைப் பாருங்கள் — தனது ஊழியக்காரன் வேறொருவர் மீதும் அல்லாமல், தேவன் பெயரிலேயே ஆணையிட வேண்டும் என்று அவர் விரும்பினார். இது அந்த நிபந்தனையின் தீவிரத்தைக் காட்டுகிறது — தனது ஊழியக்காரன் இதைக் கண்டிப்பாகப் பின்பற்றுவான் என்று அவர் உறுதியாக நம்பினார்.

• அவர் ஏன் இவ்வளவு உறுதியாக இருந்தார்? ஏனெனில் கானானியர்கள் விக்கிரக ஆராதனை (பாகால், அஸ்தரோத்), ஒழுக்கக்கேடானமதச் சடங்குகள் மற்றும் ஆழமான சீர்கேடான வாழ்க்கைக்குப் பெயர் பெற்றவர்கள்; அதனாலேயே பின்நாட்களில் தேவன்  நியாயந்தீர்த்தார்.

• சோதோம் மற்றும் கொமோரா நகரத்து மக்கள் கானானிய மக்களோடு தொடர்புடையவர்கள். வேதாகமமும் இதை உறுதிப்படுத்துகிறது: நாலாம் தலைமுறையிலே அவர்கள் இவ்விடத்துக்குத் திரும்ப வருவார்கள்; ஏனென்றால் எமோரியருடைய அக்கிரமம் இன்னும் நிறைவாகவில்லை என்றார். [ஆதியாகமம் 15:16]

• ஈசாக்கு இந்தக் கலாச்சாரத்தில் திருமணம் செய்துகொண்டால், உடன்படிக்கையின் வாக்குறுதி ஆபத்துக்குள்ளாகும் என்பதை ஆபிரகாம் அறிந்திருந்தார். எனவேதான், ஈசாக்கின் வழியாக உடன்படிக்கையின் சந்ததியைப் பாதுகாப்பதற்காக, தனது சொந்த உறவினர்களிலிருந்தே மணப்பெண் அமைய வேண்டும் என்பதில் அவர் உறுதியாக இருந்தார்; ஏனெனில் தேவன் வாக்குறுதி அளித்திருந்தார்: அப்பொழுது தேவன்: உன் மனைவியாகிய சாராள் நிச்சயமாய் உனக்கு ஒரு குமாரனைப் பெறுவாள், அவனுக்கு ஈசாக்கு என்று பேரிடுவாயாக; என் உடன்படிக்கையை அவனுக்கும் அவனுக்குப் பின்வரும் அவன் சந்ததிக்கும் நித்திய உடன்படிக்கையாக ஸ்தாபிப்பேன். [ஆதியாகமம் 17:19]

• நீங்கள் யாரைத் திருமணம் செய்துகொள்கிறீர்கள் என்பது உங்கள் குடும்பத்தின் ஆவிக்குரியப் பாதையைத் தலைமுறைகளுக்கு வடிவமைக்கும். ஆபிரகாம் இதை உணர்ந்திருந்தார்; அதனால்தான் தேவனின் சித்தத்தில் சமரசம் செய்ய மறுத்துவிட்டார்.

• தேவனின் பெயரால் ஆணையிட வேண்டும் என்ற நிபந்தனையோடு அவர் இதை ஒப்படைத்தபோது, சராசரி மனிதர்கள் விழக்கூடிய ‘அனுமதிக்கும் சித்தத்திற்குள்’ அந்த ஊழியக்காரன் விழுந்துவிடாதபடி தேவன் அவனைப் பாதுகாத்தார்.

• சற்று நிதானித்து யோசித்துப் பார்த்தால், ஆபிரகாம் தன் ஊழியக்காரனிடம் செய்யச் சொன்ன காரியமானது — ஒரு குறிப்பிட்ட நிபந்தனையோடு, வைக்கோல் போருக்குள் ஊசியைத் தேடுவதற்குச் சமமானது! அதை ஆபிரகாம் தானாகச் செய்யவில்லை — தேவன் தம்முடைய ஆவியை அனுப்பி அவனை வழிநடத்துவார் என்பதை அறிந்து, தன் ஊழியக்காரனை முழுமையாக நம்பினார். ஆபிரகாமுக்கு எவ்வளவு பெரிய விசுவாசம் இருந்தது! நாம் அனைவரும் இதுபோன்ற விசுவாசத்திற்காக ஜெபிக்க வேண்டும் — பெற்றோராகிய நாம் இத்தகைய விசுவாசத்தை நமக்குத் தருமாறு தேவனிடத்தில் கேட்க வேண்டும்.

பாடம் 2

• வசதிக்காகவோ, ஈர்ப்பிற்காகவோ அல்லது குடும்ப அழுத்தத்திற்காகவோ ஆவிக்குரிய ஒருமைப்பாட்டில் சமரசம் செய்து கொள்ளாதீர்கள். நீங்கள் தேர்ந்தெடுக்கும் நபரே அடுத்த தலைமுறையைத் தீர்மானிப்பார்.

• ஆபிரகாமைப் போன்ற விசுவாசம் — ஆபிரகாமுக்கு இருந்ததைப் போன்ற விசுவாசத்தை உங்களுக்கும் கொடுக்கவும், அதை அதிகரித்துத் தரவும் தேவனிடம் கேளுங்கள். நம்மிடம் இல்லாதவைகளுக்காக ஜெபியுங்கள்; அவர் கிரியை செய்வதைப் பாருங்கள்.

3. தேவனின் வழிநடத்துதலை நம்புதல்

• ஆபிரகாம் தன் ஊழியக்காரனை மட்டுமே நம்பியிருக்கவில்லை. தான் வயது முதிர்ந்தவனாக இருந்தபோதிலும், தேவன் தம்முடைய தூதனை முன்பாக அனுப்புவார் என்று விசுவாசித்து, ஜெபித்துத் தன் ஊழியக்காரனிடம் ஆணையிடும்படி செய்தார்: என்னை என் தகப்பனுடைய வீட்டிலும் என் இனத்தார் இருக்கிற தேசத்திலுமிருந்து அழைத்துவந்தவரும், உன் சந்ததிக்கு இந்த தேசத்தைத் தருவேன் என்று எனக்குச் சொல்லி ஆணையிட்டவருமான வானத்துக்குத் தேவனாகிய கர்த்தர், நீ அங்கேயிருந்து என் குமாரனுக்கு ஒரு பெண்ணைக் கொண்டுவரும்படிக்கு, தம்முடைய தூதனை உனக்கு முன்பாக அனுப்புவார். பெண் உன் பின்னே வர மனதில்லா திருந்தாளேயாகில், அப்பொழுது நீ இந்த என் ஆணைக்கு நீங்கலாயிருப்பாய்; அங்கே மாத்திரம் என் குமாரனை மறுபடியும் அழைத்துக் கொண்டு போகவேண்டாம் என்றான். அப்பொழுது அந்த ஊழியக்காரன் தன் கையைத் தன் எஜமானாகிய ஆபிரகாமுடைய தொடையின்கீழ் வைத்து, இந்தக் காரியத்தைக் குறித்து அவனுக்கு ஆணையிட்டுக் கொடுத்தான். [ஆதியாகமம் 24:7–9]

• ஆபிரகாம் தன் இனத்தை விட்டுப் புறப்பட்டபோது பெற்ற தேவனின் வாக்குறுதியை உறுதியாக விசுவாசித்தார்: கர்த்தர் ஆபிராமுக்குத் தரிசனமாகி: உன் சந்ததிக்கு இந்தத் தேசத்தைக் கொடுப்பேன் என்றார். அப்பொழுது அவன் தனக்குத் தரிசனமான கர்த்தருக்கு அங்கே ஒரு பலிபீடத்தைக் கட்டினான். [ஆதியாகமம் 12:7]

• அந்த ஊழியனும் அதே விசுவாசத்தை முன்னோக்கி எடுத்துச் சென்றான். அவன் தன் சொந்த ஞானத்தைச் சார்ந்திருக்காமல், தேவனே தன்னை வழிநடத்த வேண்டும் என்று கேட்டு, அவருடைய வழிநடத்துதலுக்காக ஜெபித்தான்: என் எஜமானாகிய ஆபிரகாமுக்கு தேவனாயிருக்கிற கர்த்தாவே, இன்றைக்கு நீர் எனக்குக் காரியம் சித்திக்கப்பண்ணி, என் எஜமானாகிய ஆபிரகாமுக்குத் தயவு செய்தருளும். இதோ, நான் இந்தத் தண்ணீர்த்துரவண்டையிலே நிற்கிறேன், இந்த ஊராருடைய பெண்கள் தண்ணீர் மொள்ளப்புறப்பட்டு வருவார்களே. நான் குடிக்க உன் குடத்தைச் சாய்க்கவேண்டும் என்று நான் சொல்லும்போது: குடி என்றும், உன் ஒட்டகங்களும் குடிக்கும்படி வார்ப்பேன் என்றும் சொல்லும் பெண் எவளோ, அவளே நீர் உம்முடைய ஊழியக்காரனாகிய ஈசாக்குக்கு நியமித்தவளா யிருக்கவும், என் எஜமானுக்கு அநுக்கிரகம் செய்தீர் என்று நான் அதினாலே அறியவும் செய்தருளும் என்றான். அவன் இப்படிச் சொல்லி முடிக்கும் முன்னே, இதோ, ஆபிரகாமுடைய சகோதரனாகிய நாகோரின் மனைவி மில்க்காளுடைய குமாரனாகிய பெத்துவேலுக்குப் பிறந்த ரெபெக்காள் குடத்தைத் தோள்மேல் வைத்துக்கொண்டு புறப்பட்டுவந்தாள். [ஆதியாகமம் 24:12–15]

• அவன் தன் வெற்றியைத் தன் சொந்த ஞானத்தில் தேடாமல், தேவனின் ஞானத்திலும் அவருடைய கிரியைகளிலும் தேடினான்.

• அவன் ஒரு குறிப்பிட்ட அடையாளத்தைக் கேட்டான். தேவனும் உடனடியாகப் பதிலளித்தார் — அவன் ஜெபித்து முடிப்பதற்கு முன்பாகவே ரெபெக்காள் அங்கே வந்தாள். நாம் தேவனின் சித்தத்தோடு ஒத்துப்போகும்போது அவர் நமக்கு அளிக்கும் பதில்கள் இப்படிப்பட்டவையாகவே இருக்கும்.

• நாம் பலவீனமாக இருக்கும்போதும், என்ன செய்வதென்று தெரியாமல் தவிக்கும்போதும், தேவனிடம் வார்த்தைகளையோ அடையாளங்களையோ கேட்பது தவறில்லை. அவர் நமது பலவீனத்தையும் இயலாமையையும் புரிந்துகொள்கிறார்; நம்மைப் பலப்படுத்துவதற்காக நமது மாம்சப் போராட்டங்களின் மூலம் அவர் நம்மை வழிநடத்துகிறார். நாம் அவருக்குக் கீழ்ப்படியும்போது, பல வழிகளில் தம்முடைய வழிகளை நமக்குத் தெரியப்படுத்த அவர் கிருபை அளிப்பார் — சிலருக்குப் பரிசுத்த ஆவியானவரின் நேரடி வார்த்தை மூலமாகவும், சிலருக்கு அடையாளங்கள் மூலமாகவும், சிலருக்கு வசனங்களின் மூலமாகவும், மற்றும் சிலருக்கு நம்பகமான மூப்பர்களின் ஆலோசனைகள் மூலமாகவும் அதை வெளிப்படுத்துவார்.

• நாம் அவருக்கு ஒப்புக்கொடுத்துச் சரணடையாமல், வாழ்க்கைத்துணையைக் குறித்த தேவனின் பரிபூரண சித்தத்தை அறிய முடியாது. தேவன் பேசிக்கொண்டே தான் இருப்பார், ஆனால் நாம் ஒப்புக்கொடுக்கும் வரை அதை நம்மால் கவனிக்கவோ கேட்கவோ முடியாது.

பாடம் 3

• உங்கள் தேடுதலை தேவனிடம் முழுமையாக ஒப்படைக்கும்போது, உங்கள் ஞானத்தால் எட்ட முடியாத இடத்திற்குப் பரிசுத்த ஆவியானவர் உங்களை வழிநடத்துவார். குறிப்பாக ஜெபியுங்கள். உங்கள் சொந்தத் திட்டங்களை விட அவருடைய வழிநடத்துதலை விசுவாசியுங்கள்.

• பலவீனமான நேரங்களில், தேவனது வழிநடத்துதலைக் கேளுங்கள் — ஆபிரகாமைப் போல உங்களை வழிநடத்துவதற்கான அடையாளங்களைக் காட்டுமாறு அவரிடம் கேளுங்கள்.

4. விசுவாசமும் பொறுமையும்

• அந்த ஊழியக்காரன் கேட்டபடியே ரெபெக்காள் துல்லியமாகச் செய்தாள் — அவனுக்கும் அவனுடைய அனைத்து ஒட்டகங்களுக்கும் தண்ணீர் இறைத்துக் கொடுத்தாள்: என் எஜமானாகிய ஆபிரகாமுக்கு தேவனாயிருக்கிற கர்த்தாவே, இன்றைக்கு நீர் எனக்குக் காரியம் சித்திக்கப்பண்ணி, என் எஜமானாகிய ஆபிரகாமுக்குத் தயவு செய்தருளும். இதோ, நான் இந்தத் தண்ணீர்த்துரவண்டையிலே நிற்கிறேன், இந்த ஊராருடைய பெண்கள் தண்ணீர் மொள்ளப்புறப்பட்டு வருவார்களே. நான் குடிக்க உன் குடத்தைச் சாய்க்கவேண்டும் என்று நான் சொல்லும்போது: குடி என்றும், உன் ஒட்டகங்களும் குடிக்கும்படி வார்ப்பேன் என்றும் சொல்லும் பெண் எவளோ, அவளே நீர் உம்முடைய ஊழியக்காரனாகிய ஈசாக்குக்கு நியமித்தவளா யிருக்கவும், என் எஜமானுக்கு அநுக்கிரகம் செய்தீர் என்று நான் அதினாலே அறியவும் செய்தருளும் என்றான். அவன் இப்படிச் சொல்லி முடிக்கும் முன்னே, இதோ, ஆபிரகாமுடைய சகோதரனாகிய நாகோரின் மனைவி மில்க்காளுடைய குமாரனாகிய பெத்துவேலுக்குப் பிறந்த ரெபெக்காள் குடத்தைத் தோள்மேல் வைத்துக்கொண்டு புறப்பட்டுவந்தாள். [ஆதியாகமம் 24:12–15]

• இருப்பினும், அந்த ஊழியக்காரன் அவசரப்பட்டு உடனடியாக ஒரு முடிவுக்கு வரவில்லை. அவன் என்ன செய்தான்? அவன் பொறுமையுடன் காத்திருந்தான்: அந்த மனிதன் அவளைக்குறித்து ஆச்சரியப்பட்டு, கர்த்தர் தன் பிரயாணத்தை வாய்க்கப்பண்ணினாரோ இல்லையோ என்று அறியும்பொருட்டு மவுனமாயிருந்தான். [ஆதியாகமம் 24:21]

• ஈசாக்குக்கான மணப்பெண் இவள்தான் என்பதை அவன் தன் இருதயத்தில் அறிந்திருந்தான். இருப்பினும், தான் செயல்படுவதற்கு முன்பாக தேவன் தம்முடைய காரியத்தைச் செய்து முடிக்கும் வரை அவன் காத்திருந்தான். நாம் எத்தனை முறை ஒரு காரியத்தைப் பார்த்தவுடன், உணர்ச்சிவசப்பட்டு, காத்திருக்காமல் அவசரப்பட்டு ஓடியிருக்கிறோம்? விசுவாசமும் பொறுமையும் ஒன்றோடொன்று கைகோர்த்துச் செல்கின்றன.

  • [எபிரெயர் 6:12]  உங்களுக்கு நம்பிக்கையின் பூரணநிச்சயமுண்டாகும்படி நீங்கள்யாவரும் முடிவுபரியந்தம் அப்படியே ஜாக்கிரதையைக் காண்பிக்கவேண்டுமென்று ஆசையாயிருக்கிறோம்

  • [யாக்கோபு 1:3–4]  உங்கள் விசுவாசத்தின் பரீட்சையானது பொறுமையை உண்டாக்குமென்று அறிந்து, அதை மிகுந்த சந்தோஷமாக எண்ணுங்கள். நீங்கள் ஒன்றிலும் குறைவுள்ளவர்களாயிராமல், பூரணராயும் நிறைவுள்ளவர்களாயும் இருக்கும்படி, பொறுமையானது பூரணகிரியை செய்யக்கடவது

• விசுவாசமும் பொறுமையும் தேவனுடனான நமது ஆவிக்குரிய வாழ்க்கையின் இரு கால்களாகும்.

• விசுவாசம் + பொறுமை = சகிப்புத்தன்மை = தேவனின் பரிபூரண சித்தத்தோடு ஒத்துப்போதல். தேவன் உறுதிப்படுத்திய பிறகு மட்டுமே அந்த ஊழியக்காரன் செயல்பட்டான் — அவன் பொற்காதணியையும், கடகங்களையும் அவளுக்குக் கொடுத்தான் (ஆதியாகமம் 24:22). தேவன் அசையச் சொன்னபோதுதான் அவன் அசைந்தான், அதற்கு ஒரு கணம் முன்பாகக் கூட அவன் அவசரப்படவில்லை.

பாடம் 4

• அவசரப்பட்டு உடனடியாக எந்த முடிவும் எடுக்காதீர்கள். ஜெபியுங்கள், உங்களை அர்ப்பணியுங்கள், அவருடைய உறுதிப்படுத்துதலுக்காகக் காத்திருங்கள். அந்த தேவ சமாதானம் — 'இவர்தான் அந்த நபர்' என்ற உறுதி வரும்போது — 'சரி' என்று சொல்லுங்கள்.

• தேவனிடம் பொறுமையைக் கேளுங்கள் — நாம் மிக விரைவில் ஒரு முடிவுக்கு வந்துவிடுகிறோம், இதனால் பலமுறை அவரது சித்தத்தைத் தவறவிட்டுவிடுகிறோம். நாம் பொறுமையாய்க் காத்திருக்கும்படி அழைக்கப்பட்டிருக்கிறோம்; பொறுமை என்பது ஆவியின் கனியாயிருக்கிறது (கலாத்தியர் 5:22).

5. தேவனின் கிரியைகளை அறிந்துகொள்ளுதல்

• இந்த நிகழ்வு முழுவதிலும் ஆபிரகாமின் ஊழியக்காரனிடம் ஒரு காரியம் மிகத் தெளிவாக வெளிப்படுகிறது — அவர் ஒவ்வொரு அடியிலும் தேவனுக்கு நன்றியும் துதியும் செலுத்தினார். ரெபெக்காள் ஆபிரகாமின் இனத்தைச் சேர்ந்தவள் என்பதை உறுதிப்படுத்தியவுடன், அவர் உடனடியாகத் தலைகுனிந்து, பணிந்து கொண்டார். [ஆதியாகமம் 24:26–27] அப்பொழுது அந்த மனிதன் தலைகுனிந்து,கர்த்தரைப் பணிந்து கொண்டு, என் எஜமானாகிய ஆபிரகாமின் தேவனாயிருக்கிற கர்த்தருக்கு ஸ்தோத்திரம்; அவர் தம்முடைய கிருபையையும், தம்முடைய உண்மையையும் என் எஜமானை விட்டு நீக்கவில்லை; நான் பிரயாணம் பண்ணிவருகையில், கர்த்தர் என் எஜமானுடைய சகோதரர் வீட்டுக்கு என்னை அழைத்துக்கொண்டு வந்தார் என்றான்.

• லாபானும் பெத்துவேலும் எல்லாவற்றையும் கேட்டு உடன்பட்டபோது, அவர்களின் பதில் மிகத் தெளிவாக இருந்தது — இந்தக் காரியம் கர்த்தரால் வந்தது, இதற்கு எதிராக யாராலும் நிற்க முடியாது. [ஆதியாகமம் 24:50–52] அப்பொழுது லாபானும் பெத்துவேலும் பிரதியுத்தரமாக: இந்தக் காரியம் கர்த்தரால் வந்தது, உமக்கு நாங்கள் நலம் பொலம் ஒன்றும் சொல்லக்கூடாது. இதோ, ரெபெக்காள் உமக்கு முன்பாக இருக்கிறாள்;கர்த்தர் சொன்னபடியே அவள் உமது எஜமானுடைய குமாரனுக்கு மனைவியாகும்படிக்கு, அவளை அழைத்துக்கொண்டுபோம் என்றார்கள். ஆபிரகாமின் ஊழியக்காரன் அவர்கள் வார்த்தைகளைக் கேட்டபோது, தரை மட்டும் குனிந்து, கர்த்தரைப் பணிந்துகொண்டான்.

• ஒவ்வொரு முக்கியக் கட்டத்திலும் அந்த ஊழியக்காரன் நன்றி செலுத்திய விதம் கவனிக்கத்தக்கது:

வசனம்	செயல்	வகை
ஆதியாகமம் 24:12–14	வழிநடத்துதலுக்கான ஜெபம்	ஜெபம் + தேவனை அறிக்கையிடுதல்
ஆதியாகமம் 24:27	ரெபெக்காளைச் சந்தித்த பிறகு	துதி / ஸ்தோத்திரம் செலுத்துதல்
ஆதியாகமம் 24:48	ரெபெக்காள் சம்மதித்த பிறகு	ஸ்தோத்திரம் செலுத்துதல் / ஆசீர்வதித்தல்
ஆதியாகமம் 24:52	இறுதி வருகை உறுதிசெய்யப்பட்ட பிறகு	உணர்ந்து ஒப்புக்கொடுத்தல்

பாடம் 5

• தேவன் கிரியை செய்யும்போது, ஒவ்வொரு திருப்புமுனையிலும் அவரை உணர்ந்து அங்கீகரியுங்கள். அவர் நேர்த்தியாகத் திட்டமிட்டுச் செய்த காரியங்களுக்கு நீங்கள் உரிமை எடுத்துக் கொள்ளாதீர்கள். நன்றி நிறைந்த இருதயம் உங்களை எப்போதும் அவருடைய சித்தத்தோடு இசைந்திருக்க வைக்கும்.

• அவருக்கு நன்றி செலுத்துவதும் அவரைத் துதிப்பதும் தேவனுக்கு மகிமையைச் செலுத்துவதாகும். நாம் அப்படிச் செய்யும்போது சாத்தானால் குறுக்கே நிற்க முடியாது — நாம் தேவனை மகிமைப்படுத்துவதை அவன் வெறுக்கிறான். தேவனுடைய கிரியைகளுக்காக நாம் அவரை மகிமைப்படுத்தும்போது, சாத்தான் விலகிப்போவான்; அவனுடைய எந்தத் திட்டமும் வெற்றிபெறாது. ஆபிரகாமின் ஊழியக்காரன் செய்ததை நாமும் பின்பற்றுவோம் — சிறிய காரியங்களில் கூட அதைச் செய்வோம். ஏனெனில் இந்த முக்கியமான கட்டத்தில், நாம் வைக்கும் ஒரு சிறிய அடியும்கூட நம்மைத் தவறான பாதைக்கு வழிநடத்திவிடும்.

6. மணமகள் மற்றும் மணமகனின் மனப்பான்மை

மணமகள் — ரெபெக்காளின் கீழ்ப்படிதல்

• தேவன் கிரியை செய்யும்போது, அதை யாராலும் தடுக்க முடியாது. ரெபெக்காளின் குடும்பத்தினர் அவளை இன்னும் பத்து நாட்கள் தங்கியிருக்குமாறு கேட்டுக்கொண்டனர். ஆனால் அந்த ஊழியக்காரன் தாமதிக்க வேண்டாம் என்று அவர்களைக் கேட்டுக்கொண்டான். அவர்கள் நேரடியாக ரெபெக்காளிடம் — [ஆதியாகமம் 24:55–58] "நீ இந்த மனிதனோடேகூடப் போகிறாயா?" என்று கேட்டபோது, அவளது பதில் மிகவும் தைரியமாகவும் உடனடியாகவும் இருந்தது: அப்பொழுது அவள் சகோதரனும் அவள் தாயும், பத்து நாளாகிலும் பெண் எங்களோடிருக்கட்டும், பிற்பாடு போகலாம் என்றார்கள். அதற்கு அவன்: கர்த்தர் என் பிரயாணத்தை வாய்க்கப்பண்ணியிருக்க, நீங்கள் எனக்குத் தடைசெய்யாதிருங்கள்; நான் என் எஜமானிடத்துக்குப்போக என்னை அனுப்பி விடவேண்டும் என்றான். அப்பொழுது அவர்கள்: பெண்ணை அழைத்து, அவள் வாய்ப்பிறப்பைக் கேட்போம் என்று சொல்லி, ரெபெக்காளை அழைத்து: நீ இந்த மனிதனோடேகூடப் போகிறாயா என்று கேட்டார்கள். அவள்: போகிறேன் என்றாள்.

• அவள்: போகிறேன் என்றாள். எந்தத் தயக்கமும் இல்லை. கூடுதல் நேரத்திற்காக எந்தப் பேரம் பேசுதலும் இல்லை. தான் பழகிய அனைத்தையும் விட்டுவிட்டு, தேவன் வழிநடத்தும் இடத்திற்குச் செல்ல ஆயத்தமாகி, அவருடைய வழிநடத்துதலுக்கு அவள் கீழ்ப்படிதலுடன் பதிலளித்தாள்.

  
  

மணமகன் — ஈசாக்கின் ஆவிக்குரிய ஆயத்தம்

[ஆதியாகமம் 24:62–63]  ஈசாக்கு தென்தேசத்தில் குடியிருந்தான். அப்பொழுது அவன்: லகாய்ரோயீ என்னப்பட்ட துரவின் வழியாய்ப் புறப்பட்டு வந்தான். ஈசாக்கு சாயங்காலவேளையிலே தியானம்பண்ண வெளியிலே போயிருந்து, தன் கண்களை ஏறெடுத்துப்பார்த்தபோது, ஒட்டகங்கள் வரக்கண்டான்

• ஈசாக்கு சும்மா உட்கார்ந்திருக்கவில்லை. அவர் பதற்றமாகவோ அல்லது அமைதியின்றியோ இருக்கவில்லை.

• அவர் வெளியில் தியானம்பண்ணி, தேவனைத் தேடிக்கொண்டிருந்தார். மாலையில் தேவனோடு செலவழிக்கும் அவருடைய அமைதியான நேரத்தில் அவர் தன் கண்களை ஏறெடுத்துப் பார்த்தபோது, ஒட்டகங்கள் வருவதைக் கண்டார். மணமகன் தேவனின் பிரசன்னத்தில் இருந்தபோதே, தேவன் மணமகளை அவரிடம் கொண்டுவந்து சேர்த்தார்.

• தேவன் தம்முடைய சித்தத்தை நிறைவேற்ற வேண்டுமானால், மணமகளும் மணமகனும் ஆவிக்குரிய ரீதியில் பிணைக்கப்பட்டும் ஆயத்தமாகவும் இருக்க வேண்டும்.

பாடம் 6

• தேடுபவர் மற்றும் கண்டடையப்படுபவர் ஆகிய இருவருமே ஆவிக்குரிய ரீதியில் ஆயத்தமாக இருக்க வேண்டும். ரெபெக்காளின் விருப்பமும், ஈசாக்கின் ஜெப சிந்தையும் இணைந்து தேவன்  திட்டமிட்டதை முழுமையாக்கியது.

• நீங்கள் தேடும் மணமகனையோ அல்லது மணமகளையோ தேவன் ஏற்கனவே படைத்துள்ளார் என்பதை நினைவில் கொள்ளுங்கள். அவர்களை ஒன்றிணைக்கும் விருப்பத்தை அவர் அறிவார். எனவே, நாம் ஜெபத்தோடு அவருக்குக் கீழ்ப்படிந்து நடக்கும்போது, அவருடைய வழிகள் பரிபூரணமானதாகவும் முற்றிலும் நேர்த்தியாகவும் இருக்கும்.

நீங்கள் வாழ்க்கைத்துணையைத் தேடுகிறீர்கள் என்றால் என்ன செய்ய வேண்டும்?

நீங்கள் ஒரு வாழ்க்கைத்துணையைத் தேடும் காலகட்டத்தில் இருக்கிறீர்கள் என்றால், ஆதியாகமம் 24 ஆம் அதிகாரத்திலிருந்து பெறப்பட்ட நடைமுறை வழிகாட்டுதல் இதோ:

1. உங்கள் ஜெபக் குறிப்புகளை எழுதுங்கள். மணமகன் அல்லது மணமகளிடம் நீங்கள் எதிர்பார்க்கும் தகுதிகள் — கல்வி, வேலை, குணம் மற்றும் நீங்கள் ஆசைப்படும் அனைத்தையும் பட்டியலிடுங்கள். தேவனிடம் ஜெபிப்பதற்காக அவை அனைத்தையும் எழுதி வையுங்கள். கர்த்தரிடத்தில் மனமகிழ்ச்சியாயிரு; அவர் உன் இருதயத்தின் வேண்டுதல்களை உனக்கு அருள்செய்வார். உன் வழியைக் கர்த்தருக்கு ஒப்புவித்து, அவர்மேல் நம்பிக்கையாயிரு; அவரே காரியத்தை வாய்க்கப்பண்ணுவார். [சங்கீதம் 37:4-5]

2. உங்கள் சித்தத்தை ஒப்புக் கொடுங்கள். தேவனிடம் இவ்வாறு கூறுங்கள்: "எனது வாழ்க்கைத்துணையைத் தேர்ந்தெடுக்கும் பொறுப்பை உம்மிடம் ஒப்படைக்கிறேன். எனது மாம்சம் முடிவு செய்யாமால், உம்முடைய ஆவியானவரே என்னை வழிநடத்துவாராக". இதுவே மிக முக்கியமானது — நீங்கள் உங்கள் அனுமதிக்கும் விருப்பத்தை கைவிட்டுக், கட்டுப்பாட்டை தேவனிடம் ஒப்படைக்க வேண்டும்.

3. ஒவ்வொரு விவரத்திற்காகவும் ஜெபியுங்கள். உங்கள் விருப்பங்களை தேவனிடம் நெருக்கமாக வெளிப்படுத்துங்கள். நமது தேவன் அத்தகைய நெருக்கத்தை விரும்புகிறவர் — அவர் உங்கள் இருதயத்தைப் புரிந்து கொண்டு, உங்களுக்கு நன்மையானதைத் தந்து,தீமையானதை நீக்குவார். தேவன் உங்கள் விருப்பத்தை நிறைவேற்றுவார் அல்லது அவருடைய சித்தத்திற்கு மாறான விருப்பங்களை அகற்றுவார்.

4. அவருடைய வார்த்தையின் மூலம் உறுதிப்படுத்துமாறு கேளுங்கள். தேவன் ஒருவரைக் காண்பித்த பிறகு, ஆபிரகாமின் ஊழியன் பின்பற்றிய முறையைப் பின்பற்றுங்கள் — தேவனே ஒருவரைத் தேர்ந்தெடுத்து, தம்முடைய வார்த்தையின் மூலம் அதை உங்களுக்கு உறுதிப்படுத்த வேண்டும் என்று கேளுங்கள். அவசரப்பட்டு நீங்களாகவே முடிவு செய்யாதீர்கள். தேவன் உங்கள் அடுத்த படிகளை வழிநடத்தும் வரை பொறுமையோடு காத்திருங்கள்.

5. அவர்களின் குடும்பத்திற்காகவும் ஜெபியுங்கள். வாழ்க்கைத்துணை மட்டுமே முக்கியமல்ல — அவர்களின் குடும்பமும் உறவுகளும் தான் அடுத்த தலைமுறையை வடிவமைக்கப் போகின்றன. இரு குடும்பங்கள் மூலமாகவும் தேவன் என்ன செய்ய விரும்புகிறாரோ அதற்காக ஜெபியுங்கள்.

6. திருமணத்திற்கு முன் உபவாசித்து ஜெபியுங்கள். இரு குடும்பங்களின் ஆரோக்கியம், பாதுகாப்பு மற்றும் சுகத்திற்காக ஜெபியுங்கள். தேவனுக்குக் கனவீனத்தை ஏற்படுத்தும் சடங்குகளுக்கு எதிராக ஜெபியுங்கள். அதிகமாக உபவாசித்து ஜெபியுங்கள். நீங்கள் ஏறெடுக்கும் ஒவ்வொரு ஜெபத்தையும் தேவன் நினைவுகூருகிறார் என்பதை நினைவில் வையுங்கள். திருமணத்தின் இறுதி கட்டத்தில் நீங்கள் பிஸியாக இருக்கும்போது சாத்தான் தீவிரமாகச் செயல்பட முயன்றால், தேவன் உங்களுக்காக எழுந்து நிற்பார். எப்போதும் நினைவில் கொள்ளுங்கள்: குழப்பம், சோதனை மற்றும் சுயத்திற்கு அடிபணியும்படி அழுத்தம் கொடுப்பதன் மூலம் சாத்தான் தேவனின் சித்தத்தைத் தடுக்க முயற்சிப்பான். இதை ஜெபத்தால் மட்டுமே முறியடிக்க முடியும்; நீங்கள் ஜெபத்தில் அதிக நேரத்தைச் செலவிட்டு தேவனைச் சார்ந்திருக்கும் போது அவர் உங்களுக்காக யுத்தம் செய்வார்.

திருமண உடன்படிக்கை வாக்குறுதி

வாழ்க்கைத்துணையைக் கண்டறிய செயலிகள் (apps), ஜாதகம், பின்னணி சரிபார்ப்புகள், பொருத்தம் பார்க்கும் அளவீடுகள் என உலகம் நூற்றுக்கணக்கான வழிகளை வழங்குகிறது.  ஆனால் ஆபிரகாமின் வழியோ ஒரே வழிதான்: அது தேவனின் வழி. அவர் தனது செல்வத்தைச் சார்ந்திருக்கவில்லை. தேவனுடைய சித்தத்தில் அவர் சமரசம் செய்து கொள்ளவில்லை. ஊழியனை வழிநடத்த தேவனின் தூதனை அவர் நம்பினார். அந்த ஊழியன் ஜெபித்து, காத்திருந்து, ஒவ்வொரு அடியிலும் தேவனுக்கு நன்றி செலுத்தினார். ரெபெக்காள் எந்தத் தயக்கமும் இன்றி "போகிறேன்" என்று கூறினாள். ஈசாக்கு என்ன செய்தார்? அவர் வெளியில் தியானித்து, தேவனைத் தேடிக்கொண்டிருந்தார் — அவர் நிமிர்ந்து பார்த்தபோது, அவருடைய மணமகள் வந்துகொண்டிருந்தாள்.

திருமண வாழ்க்கை என்பது நம்மை ஆவிக்குரிய ரீதியில் வளர்ப்பதற்கு தேவன் பயன்படுத்தும் ஒரு பாடமாகும். அவரிடம் கேளுங்கள். அவரைத் தேடுங்கள். வாழ்க்கையின் ஒவ்வொரு கட்டத்திலும் பிதாவின் கரங்களைப் பிடித்துக்கொண்டு வளரக்கூடிய ஒரு குடும்பத்தைக் கட்டியெழுப்ப அவர் உங்களை வழிநடத்துவார். ஈசாக்கும் ரெபெக்காளும் இதற்குச் சான்று — தேவன் ஒரு காதல் கதையை எழுதும்போது, அது நிலைத்து நிற்கிறது.

[நீதிமொழிகள் 3:5–6]  உன் சுயபுத்தியின்மேல் சாயாமல், உன் முழு இருதயத்தோடும் கர்த்தரில் நம்பிக்கையாயிருந்து, உன் வழிகளிலெல்லாம் அவரை நினைத்துக்கொள்; அப்பொழுது அவர் உன் பாதைகளைச் செவ்வைப்படுத்துவார்

உங்கள் திருமணம் ஒரு சூதாட்டம் அல்ல. அது ஒரு உடன்படிக்கை. தேவன் அதைத் தேர்ந்தெடுக்க விட்டுவிடுங்கள்.