உதவும் கரங்கள்

வாழ்க்கை என்பது ஏற்ற தாழ்வுகளைக் கொண்டது. பல நேரங்களில், நாம் பின்னடைவில் இருக்கும்போது,​​ நமக்கு உதவ எப்போதும் ஒருவரைத் தேடுகிறோம். நோய்வாய்ப்பட்டிருக்கும் போது, ​​மருத்துவ உதவிக்கு யாரையாவது தேடுகிறோம். பொருளாதார ரீதியாக பலவீனமாக இருக்கும்போது, ​​கடனுக்காக நிறுவனங்களைத் தேடுவதற்கும் மற்றவர்களின் உதவியை எதிர்பார்க்கிறோம். நாம் உணர்ச்சிவசப்படும்போது ஆறுதல் பெற சக மனிதர்களின் உதவியை நாடுகிறோம். அன்புக்குரியவர்களின் இருப்பு ஒரு பெரிய மாற்றத்தை ஏற்படுத்துகிறது.

மோசே ஆறு இலட்சம் இஸ்ரவேலர்களை வழிநடத்தியபோது, அவர்கள் தங்களைச் சுற்றியிருந்த சூழ்நிலைகளைக் கண்டு பயந்தார்கள். ஒவ்வொரு இஸ்ரவேலரையும் எப்படி ஒரு தகப்பன் தன் தோளில் சுமந்து கவனிப்பாரோ அதே போல் தேவன் கவனித்துக் கொண்டார். அநேக அற்புதங்களைச் செய்தார். எகிப்திய அடிமைத்தனத்திலிருந்து தங்களை விடுவிக்க வேண்டி அவர்கள் செய்த கூக்குரலைக் கேட்டார். அவர்களை செங்கடலைக் கடக்கச் செய்தார். வாக்குப்பண்ணிய தேசத்திற்கு அழைத்துச் செல்வதற்கு முன்பாக 40 ஆண்டுகள் வனாந்தரத்தில் அவர்களை வழிநடத்தினார். "அவர் உன்னை விட்டு விலகுவதுமில்லை, உன்னைக் கைவிடுவதுமில்லை" என்ற தமது வாக்குத்தத்தத்திற்கு உண்மையாக இருந்தார்.

கர்த்தர்தாமே உனக்கு முன்பாகப் போகிறவர், அவர் உன்னோடே இருப்பார்; அவர் உன்னை விட்டு விலகுவதுமில்லை, உன்னைக் கைவிடுவதுமில்லை; நீ பயப்படவும் கலங்கவும் வேண்டாம் என்றான். உபாகமம் 31:8

தேவனின் பிள்ளைகளாகிய எனக்கும் உங்களுக்கும் அது உண்மையாகவே இருக்கிறது - "அவர் உன்னை விட்டு விலகுவதுமில்லை, உன்னைக் கைவிடுவதுமில்லை".

தேவைகளில் உதவுபவர்

ஆனால் இன்னும், பிரச்சனையின் போது உதவிக்கரம் இல்லாமல் தவிக்கிறோம். உதவி கிடைக்காமல் போன கதை நம் ஒவ்வொருவருக்கும் இருக்கும்.

தேவன் நமக்குக் கொடுத்த வாக்குறுதியை நாம் பெரும்பாலும் புரிந்துகொள்வதில்லை.

நமக்கு உதவுவதாகவும், எப்போதும் நம்முடன் இருப்பதாகவும் வாக்குறுதி

நீங்கள் என்னிடத்தில் அன்பாயிருந்தால் என் கற்பனைகளைக் கைக்கொள்ளுங்கள். நான் பிதாவை வேண்டிக்கொள்ளுவேன், அப்பொழுது என்றென்றைக்கும் உங்களுடனேகூட இருக்கும்படிக்குச் சத்திய ஆவியாகிய வேறொரு தேற்றரவாளனை அவர் உங்களுக்குத் தந்தருளுவார். யோவான் 14:15,16

அவரை நேசிப்பவருக்கு மட்டுமே உதவிக்கரம் வரும்.

நீங்கள் ஒருவரை நேசிக்கும் போது, அவர்களுக்கான உங்கள் செயல்களின் மூலம் அன்பை செலுத்துகிறீர்கள், அது தேவனுக்கும் பொருந்தும். நீங்கள் அவரை நேசித்தால், அவருடன் நேரத்தை செலவிட்டு, அவருடைய வார்த்தையைப் படியுங்கள். அவருடைய கட்டளைகளைப் பின்பற்றுங்கள், அவரிடம் உதவி கேட்க தொடர்பு கொள்ளுங்கள். இந்த உறவு, அவர் நமக்காய் பழிவாங்கவும், பிரச்சனையின் போது எதிர்த்துப் போராடவும் உதவும்.

இக்கட்டான நேரத்தில் நமக்கு உதவி கிடைக்காததற்குக் காரணம்

• தேவனை ஒரு உதவியாளராக நமக்குத் தேவைப்படும்போது மட்டுமே பயன்படுத்துகிறோம், அதன் பிறகு அவரைத் தள்ளிவிடுகிறோம், அதன் பிறகு, அவருடன் எந்த தொடர்பும் இருப்பதில்லை. நமக்குத் தேவைப்படுவதற்கு உதவுவதற்கு அவரை அர்பன் கிளாப் (URBAN CLAP) சேவை போன்று பயன்படுத்துகிறோம்.

• வாழ்க்கையின் சில பகுதிகளில் மட்டுமே தேவன் உதவ வேண்டும் என்று விரும்புகிறோம். எ.கா. நமது பூமிக்குரிய தேவைகளைப் பூர்த்தி செய்ய பணம் தேவைப்படும்போது, பள்ளிச் சேர்க்கைக்குத் தேவைப்படும்போது, நோய்களைக் குணப்படுத்த வேண்டியிருக்கும் போது என்பது போன்ற காரியங்களுக்கு மட்டுமே அவரைத் தேடுகிறோம். நம் வாழ்க்கையின் பாவங்களைச் சரிசெய்வதற்கு அவர் நமக்கு உதவுவதை நாம்  விரும்புவதில்லை. ஏனென்றால் அது ஒருவரின் தனிப்பட்ட முடிவு,  தேவனுடையது அல்ல என்று நினைக்கிறோம்.

• பொருள் தேவைகளுக்காக நாம் அவரை நேசிக்கிறோம், அவருடைய திட்டத்தின்படி நம்மை பயன்படுத்துவதற்காக அல்ல.

• நம்முடைய தவறான முடிவுகள் அல்லது தவறான நடத்தைக்காக நாம் திருத்தப்பட வேண்டும் என்று அவர் விரும்புவதால், அவரிடமிருந்து நமக்கு உதவி கிடைப்பதில்லை. ஒரு தகப்பன் தன் பிள்ளையை திருத்த முயலும் போது, பலமுறை அவர்களுக்கு உதவ தாமதிப்பான். அதனால் அவர்கள் தங்கள் தவறுகளை உணர்ந்து கொள்ளுவார்கள்.

தேவன் மீது அன்பு வைப்பதே அவரிடம் இருந்து உதவி பெறுவதற்கான ரகசியம்

என் கற்பனைகளைப் பெற்றுக்கொண்டு அவைகளைக் கைக்கொள்ளுகிறவனே என்னிடத்தில் அன்பாயிருக்கிறான், என்னிடத்தில் அன்பாயிருக்கிறவன் என் பிதாவுக்கு அன்பாயிருப்பான்; நானும் அவனில் அன்பாயிருந்து, அவனுக்கு என்னை வெளிப்படுத்துவேன் என்றார். யோவான் 14:21

• நீங்கள் அவரை நேசிப்பீர்களானால், அவருடைய கட்டளைகளைப் பின்பற்றுவீர்கள். வேதத்தில் சொல்லப்பட்டிருக்கிற அவருடைய வழிகாட்டுதலுக்குக் கீழ்ப்படிவீர்கள், அவருக்குச் செவிசாய்ப்பீர்கள்.

• தேவனால் கொடுக்கப்பட்ட முதல் கட்டளையும் இது தான் - உன் தேவனாகிய கர்த்தரிடத்தில் உன் முழு இருதயத்தோடும், உன் முழு ஆத்துமாவோடும், உன் முழு மனதோடும், உன் முழுப் பலத்தோடும் அன்புகூருவாயாக என்பதே பிரதான கற்பனை. இதற்கு ஒப்பாயிருக்கிற இரண்டாம் கற்பனை என்னவென்றால்: உன்னிடத்தில் நீ அன்புகூருவதுபோல் பிறனிடத்திலும் அன்புகூருவாயாக என்பதே; இவைகளிலும் பெரிய கற்பனை வேறொன்றுமில்லை என்றார். மாற்கு 12:30,31.  

எனவே, தேவனை எப்படி நேசிக்கிறீர்கள் ?

• உங்கள் வாழ்க்கையில் தேவனை முதன்மையாக வைத்திருங்கள். காலையில் முதல் வேலையாக என்ன செய்கிறீர்கள் என்பதை ஆராய்ந்து பாருங்கள். அவரோடு நேரத்தைச் செலவிடுகிறீர்களா அல்லது மற்றவர்களோடு செலவிடுகிறீர்களா? இது அவர் மீதான உங்கள் அன்பு என்ன என்பதைக் காட்டுகிறது - இது ஒரு எளிய சோதனை. மற்றொரு சோதனை, ஆசீர்வாதத்தைப் பெற்ற பிறகு என்ன செய்கிறீர்கள் என்று பார்ப்பது. நீங்கள் எப்படி நடந்துகொள்கிறீர்கள்? ஆசீர்வாதத்திற்கு அவருக்கு  நன்றி கூறுகிறீர்களா அல்லது தொடர்ந்து செல்கிறீர்களா? நம்மிடம் தேவன் மீதான அன்பு இருக்கிறதா இல்லையா என்பதை நாம் அடையாளம் காணக்கூடிய சில தொடக்க நிலை விஷயங்கள் இவை.

• மதத்திற்காக மட்டும் தேவனைப் பின்பற்றாதீர்கள். சில நேரம்  பரிசேயராகவோ அல்லது சதுசேயராகவோ ஆகிவிடுவீர்கள். அவரின் தயவைப் பெற மாட்டீர்கள். நீதியின் பொருட்டும் அவருடைய பார்வையில் நீதிமான்களாக இருப்பதற்கும் அவரைப் பின்பற்றுங்கள்.

• உலக ஆசீர்வாதத்தை பெறுவதற்காக மட்டும் தேவனைப் பின்பற்றாதீர்கள். உலகில் நாம் இருக்கும் காலம் மிகக் குறைவு என்பதை நினைவில் கொள்ளுங்கள். நாம் ஒரு நித்திய ஆசீர்வாதத்திற்காக ஏங்க வேண்டும், அதைப் பெறுவதற்கு ஆவிக்குரிய ஆசீர்வாதத்தைக் கொண்டிருக்க வேண்டும், இந்த ஆவிக்குரிய ஆசீர்வாதம் நித்தியம் வரை தொடர்கிறது. வாக்குத்தத்தம் தெளிவாக உள்ளது - அவரையும் அவருடைய நீதியையும் தேடுங்கள். அப்பொழுது அதோடு கூட உலக ஆசீர்வாதம் தொடர்ந்து வரும். முதலாவது தேவனுடைய ராஜ்யத்தையும் அவருடைய நீதியையும் தேடுங்கள், அப்பொழுது இவைகளெல்லாம் உங்களுக்குக்கூடக் கொடுக்கப்படும். மத்தேயு 6:33

எனவே, தேவன் எவ்வாறு உதவுகிறார் ?

தேவன் தம்மை நேசிப்பவர்களுக்கு உதவுவதற்காக, தம்முடைய பரிசுத்த ஆவியானவரை அவருடைய அன்பானவர்களுக்கு வழங்குகிறார். பரிசுத்த ஆவியானவரை உலகத்தவர்களால் பார்க்கவும் முடியாது, அதன் அர்த்தத்தை புரிந்துகொள்ளவும் முடியாது என்பதை நினைவில் கொள்ளுங்கள். ஆனால் உங்கள் முழு இருதயத்தோடும் ஆத்துமாவோடும் நேசித்தால் அவர் எப்போதும் உங்களுக்காக இருப்பார். மேலும், உங்களுக்கு உதவுவார். இந்த உதவி எப்போதும் இருக்கும் என்றும் அவர் உறுதியளிக்கிறார், மேலும் நம்மை அனாதையாக விடமாட்டார்.

உலகம் அந்தச் சத்திய ஆவியானவரைக் காணாமலும் அறியாமலும் இருக்கிறபடியால் அவரைப் பெற்றுக்கொள்ளமாட்டாது; அவர் உங்களுடனே வாசம்பண்ணி உங்களுக்குள்ளே இருப்பதால், நீங்கள் அவரை அறிவீர்கள். நான் உங்களைத் திக்கற்றவர்களாக விடேன், உங்களிடத்தில் வருவேன். இன்னும் கொஞ்சக்காலத்திலே உலகம் என்னைக் காணாது, நீங்களோ என்னைக் காண்பீர்கள்; நான் பிழைக்கிறபடியினால் நீங்களும் பிழைப்பீர்கள். யோவான் 14:17-19

பல்வேறு விஷயங்களில் ஜனங்களுக்கு எவ்வாறு உதவி கிடைத்தது என்பதற்கு பைபிளில் உள்ள சில எடுத்துக்காட்டுகளைப் பார்ப்போம். அதனால் தேவன்  உங்களுக்கும் நிச்சயமாக உதவுவார் என்ற நம்பிக்கையை மீண்டும் உறுதிப்படுத்துகிறது.

• ஆலயத்தைக் கட்டுவதற்கான அனைத்து வடிவமைப்பு வேலைகள் / கைவினைப்பொருட்கள் மற்றும் கற்களை வடிவமைப்பதில் பரிசுத்த ஆவியானவர் உதவியாளராக இருந்தார். உலகம் இதை திறமை என்று அழைக்கும், ஆனால் உதவி செய்வதற்காக அது தேவனிடமிருந்து "தேவ ஆவி" ஆக வருகிறது. பின்னும் கர்த்தர் மோசேயை நோக்கி: நான் யூதாவின் கோத்திரத்தில் ஊருடைய மகனான ஊரியின் குமாரன் பெசலெயேலைப் பேர்சொல்லி அழைத்து, விநோதமான வேலைகளை அவன் யோசித்துச் செய்கிறதற்கும், பொன்னிலும் வெள்ளியிலும் வெண்கலத்திலும் வேலைசெய்கிறதற்கும், இரத்தினங்களை முத்திரைவெட்டாக வெட்டிப் பதிக்கிறதற்கும், மரத்தில் சித்திரவேலைகளைச் செய்கிறதற்கும், மற்றும் சகலவித வேலைகளையும் யூகித்துச் செய்கிறதற்கும் வேண்டிய ஞானமும் புத்தியும் அறிவும் அவனுக்கு உண்டாக, அவனை தேவஆவியினால் நிரப்பினேன். யாத்திராகமம் 31:1-5

• யோசேப்பை பாவம் செய்வதிலிருந்து பாதுகாக்கவும், தவிர்க்கவும் பரிசுத்த ஆவியானவர் உதவியாளராக இருந்தார் - இந்த வீட்டிலே என்னிலும் பெரியவன் இல்லை; நீ அவருடைய மனைவியாயிருக்கிறபடியால் உன்னைத்தவிர வேறொன்றையும் அவர் எனக்கு விலக்கி வைக்கவில்லை; இப்படியிருக்க, நான் இத்தனை பெரிய பொல்லாங்குக்கு உடன்பட்டு, தேவனுக்கு விரோதமாய்ப் பாவம் செய்வது எப்படி என்றான். அவள் நித்தம் நித்தம் யோசேப்போடே இப்படிப் பேசிக்கொண்டு வந்தும், அவன் அவளுடனே சயனிக்கவும் அவளுடனே இருக்கவும் சம்மதிக்கவில்லை. ஆதியாகமம் 39:9,10

• பரிசுத்த ஆவியானவர் யோசேப்புக்கு மற்றவர்களிடமிருந்து வரும் கசப்பிலிருந்து பாதுகாவலராக இருந்தார். யோசேப்பு கனிதரும் செடி; அவன் நீர் ஊற்றண்டையிலுள்ள கனிதரும் செடி; அதின் கொடிகள் சுவரின்மேல் படரும். வில்வீரர் அவனை மனமடிவாக்கி, அவன்மேல் எய்து, அவனைப் பகைத்தார்கள். ஆனாலும், அவனுடைய வில் உறுதியாய் நின்றது; அவன் புயங்கள் யாக்கோபுடைய வல்லவரின் கரங்களால் பலத்தன; இதினால் அவன் மேய்ப்பனும் இஸ்ரவேலின் கன்மலையும் ஆனான். ஆதியாகமம் 49:22-24

• வெளிச்சம், விவேகம் மற்றும் சிறந்த ஞானம் ஆகியவற்றைப் பெறுவதற்கு தானியேல் பரிசுத்த ஆவியானவரால் நிரப்பப்பட்டார். உம்முடைய ராஜ்யத்திலே ஒரு புருஷன் இருக்கிறான், அவனுக்குள் பரிசுத்த தேவர்களுடைய ஆவி இருக்கிறது; உம்முடைய பிதாவின் நாட்களில் வெளிச்சமும் விவேகமும் தேவர்களின் ஞானத்துக்கு ஒத்த ஞானமும் அவனிடத்தில் காணப்பட்டது; ஆகையால் உம்முடைய பிதாவாகிய நேபுகாத்நேச்சாரென்னும் ராஜாவானவர் அவனைச் சாஸ்திரிகளுக்கும் ஜோசியருக்கும் கல்தேயருக்கும் குறிசொல்லுகிறவர்களுக்கும் அதிபதியாக வைத்தார். அப்பொழுது தானியேல் ராஜாவின்முன் உள்ளே அழைத்து வந்து விடப்பட்டான்; ராஜா தானியேலைப் பார்த்து: நீ என் பிதாவாகிய ராஜா யூதாவிலிருந்து சிறைபிடித்துவந்த யூதரில் ஒருவனாகிய தானியேல் அல்லவா? உனக்குள்ளே தேவர்களின் ஆவி உண்டென்றும், வெளிச்சமும் புத்தியும் விசேஷித்த ஞானமும் உன்னிடத்தில் காணப்பட்டதென்றும் உன்னைக்குறித்துக் கேள்விப்பட்டேன். தானியேல் 5:11,13-14

• ஈசாய் தாவீதின் தகப்பன். தாவீதின் வேர்களில் இருந்து வந்த ஏசாயா தீர்க்கதரிசி பரிசுத்த ஆவியானவரின் ஞானத்தால் ஆசீர்வதிக்கப்பட்டார். ஈசாயென்னும் அடிமரத்திலிருந்து ஒரு துளிர் தோன்றி, அவன் வேர்களிலிருந்து ஒரு கிளை எழும்பிச் செழிக்கும். ஞானத்தையும் உணர்வையும் அருளும் ஆவியும், ஆலோசனையையும் பெலனையும் அருளும் ஆவியும், அறிவையும் கர்த்தருக்குப் பயப்படுகிற பயத்தையும் அருளும் ஆவியுமாகிய கர்த்தருடைய ஆவியானவர் அவர்மேல் தங்கியிருப்பார். கர்த்தருக்குப் பயப்படுதல் அவருக்கு உகந்த வாசனையாயிருக்கும்; அவர் தமது கண் கண்டபடி நியாயந்தீர்க்காமலும், தமது காது கேட்டபடி தீர்ப்புச்செய்யாமலும், ஏசாயா 11:1-3

• பவுல் பரிசுத்த ஆவியானவரின் மூலம் விசேஷித்த அற்புதங்களைச் செய்தார். அவர் தொட்ட கைக்குட்டை கூட ஜீவனையும் நோயிலிருந்து விடுதலையையும் கொடுத்தது. பவுலின் கைகளினாலே தேவன் விசேஷித்த அற்புதங்களைச் செய்தருளினார். அவனுடைய சரீரத்திலிருந்து உறுமால்களையும், கச்சைகளையும் கொண்டுவந்து, வியாதிக்காரர்மேல் போட வியாதிகள் அவர்களைவிட்டு நீங்கிப்போயின; பொல்லாத ஆவிகளும் அவர்களைவிட்டுப் புறப்பட்டன. அப்போஸ்தலர் 19:11-12

நீங்கள் தேவனின் அன்பைக் கொண்டவுடன், அவரிடம் ஆர்வத்துடன் கேளுங்கள், அவர் உதவியாளராக பரிசுத்த ஆவியானவரைத் தருகிறார், இதில் மேலும் பல கூடுதல் நன்மைகள் உள்ளன.

• தேவனின் பிள்ளைகளாகிறீர்கள் - நீங்கள் தேவனின் பிள்ளையாகிவிட்டால், சாத்தானுக்கு உங்கள் மீதும் உங்கள் உடைமைகள் மீதும் வல்லமையோ அதிகாரமோ இல்லை. தேவனின் அனுமதியின்றி அவனால் உங்களைத் தொட முடியாது. மேலும் எவர்கள் தேவனுடைய ஆவியினாலே நடத்தப்படுகிறார்களோ, அவர்கள் தேவனுடைய புத்திரராயிருக்கிறார்கள். ரோமர் 8:14

• நீதியான வாழ்க்கைக்கு வழி வகுக்கும்படிக்கு உங்கள் சுயத்தை விட்டு தேவனுக்குப் பிரியமான வாழ்க்கையை வாழத் தொடங்குகிறீர்கள். மேலும் கிறிஸ்து உங்களிலிருந்தால் சரீரமானது பாவத்தினிமித்தம் மரித்ததாயும், ஆவியானது நீதியினிமித்தம் ஜீவனுள்ளதாயும் இருக்கும். ரோமர் 8:10

• பரிசுத்த ஆவியானவர் தேவனுடைய ஆழமான விஷயங்களை ஆராய்ந்து நமக்கு வெளிப்படுத்துகிறார். நமக்கோ தேவன் அவைகளைத் தமது ஆவியினாலே வெளிப்படுத்தினார்; அந்த ஆவியானவர் எல்லாவற்றையும், தேவனுடைய ஆழங்களையும் ஆராய்ந்திருக்கிறார். மனுஷனிலுள்ள ஆவியேயன்றி மனுஷரில் எவன் மனுஷனுக்குரியவைகளை அறிவான்? அப்படிப்போல, தேவனுடைய ஆவியேயன்றி, ஒருவனும் தேவனுக்குரியவைகளை அறியமாட்டான். 1 கொரிந்தியர் 2:10,11

• கிறிஸ்துவின் நாமத்தில் உங்களுக்கு அதிக வல்லமை உண்டு. பரிசுத்த ஆவியானவரை நீங்கள் பெற்றுக் கொண்டவுடன் அவர் புத்தி, ஞானம், குணமாக்குதல், தீர்க்கதரிசனம் கூறுதல், அந்நியபாஷை பேசுதல், பிசாசுகளைத் துரத்துதல் போன்ற எல்லாவற்றிலும் உதவுகிறார். ஆவியினுடைய அநுக்கிரகம் அவனவனுடைய பிரயோஜனத்திற்கென்று அளிக்கப்பட்டிருக்கிறது. எப்படியெனில், ஒருவனுக்கு ஆவியினாலே ஞானத்தைப் போதிக்கும் வசனமும், வேறொருவனுக்கு அந்த ஆவியினாலேயே அறிவை உணர்த்தும் வசனமும், வேறொருவனுக்கு அந்த ஆவியினாலேயே விசுவாசமும், வேறொருவனுக்கு அந்த ஆவியினாலேயே குணமாக்கும் வரங்களும், வேறொருவனுக்கு அற்புதங்களைச் செய்யும் சக்தியும், வேறொருவனுக்குத் தீர்க்கதரிசனம் உரைத்தலும், வேறொருவனுக்கு ஆவிகளைப் பகுத்தறிதலும், வேறொருவனுக்குப் பற்பல பாஷைகளைப் பேசுதலும், வேறொருவனுக்குப் பாஷைகளை வியாக்கியானம்பண்ணுதலும் அளிக்கப்படுகிறது. இவைகளையெல்லாம் அந்த ஒரே ஆவியானவர் நடப்பித்து, தமது சித்தத்தின்படியே அவனவனுக்குப் பகிர்ந்து கொடுக்கிறார்.1 கொரிந்தியர் 12:7-11

எனவே அவருடைய உதவியை நாடுங்கள். அவரை நேசியுங்கள். குறிப்பிட்ட காரியங்களுக்கு மட்டும் அவர் உதவ வேண்டும் என்று தேர்ந்தெடுத்துக் கொள்ளாதீர்கள். அவர் உதவி செய்ய ஏங்குகிறார், அவருடைய வழிகளை அறிய முடியாது. பழைய ஏற்பாட்டைப் படித்துப் பார்த்து, அவர் இராஜாக்கள் மற்றும்  நியாயாதிபதிகளுக்கு எவ்வாறு தலைமுறை தலைமுறையாக உதவினார் என்பதை புரிந்துகொள்ளுங்கள். இயேசுவின் வாழ்க்கையைப் படியுங்கள். அவருடைய இரத்தத்தால் நாம் பாவங்களை எதிர்த்துப் போராடுவதற்கு தம்மையே ஒப்புக் கொடுத்தார். எனவே அவருடைய உதவும் கரங்களைப் பெற்றுக் கொள்ள அவரைத் தேடுங்கள்.