top of page

மோசேயின் வழியில் போராடு

Kirupakaran
10 minutes ago
10 min read

நம் அனைவருக்கும் வாழ்க்கையில் போராட்டங்கள் உள்ளன. ஒரு பணக்காரரிடம் கேட்டால், அவருக்குத் தன் போராட்டங்களைப் பற்றிய ஒரு கதை இருக்கும். ஒரு ஏழையிடம் கேட்டால், அவருக்கும் ஒரு கதை இருக்கும். ஆனால் விசுவாசிகளாகிய நாம், அவிசுவாசிகளை விட அதிகமான போராட்டங்களைச் சந்திக்கிறோம்.

 

தம்மைப் பின்பற்றுவதால் நமக்கு உபத்திரவங்களும் துன்பங்களும் வரும் என்று இயேசுவே கூறியுள்ளார். ஆசிரியருக்கும் மாணவனுக்கும் இடையிலான உறவைக் கொண்டு அவர் இதை விளக்கினார்: எஜமானையே அவர்கள் இப்படி நடத்தினார்கள் என்றால், அவருடைய வீட்டாரும் அதையே எதிர்பார்க்க வேண்டும்.

[மத்தேயு 10:22, 25]  22என் நாமத்தினிமித்தம் நீங்கள் எல்லாராலும் பகைக்கப்படுவீர்கள்; முடிவுபரியந்தம் நிலைத்திருப்பவனே இரட்சிக்கப்படுவான். 25சீஷன் தன் போதகனைப்போலவும், வேலைக்காரன் தன் எஜமானைப்போலவும் இருப்பது போதும். வீட்டெஜமானையே பெயல்செபூல் என்று சொன்னார்களானால், அவன் வீட்டாரை அப்படிச் சொல்வது அதிக நிச்சயமல்லவா?

 

அப்படியானால், துன்பங்களிலிருந்து விடுபட நாம் இயேசுவை விட்டு விலக வேண்டுமா? அதுவும் இதற்குத் தீர்வல்ல. ஒரு அவிசுவாசியின் வாழ்க்கையைப் பார்த்தால் அவருக்கும் பல துன்பங்கள் இருப்பதைக் காணலாம். வாழ்க்கையின் துன்பங்கள் சாத்தானிடமிருந்து வருகின்றன; சாத்தான் ஜீவனைக் கொடுக்க வருவதில்லை. அவன் அழிக்கவே வருகிறான். தேவனுடைய வார்த்தை இதை உறுதிப்படுத்துகிறது.

[யோவான் 10:10]  திருடன் திருடவும் கொல்லவும் அழிக்கவும் வருகிறானேயன்றி வேறொன்றுக்கும் வரான். நானோ அவைகளுக்கு ஜீவன் உண்டாயிருக்கவும், அது பரிபூரணப்படவும் வந்தேன்.

 

அப்படியானால், இதற்குத் தீர்வுதான் என்ன? இந்தப் போராட்டங்களை நாம் எவ்வாறு மேற்கொள்வது, அவற்றிற்கு எதிராக எவ்வாறு போரிடுவது? இஸ்ரவேல் ஜனங்கள் தங்கள் வாக்குத்தத்தம் பண்ணப்பட்ட தேசத்தைச் சுதந்தரித்துக்கொள்ள, மோசேயின் மூலமாக தேவன் அவர்களுக்கு எவ்வாறு யுத்தம் செய்யக் கற்றுக்கொடுத்தார் என்பதை வேதாகமத்தில் பார்க்கிறோம். நாம் உபாகமம் 20 ஆம் அதிகாரத்தில், யுத்தம் செய்வது குறித்து வாசிக்கிறோம்,

 

யுத்தம் செய்வது குறித்து மோசேயின் உபதேசம் — உபாகமம் 20

தேவனுடைய வழிநடத்துதலின் அடிப்படையில் மோசே இஸ்ரவேலர்களிடம் பேசினார்:

  • இஸ்ரவேலர்கள் மோவாபின் சமவெளிகளில் இருக்கிறார்கள்; யோர்தான் நதியைக் கடந்து கானான் தேசத்திற்குள் நுழையத் தயாராக உள்ளனர். உபாகமம் 20 ஆம் அதிகாரம் மோசேயின் இரண்டாவது உரையின் ஒரு பகுதியாக அமைகிறது.

  • அவர்களுக்கு முன்னால் இருந்த ஜாதிகள் பெரியவர்களாகவும், பலசாலிகளாகவும், குதிரைகள் மற்றும் இரும்பு இரதங்களுடன் நன்கு ஆயத்தமானவர்களாகவும், போரில் அதிக அனுபவம் வாய்ந்தவர்களாகவும் இருந்தனர். மனுஷீக ரீதியாகப் பார்த்தால், இஸ்ரவேலர்கள் அவர்களுக்கு ஈடுகொடுக்க முடியாத நிலையில் இருந்தனர்.

  • மற்ற ஜாதிகள் தங்கள் இராணுவ வலிமையை நம்பியிருந்தன. ஆனால் இஸ்ரவேலர்களின் மிகப்பெரிய பலம் தேவனுடைய பிரசன்னமே ஆகும்.

[உபாகமம் 20:1-4]  நீ உன் சத்துருக்களுக்கு எதிராக யுத்தஞ்செய்யப் புறப்பட்டுப்போகையில், குதிரைகளையும், இரதங்களையும், உன்னிலும் பெரிய கூட்டமாகிய ஜனங்களையும் கண்டால், அவர்களுக்குப் பயப்படாயாக; உன்னை எகிப்து தேசத்திலிருந்து புறப்படப்பண்ணின உன் தேவனாகிய கர்த்தர் உன்னோடே இருக்கிறார். நீங்கள் யுத்தஞ்செய்யத் தொடங்கும்போது, ஆசாரியன் சேர்ந்து வந்து, ஜனங்களிடத்தில் பேசி: இஸ்ரவேலரே, கேளுங்கள்; இன்று உங்கள் சத்துருக்களுடன் யுத்தஞ்செய்யப் போகிறீர்கள்; உங்கள் இருதயம் துவளவேண்டாம்; நீங்கள் அவர்களைப் பார்த்துப் பயப்படவும் கலங்கவும் தத்தளிக்கவும் வேண்டாம். உங்களுக்காக உங்கள் சத்துருக்களோடே யுத்தம்பண்ணவும் உங்களை இரட்சிக்கவும் உங்களோடேகூடப் போகிறவர் உங்கள் தேவனாகிய கர்த்தர் என்று சொல்லவேண்டும்.

 

மோசே இஸ்ரவேலர்களுக்குக் கற்றுக் கொடுத்தவை, வாழ்க்கைப் போராட்டங்களுக்கு எதிராக எவ்வாறு போராட வேண்டும் என்பதை நமக்குக் கற்றுக்கொடுக்கின்றன.

 

விசுவாசத்தைக் கட்டியெழுப்ப பின்னோக்கிப் பாருங்கள்

[உபாகமம் 20:1]  "... அவர்களுக்குப் பயப்படாயாக; உன்னை எகிப்து தேசத்திலிருந்து புறப்படப்பண்ணின உன் தேவனாகிய கர்த்தர் உன்னோடே இருக்கிறார்".

  • குதிரைகளும் இரதங்களும் இன்றைய காலத்துப் பீரங்கிகள், போர் விமானங்கள், ஏவுகணைகள் மற்றும் இராணுவத் தொழில்நுட்பத்திற்குச் சமமானவை. எகிப்து, கானான் மற்றும் சுற்றியுள்ள நாடுகள் தங்கள் இராணுவ பலத்தையே நம்பியிருந்தன.

  • இன்றைய காலகட்டத்தில் நம்முடைய "குதிரைகளும் இரதங்களும்" என்பவை நிதி நெருக்கடியாகவோ, உடல்நலக் குறைவாகவோ, வேலை இழப்பாகவோ, குடும்பப் பிரச்சனைகளாகவோ, உபத்திரவமாகவோ, சாத்தியமற்ற சூழ்நிலைகளாகவோ அல்லது எதிர்காலத்தைப் பற்றிய கவலையாகவோ இருக்கலாம்.

  • தேவன் இஸ்ரவேல் ஜனங்களிடம் கூறுகிறார்:

    • நீங்கள் காண்பவற்றைக் கொண்டு உங்கள் வெற்றியை அளவிடாதீர்கள்.

    • உங்களோடு இருப்பவரைக் கொண்டு அதை அளவிடுங்கள்.

  • தாமே அவர்களை எகிப்து தேசத்திலிருந்து அழைத்து வந்தவர் என்பதை தேவன் ஏன் அவர்களுக்கு நினைவூட்டுகிறார் என்பதைக் கவனியுங்கள். தேவனுடைய கடந்த கால உண்மைத்தன்மையை நினைவுகூர்வது, நிகழ்காலப் போராட்டங்களை எதிர்கொள்ளத் தேவையான விசுவாசத்தைக் கட்டியெழுப்புகிறது. வலிமைமிக்க பார்வோனைத் தோற்கடித்த தேவனால் கானானியர்களையும் நிச்சயமாகத் தோற்கடிக்க முடியும்.

  • அந்த நினைவூட்டல் மிகவும் துல்லியமானது. எகிப்தின் பலம் அதன் குதிரைகளும் இரதங்களுமே, தேவன் அவற்றை கடலில் மூழ்கடித்தார். கானானில் இஸ்ரவேலர்கள் எதைக் கண்டு அஞ்சினார்களோ, அதே போன்ற ஆயுதங்களைத்தான் தேவன் ஏற்கனவே கடலில் மூழ்கடித்திருந்தார்.

    [யாத்திராகமம் 14:13-14]  அப்பொழுது மோசே ஜனங்களை நோக்கி: பயப்படாதிருங்கள்; நீங்கள் நின்றுகொண்டு இன்றைக்குக் கர்த்தர் உங்களுக்குச் செய்யும் இரட்சிப்பைப் பாருங்கள்; இன்றைக்கு நீங்கள் காண்கிற எகிப்தியரை இனி என்றைக்கும் காணமாட்டீர்கள். கர்த்தர் உங்களுக்காக யுத்தம்பண்ணுவார்; நீங்கள் சும்மாயிருப்பீர்கள் என்றான்.

    [யாத்திராகமம் 15:1]  அப்பொழுது மோசேயும் இஸ்ரவேல் புத்திரரும் கர்த்தரைப் புகழ்ந்துபாடின பாட்டு: கர்த்தரைப் பாடுவேன்; அவர் மகிமையாய் வெற்றி சிறந்தார்; குதிரையையும் குதிரைவீரனையும் கடலிலே தள்ளினார்.

  • எதிரியின் எண்ணிக்கையிலும், சூழ்நிலையின் கடினத்தன்மையிலும் அல்லது நமது சொந்த பலவீனத்திலும் நாம் கவனம் செலுத்தும்போது பயம் அதிகரிக்கிறது.

  • தேவனுடைய கடந்த கால வெற்றிகளை நாம் நினைவுகூரும்போது விசுவாசம் வளர்கிறது.

  • கோலியாத்தை எதிர்த்துப் போரிடுவதற்கு முன்பு தாவீதும் சரியாக இதைத்தான் செய்தார்: [1 சாமுவேல் 17:37]  பின்னும் தாவீது: என்னைச் சிங்கத்தின் கைக்கும் கரடியின் கைக்கும் தப்புவித்த கர்த்தர் இந்தப் பெலிஸ்தனுடைய கைக்கும் தப்புவிப்பார் என்றான்; அப்பொழுது சவுல் தாவீதைப் பார்த்து: போ, கர்த்தர் உன்னுடனேகூட இருப்பாராக என்றான்.

 

உங்களை விடப் பெரிய ஒரு இராணுவம்

[உபாகமம் 20:1]  "... குதிரைகளையும், இரதங்களையும், உன்னிலும் பெரிய கூட்டமாகிய ஜனங்களையும் கண்டால், அவர்களுக்குப் பயப்படாயாக ...".

  • இஸ்ரவேலர்களிடம், உங்களை விடப் பெரிய ஒரு இராணுவத்தை நீங்கள் காண்பீர்கள் என்று கூறப்பட்டது. தோத்தானில் எலிசாவின் வேலைக்காரனும் அதே போன்றதைக் கண்டான்; அவனுடைய கண்கள் திறக்கப்படும் வரை மலைகள் அக்கினி குதிரைகளாலும் இரதங்களாலும் நிறைந்திருப்பதை அவன் காணவில்லை.

    [2 இராஜாக்கள் 6:16-17]  அதற்கு அவன்: பயப்படாதே; அவர்களோடிருக்கிறவர்களைப் பார்க்கிலும் நம்மோடிருக்கிறவர்கள் அதிகம் என்றான். அப்பொழுது எலிசா விண்ணப்பம்பண்ணி: கர்த்தாவே, இவன் பார்க்கும்படி இவன் கண்களைத் திறந்தருளும் என்றான்; உடனே கர்த்தர் அந்த வேலைக்காரன் கண்களைத் திறந்தார்; இதோ, எலிசாவைச்சுற்றிலும் அக்கினிமயமான குதிரைகளாலும் இரதங்களாலும் அந்த மலை நிறைந்திருக்கிறதை அவன் கண்டான்.

  • நம் அனைவருக்கும் நம்மை விடப் பெரிய சூழ்நிலைகள் உள்ளன:

    • நாம் திருப்பிச் செலுத்த வேண்டிய பணம் நம்மிடம் உள்ள தொகையை விட அதிகமாக இருக்கலாம்.

    • பல சிகிச்சைகளுக்குப் பிறகும் நோய் குணமாகாமல் இருக்கலாம்.

    • தொடர்ந்து முயற்சி செய்தும் வேலைக்கான கதவு திறக்கப்படாமல் இருக்கலாம்.

  • இவைகளில் ஒவ்வொன்றும் நம் வாழ்க்கையில் உள்ள பெரிய, சாத்தியமற்ற கோலியாத்துகளாகும்.

  • “எதிரி நம்மை விடப் பெரியவன்”என்ற உண்மையை நாம் ஏற்றுக்கொள்ள வேண்டும்: ஆனால் நம் தேவனை விடப் பெரியவன் அல்ல.மேலும் நாம் விசுவாசத்துடன் இவ்வாறு கூறுகிறோம்: [ரோமர் 8:31]  இவைகளைக்குறித்து நாம் என்ன சொல்லுவோம்? தேவன் நம்முடைய பட்சத்திலிருந்தால் நமக்கு விரோதமாயிருப்பவன் யார்?

 

குதிரைகளும் இரதங்களும் அல்ல, தேவனுடைய சர்வாயுதவர்க்கம்

[உபாகமம் 20:1]  "நீ உன் சத்துருக்களுக்கு எதிராக யுத்தஞ்செய்யப் புறப்பட்டுப்போகையில், குதிரைகளையும், இரதங்களையும், உன்னிலும் பெரிய கூட்டமாகிய ஜனங்களையும் கண்டால் ...".

  • உலகம் மனிதர்களையும், அவர்களின் பணத்தையும், வளங்களையும் நம்பியிருக்கிறது. ஆனால் தேவனுடைய பிள்ளைகளாகிய நாம் அவற்றைச் சார்ந்திருக்கக் கூடாது.

  • நமது ஆயுதம் குதிரைகளும் இரதங்களும் அல்ல, மாறாக தேவனுடைய சர்வாயுதவர்க்கமே ஆகும்.

    [எபேசியர் 6:10-18]  கடைசியாக, என் சகோதரரே, கர்த்தரிலும் அவருடைய சத்துவத்தின் வல்லமையிலும் பலப்படுங்கள். நீங்கள் பிசாசின் தந்திரங்களோடு எதிர்த்து நிற்கத் திராணியுள்ளவர்களாகும்படி, தேவனுடைய சர்வாயுதவர்க்கத்தையும் தரித்துக்கொள்ளுங்கள். ஏனெனில், மாம்சத்தோடும் இரத்தத்தோடுமல்ல, துரைத்தனங்களோடும், அதிகாரங்களோடும், இப்பிரபஞ்சத்தின் அந்தகார லோகாதிபதிகளோடும், வானமண்டலங்களிலுள்ள பொல்லாத ஆவிகளின் சேனைகளோடும் நமக்குப் போராட்டம் உண்டு. ஆகையால், தீங்குநாளிலே அவைகளை நீங்கள் எதிர்க்கவும், சகலத்தையும் செய்துமுடித்தவர்களாய் நிற்கவும் திராணியுள்ளவர்களாகும்படிக்கு, தேவனுடைய சர்வாயுதவர்க்கத்தையும் எடுத்துக்கொள்ளுங்கள். சத்தியம் என்னும் கச்சையை உங்கள் அரையில் கட்டினவர்களாயும், நீதியென்னும் மார்க்கவசத்தைத் தரித்தவர்களாயும்; சமாதானத்தின் சுவிசேஷத்திற்குரிய ஆயத்தம் என்னும் பாதரட்சையைக் கால்களிலே தொடுத்தவர்களாயும்; பொல்லாங்கன் எய்யும் அக்கினியாஸ்திரங்களையெல்லாம் அவித்துப்போடத்தக்கதாய், எல்லாவற்றிற்கும் மேலாக விசுவாசமென்னும் கேடகத்தைப் பிடித்துக்கொண்டவர்களாயும் நில்லுங்கள். இரட்சணியமென்னும் தலைச்சீராவையும். தேவவசனமாகிய ஆவியின் பட்டயத்தையும் எடுத்துக்கொள்ளுங்கள். எந்தச் சமயத்திலும் சகலவிதமான வேண்டுதலோடும் விண்ணப்பத்தோடும் ஆவியினாலே ஜெபம்பண்ணி, அதன்பொருட்டு மிகுந்த மனவுறுதியோடும் சகல பரிசுத்தவான்களுக்காகவும் பண்ணும் வேண்டுதலோடும் விழித்துக்கொண்டிருங்கள்.

  • எதிர்த்துப் போராடுவதற்கு இந்த சர்வாயுதவர்க்கத்தை உங்களுக்குத் தரிப்பிக்கும்படி தேவனிடம் கேளுங்கள். நாம் தேவனை நம்புகிறோம், அவருடைய சர்வாயுதவர்க்கத்தைக் கொண்டே போராடுகிறோம்.

    • சத்தியமென்னும் கச்சை: எதிரி உங்கள் சூழ்நிலையைப் பற்றி உங்களுக்குப் பொய்களைச் சொல்லும்போது, தேவனுடைய சத்தியத்தைப் பிடித்துக்கொள்ளுங்கள்.

    • நீதியென்னும் மார்க்கவசம்: நம்முடைய நீதி கிறிஸ்துவிலிருந்து வருகிறது, எனவே குற்றவுணர்வும் குற்றச்சாட்டுக்களும் இருதயத்தைத் துளைக்க முடியாது.

    • சமாதானத்தின் சுவிசேஷத்திற்குரிய ஆயத்தம் என்னும் பாதரட்சைகள்: ஒவ்வொரு போரிலும் அவருடைய சமாதானத்தைத் தாங்கி, உறுதியாகவும் தயாராகவும் நில்லுங்கள்.

    • விசுவாசமென்னும் கேடகம்: விசுவாசமானது சந்தேகம், பயம் மற்றும் விரக்தியின் அக்கினியஸ்திரங்களை அவித்துப்போடுகிறது.

    • இரட்சணியமென்னும் தலைச்சீரா: நீங்கள் அவருக்குச் சொந்தமானவர்கள் என்ற நிச்சயத்துடன் உங்கள் மனதைக் காத்துக்கொள்ளுங்கள்.

    • தேவவசனமாகிய ஆவியின் பட்டயம்: நம்முடைய ஒரே தாக்குதல் ஆயுதம். இயேசு செய்தது போல "எழுதியிருக்கிறதே" என்று எதிரிக்குப் பதிலளியுங்கள்.

    • ஜெபம்: இது ஒவ்வொரு பகுதியையும் அதற்குரிய இடத்தில் தாங்கிப் பிடிக்கிறது, எனவே விழிப்புடன் இருங்கள், தொடர்ந்து ஜெபியுங்கள்.

  • நாம் உலகத்தாரைப் போலப் போரிடுவதில்லை. இந்தப் போருக்குப் பின்னாலிருக்கும் எதிரியை முறியடிக்க நாம் கண்ணுக்குத் தெரியாத உலகத்தில் போராடுகிறோம்.

    [2 கொரிந்தியர் 10:3-5]  நாங்கள் மாம்சத்தில் நடக்கிறவர்களாயிருந்தும், மாம்சத்தின்படி போர்செய்கிறவர்களல்ல. எங்களுடைய போராயுதங்கள் மாம்சத்துக்கேற்றவைகளாயிராமல், அரண்களை நிர்மூலமாக்குகிறதற்கு தேவபலமுள்ளவைகளாயிருக்கிறது. அவைகளால் நாங்கள் தர்க்கங்களையும், தேவனை அறிகிற அறிவுக்கு விரோதமாய் எழும்புகிற எல்லா மேட்டிமையையும் நிர்மூலமாக்கி, எந்த எண்ணத்தையும் கிறிஸ்துவுக்குக் கீழ்ப்படியச் சிறைப்படுத்துகிறவர்களாயிருக்கிறோம்.

  • எலிசாவைப் போலவே [2 இராஜாக்கள் 6:16-17], நம்முடைய போராட்டங்களுக்குப் பின்னாலிருக்கும் எதிரிகளை — அதாவது நம்முடைய வேலை, நோய், பண நெருக்கடிகள் அல்லது ஆசீர்வாதத்தைப் பறிக்கும் சாபம் போன்றவற்றை எதிர்த்துப் போரிட, கண்ணுக்குத் தெரியாத அக்கினிமயமான குதிரைகளையும் இரதங்களையும் தேவன் அனுப்புவார்.

  • தாவீதைப் போலவே, நாமும் விசுவாசத்துடன் இவ்வாறு கூறுகிறோம்: [சங்கீதம் 20:7]  சிலர் இரதங்களைக் குறித்தும், சிலர் குதிரைகளைக் குறித்தும் மேன்மை பாராட்டுகிறார்கள்; நாங்களோ எங்கள் தேவனாகிய கர்த்தருடைய நாமத்தைக் குறித்தே மேன்மை பாராட்டுவோம்.

  • மேலும் அவர்களுக்கு ஐயோ என்ற எச்சரிக்கையும் உள்ளது, நாம் உலகத்தையோ, மனிதர்களையோ அல்லது தேவனுக்கு வெளியேயுள்ள எதையாவது நம்பும்போது, அது தேவனுடைய சாபத்திற்கு உட்படுகிறது.

[ஏசாயா 31:1]  சகாயமடையும்படி இஸ்ரவேலுடைய பரிசுத்தரை நோக்காமலும், கர்த்தரைத் தேடாமலும், எகிப்துக்குப்போய், குதிரைகள்மேல் நம்பிக்கைவைத்து, இரதங்கள் அநேகமாயிருப்பதினால் அவைகளை நாடி, குதிரைவீரர் மகா பெலசாலிகளாயிருப்பதினால் அவர்களை நம்பிக்கொண்டிருக்கிறவர்களுக்கு ஐயோ!

 

தேவனே சேனையின் அதிபதி : ஆசாரியன் முதலாவது பேசுகிறார்

[உபாகமம் 20:2]  நீங்கள் யுத்தஞ்செய்யத் தொடங்கும்போது, ஆசாரியன் சேர்ந்து வந்து, ஜனங்களிடத்தில் பேசி:

  • போருக்குச் செல்வதற்கு முன்பு முதலில் பேசியவர் படைத்தளபதி அல்ல என்பதை கவனியுங்கள். அது ஒரு ஆசாரியன். ஏன்? ஏனெனில் இஸ்ரவேலின் போர்கள் இராணுவப் போர்களாக மாறுவதற்கு முன்பாகவே ஆவிக்குரிய போர்களாக இருந்தன.

  • தேவன் உடனிருக்கிறார் என்பதையும், அவர் அவர்களுடன் ஒரு உடன்படிக்கை செய்திருக்கிறார் என்பதையும், வெற்றி தேவனிலிருந்தே வருகிறது என்பதையும் ஆசாரியன் அவர்களுக்கு நினைவூட்டினார்.

  • ஆசாரியன் ஆயுதங்களை ஏந்திச் செல்லவில்லை. அவர் தேவனுடைய வார்த்தையைச் சுமந்து சென்றார்.

  • யோசுவாவும் யோர்தானில் அதே ஒழுங்கைப் பின்பற்றினார்: உடன்படிக்கைப் பெட்டியைச் சுமந்த ஆசாரியர்கள் ஜனங்களுக்கு முன்பாகச் சென்றார்கள்.

  • எரிகோவுக்கு முன்பாக, யோசுவா இஸ்ரவேல் ராணுவத்தின் உண்மையான தளபதியைச் சந்தித்தார். அவருக்கு வழங்கப்பட்ட முதல் கட்டளை, போருக்கான திட்டமல்ல, மாறாக ஆராதனை செய்வதே ஆகும்.

    [யோசுவா 5:13-15]  பின்னும் யோசுவா எரிகோவின் வெளியிலிருந்து தன் கண்களை ஏறெடுத்துப் பார்க்கும்போது, இதோ, ஒருவர் அவனுக்கு எதிரே நின்றார்; உருவின பட்டயம் அவர் கையில் இருந்தது; யோசுவா அவரிடத்தில் போய்: நீர் எங்களைச் சேர்ந்தவரோ, எங்கள் சத்துருக்களைச் சேர்ந்தவரோ என்று கேட்டான். அதற்கு அவர்: அல்ல, நான் கர்த்தருடைய சேனையின் அதிபதியாய் இப்பொழுது வந்தேன் என்றார்; அப்பொழுது யோசுவா தரையிலே முகங்குப்புற விழுந்து பணிந்துகொண்டு, அவரை நோக்கி: என் ஆண்டவர் தமது அடியேனுக்குச் சொல்லுகிறது என்னவென்று கேட்டான். அப்பொழுது கர்த்தருடைய சேனையின் அதிபதி யோசுவாவை நோக்கி: உன் கால்களிலிருக்கிற பாதரட்சைகளைக் கழற்றிப்போடு, நீ நிற்கிற இடம் பரிசுத்தமானது என்றார்; யோசுவா அப்படியே செய்தான்.

  • யோசபாத் ராஜா தனது இராணுவத்திற்கு முன்பாகப் பாடகர்களை அனுப்பினார், துதியின் மூலமாக எதிரி முறியடிக்கப்பட்டான்.

    [2 நாளாகமம் 20:15, 17]  சகல யூதா கோத்திரத்தாரே, எருசலேமின் குடிகளே, ராஜாவாகிய யோசபாத்தே, கேளுங்கள்; நீங்கள் அந்த ஏராளமான கூட்டத்திற்குப் பயப்படாமலும் கலங்காமலும் இருங்கள் என்று கர்த்தர் உங்களுக்குச் சொல்லுகிறார்; இந்த யுத்தம் உங்களுடையதல்ல, தேவனுடையது.  இந்த யுத்தத்தைப் பண்ணுகிறவர்கள் நீங்கள் அல்ல; யூதா மனுஷரே, எருசலேம் ஜனங்களே, நீங்கள் தரித்து நின்று கர்த்தர் உங்களுக்குச் செய்யும் இரட்சிப்பைப் பாருங்கள்; பயப்படாமலும் கலங்காமலும் இருங்கள்; நாளைக்கு அவர்களுக்கு எதிராகப் புறப்படுங்கள்; கர்த்தர் உங்களோடே இருக்கிறார் என்றான்.

  • இயேசுவே இன்று நம்முடைய மகா பிரதான ஆசாரியர். அவர் நமக்காகப் பேசுகிறார், நமக்காக மத்தியஸ்தம் பண்ணுகிறார்; மேலும் பரிசுத்த ஆவியானவர் தேவனுடைய வார்த்தையின் மூலம் நம்மை உற்சாகப்படுத்துகிறார்.

    [எபிரெயர் 4:14-16]  வானங்களின் வழியாய்ப் பரலோகத்திற்குப்போன தேவகுமாரனாகிய இயேசு என்னும் மகா பிரதான ஆசாரியர் நமக்கு இருக்கிறபடியினால், நாம் பண்ணின அறிக்கையை உறுதியாய்ப் பற்றிக்கொண்டிருக்கக்கடவோம். நம்முடைய பலவீனங்களைக்குறித்துப் பரிதபிக்கக்கூடாத பிரதான ஆசாரியர் நமக்கிராமல், எல்லாவிதத்திலும் நம்மைப்போல் சோதிக்கப்பட்டும், பாவமில்லாதவராயிருக்கிற பிரதான ஆசாரியரே நமக்கிருக்கிறார். ஆதலால், நாம் இரக்கத்தைப் பெறவும், ஏற்ற சமயத்தில் சகாயஞ்செய்யுங்கிருபையை அடையவும், தைரியமாய்க் கிருபாசனத்தண்டையிலே சேரக்கடவோம்.

  • எனவே ஆவியிலும் உண்மையிலும் ஜெபியுங்கள், போர்க்களத்தில் உங்களுக்கு முன்பாகச் செல்லும் பிரதான ஆசாரியராக தேவன் இருக்கும்படி அவரிடம் கேளுங்கள்.

    [ரோமர் 8:26-27]  அந்தப்படியே ஆவியானவரும் நமது பலவீனங்களில் நமக்கு உதவிசெய்கிறார். நாம் ஏற்றபடி வேண்டிக்கொள்ளவேண்டியதின்னதென்று அறியாமலிருக்கிறபடியால், ஆவியானவர்தாமே வாக்குக்கடங்காத பெருமூச்சுகளோடு நமக்காக வேண்டுதல்செய்கிறார். ஆவியானவர் தேவனுடைய சித்தத்தின்படியே பரிசுத்தவான்களுக்காக வேண்டுதல்செய்கிறபடியால், இருதயங்களை ஆராய்ந்து பார்க்கிறவர் ஆவியின் சிந்தை இன்னதென்று அறிவார்.

  • உங்கள் ஆவிக்குரிய நிலை எதுவாக இருந்தாலும், தேவனுடைய வசனத்தைப் படித்து, ஜெபியுங்கள். இயேசு உங்களை இரட்சிக்கவும், உங்களுக்காக யுத்தம் பண்ணவும் காத்துக்கொண்டிருக்கிறார். அவருடைய நாமம் "இரட்சகர்" என்பதாகும்; எனவே, நாம் எத்தகைய மோசமான நிலையில் இருந்தாலும் அவர் நம்மை இரட்சிக்கிறார். அவரால் நம்மை இரட்சிக்க முடியும் என்ற விசுவாசம் மட்டுமே நமது சூழ்நிலையைக் காப்பாற்றும்.

 

எதிரியின் ஆயுதம் பயம்; தேவனுடைய வார்த்தை “பயப்படாதே”

[உபாகமம் 20:3]  இஸ்ரவேலரே, கேளுங்கள்; இன்று உங்கள் சத்துருக்களுடன் யுத்தஞ்செய்யப் போகிறீர்கள்; உங்கள் இருதயம் துவளவேண்டாம்; நீங்கள் அவர்களைப் பார்த்துப் பயப்படவும் கலங்கவும் தத்தளிக்கவும் வேண்டாம்.

  • ஆசாரியனின் வார்த்தைகளில் உள்ள முன்னேற்றத்தைக் கவனியுங்கள். ஒவ்வொன்றும் உள்ளிருந்து வெளிப்புறமாக ஒரு படி மேலே செல்கிறது:

    • உங்கள் இருதயம் துவள வேண்டாம்: இருதயம் பலவீனமடைந்து உருகத் தொடங்குகிறது.

    • பயப்பட வேண்டாம்: பயம் நம்மைப் பற்றிக்கொள்கிறது.

    • கலங்க வேண்டாம்: பீதியில் பாதங்கள் விரைந்து ஓடுகின்றன.

    • தத்தளிக்க வேண்டாம்: பயத்தில் உடல் முழுவதும் நடுங்குகிறது.

  • பயம் பொதுவாகப் படிப்படியாக வளர்கிறது. ஒரு சிறிய பயம் கவலையாக மாறுகிறது. கவலை பதற்றமாக மாறுகிறது. பதற்றம் தோல்வியாக மாறுகிறது.

  • பயம் இதயத்தைக் கட்டுப்படுத்துவதற்கு முன்பே தேவன் அதைத் தடுத்து நிறுத்துகிறார். இதன் அர்த்தம் அவர்களுக்குப் பயமே ஏற்படவில்லை என்பதல்ல; மாறாக, பயம் தங்களை ஆளுகை செய்ய அவர்கள் அனுமதிக்கக் கூடாது என்பதே ஆகும்.

  • கிறிஸ்து பயத்தின் வேரையே களைந்துவிட்டார்:

    [எபிரெயர் 2:14-15]  ஆதலால், பிள்ளைகள் மாம்சத்தையும் இரத்தத்தையும் உடையவர்களாயிருக்க, அவரும் அவர்களைப்போல மாம்சத்தையும் இரத்தத்தையும் உடையவரானார்; மரணத்துக்கு அதிகாரியாகிய பிசாசானவனைத் தமது மரணத்தினாலே அழிக்கும்படிக்கும், ஜீவகாலமெல்லாம் மரணபயத்தினாலே அடிமைத்தனத்திற்குள்ளானவர்கள் யாவரையும் விடுதலைபண்ணும்படிக்கும் அப்படியானார்.

    [2 தீமோத்தேயு 1:7]  தேவன் நமக்குப் பயமுள்ள ஆவியைக் கொடாமல், பலமும் அன்பும் தெளிந்த புத்தியுமுள்ள ஆவியையே கொடுத்திருக்கிறார்.

    [1 யோவான் 4:18]  அன்பிலே பயமில்லை; பூரண அன்பு பயத்தைப் புறம்பே தள்ளும்; பயமானது வேதனையுள்ளது, பயப்படுகிறவன் அன்பில் பூரணப்பட்டவன் அல்ல.

    [பிலிப்பியர் 4:6-7]  நீங்கள் ஒன்றுக்குங்கவலைப்படாமல், எல்லாவற்றையுங்குறித்து உங்கள் விண்ணப்பங்களை ஸ்தோத்திரத்தோடே கூடிய ஜெபத்தினாலும் வேண்டுதலினாலும் தேவனுக்குத் தெரியப்படுத்துங்கள். அப்பொழுது, எல்லாப் புத்திக்கும் மேலான தேவசமாதானம் உங்கள் இருதயங்களையும் உங்கள் சிந்தைகளையும் கிறிஸ்து இயேசுவுக்குள்ளாகக் காத்துக்கொள்ளும்.

  • பயம் எதிரியிடமிருந்து வருகிறது. பயத்தை எதிர்த்துப் போராடுவதற்கான பலத்தைத் தேவன் தருகிறார். தாவீது கோலியாத்தின் உருவத்தைப் பார்க்கவில்லை, சிம்சோனும் சிங்கத்தின் உருவத்தைப் பார்க்கவில்லை. இயேசுவின் மீதான விசுவாசத்தால் மட்டுமே பயத்தை வெல்ல முடியும்; ஏனென்றால் தேவன் நம் பட்சத்திலிருந்தால் நமக்கு விரோதமாயிருப்பவன் யார்? [ரோமர் 8:31].

 

ஜெயம் நம் கர்த்தரிடத்திலிருந்து வருகிறது: நான்கு சத்தியங்கள்

[உபாகமம் 20:4]  உங்களுக்காக உங்கள் சத்துருக்களோடே யுத்தம்பண்ணவும் உங்களை இரட்சிக்கவும் உங்களோடேகூடப் போகிறவர் உங்கள் தேவனாகிய கர்த்தர் என்று சொல்லவேண்டும்.

1. தேவன் உங்களோடேகூடப் போகிறவர்

  • இஸ்ரவேலர்கள் ஒருபோதும் தனியாகப் போரிடவில்லை. அவருடைய பிரசன்னமே அவர்களின் மிகப்பெரிய ஆயுதமாக இருந்தது.

  • அதே வாக்குத்தத்தம் நமக்கும் உண்டு. நாம் அவருக்குக் கீழ்ப்படிந்து அவரோடு நடந்தால், உலகத்தின் முடிவுபரியந்தம் அவர் நிச்சயமாக நம்மோடு இருக்கிறார். [மத்தேயு 28:20]  நான் உங்களுக்குக் கட்டளையிட்ட யாவையும் அவர்கள் கைக்கொள்ளும்படி அவர்களுக்கு உபதேசம்பண்ணுங்கள். இதோ, உலகத்தின் முடிவுபரியந்தம் சகல நாட்களிலும் நான் உங்களுடனேகூட இருக்கிறேன் என்றார்.

 

2. தேவன் உங்களுக்காக யுத்தம் பண்ணுகிறார்  

  • அவர்கள் தொடர்ந்து போராட வேண்டியிருந்தது, ஆனாலும் தேவனே போரில் வெற்றி பெற்றார். தேவனுடைய இறையாண்மைக்கும் மனிதனின் பொறுப்புக்கும் இடையே இங்கு ஒரு முக்கியமான சமநிலை உள்ளது. இஸ்ரவேலர்கள் அணிவகுத்துச் சென்றனர்; இஸ்ரவேலர்கள் வாளை வீசினர். ஆனால், தேவனே  ஜெயத்தைத் தந்தார்.

  • அதே கொள்கை இன்றைக்கும் பொருந்துகிறது. பிசாசை எதிர்த்து நிற்கவும், இடைவிடாமல் ஜெபிக்கவும், தேவனுடைய சர்வாயுதவர்க்கத்தைத் தரித்துக்கொள்ளவும், அவருடைய வார்த்தைக்குக் கீழ்ப்படிந்து உண்மையாய் நிலைத்திருக்கவும் தேவன் நம்மை அழைக்கிறார். தேவனே பெலத்தையும், ஞானத்தையும், இறுதி வெற்றியையும் வழங்குகிறார்.

  • [யாக்கோபு 4:7]  ஆகையால், தேவனுக்குக் கீழ்ப்படிந்திருங்கள்; பிசாசுக்கு எதிர்த்து நில்லுங்கள், அப்பொழுது அவன் உங்களைவிட்டு ஓடிப்போவான்.

  • [1 சாமுவேல் 17:47]  கர்த்தர் பட்டயத்தினாலும் ஈட்டியினாலும் இரட்சிக்கிறவர் அல்ல என்று இந்த ஜனக்கூட்டமெல்லாம் அறிந்து கொள்ளும்; யுத்தம் கர்த்தருடையது; அவர் உங்களை எங்கள் கையில் ஒப்புக்கொடுப்பார் என்றான்.

 

3. உங்கள் எதிரிகள் தேவனுடைய எதிரிகள்

  • இஸ்ரவேலர்கள் தேவனுடைய உடன்படிக்கையைக் கைக்கொண்டபோது, அவர்களுக்கு எதிராக நடந்த தாக்குதல்களை தேவன் தமக்கு எதிராக நடந்த தாக்குதல்களாகவே கருதினார். விசுவாசிக்கு எதிராகப் போரிடுகிற எவரும் ஆண்டவருக்கு எதிராகவே போரிடுகிறார்கள்.

  • [சகரியா 2:8]  பிற்பாடு மகிமையுண்டாகும் என்று சேனைகளின் கர்த்தர் சொல்லுகிறார்; உங்களைக் கொள்ளையிட்ட ஜாதிகளிடத்துக்கு என்னை அனுப்பினார்; உங்களைத் தொடுகிறவன் அவருடைய கண்மணியைத் தொடுகிறான்.

  • தர்சு பட்டணத்தைச் சேர்ந்த சவுலின் வாழ்க்கையில் நாம் இதைக் காண்கிறோம். சவுல் அநேக விசுவாசிகளைத் துன்புறுத்தினார்; இருப்பினும் இயேசு அவரைச் சந்தித்தபோது, “சவுலே, சவுலே, நீ என்னை ஏன் துன்பப்படுத்துகிறாய்?” என்று கேட்டார்.

  • [அப்போஸ்தலர் 26:14-15]  நாங்களெல்லாரும் தரையிலே விழுந்தபோது: சவுலே, சவுலே, நீ ஏன் என்னைத் துன்பப்படுத்துகிறாய்? முள்ளில் உதைக்கிறது உனக்குக் கடினமாமென்று எபிரெயு பாஷையிலே என்னுடனே சொல்லுகிற ஒரு சத்தத்தைக் கேட்டேன். அப்பொழுது நான்: ஆண்டவரே, நீர் யார் என்றேன். அதற்கு அவர்: நீ துன்பப்படுத்துகிற இயேசு நானே.

  • நமது சத்துருக்கள் மனிதர்கள் அல்ல. சாத்தான், பாவம், சோதனை, கள்ள உபதேசம், பயம், சோர்வு மற்றும் ஆவிக்குரிய எதிர்ப்புகள் ஆகிய இவைகளே நம்முடைய சத்துருக்கள் [எபேசியர் 6:12].

  • உங்கள் போராட்டத்தை உங்களுடைய யுத்தமாக மட்டும் பார்க்காதீர்கள். அது தேவனுக்கு விரோதமான எதிரியின் போர். நாம் தேவனுடைய பிள்ளைகளாய் இருப்பதால், எதிரி நம்மைத் தாக்குகிறான். நாம் அதை இவ்வாறு பார்த்து ஜெபிக்கும்போது, தேவன் நமக்காக எதிர்த்துப் போரிடுவார்.

 

4. ஜெயம் தேவனிடமிருந்து வருகிறது

  • வெற்றி என்பது வெறும் மனித முயற்சியின் விளைவு அல்ல; அது தேவனுடைய ஈவு.

  • ஒவ்வொரு வெற்றியும் அவரால் உங்களுக்கெனப் பிரத்யேகமாக வடிவமைக்கப்பட்டுக் கொடுக்கப்படுகிறது; மேலும் அது அவருடைய ஜனங்களோடும் பகிர்ந்துகொள்ளப்படுகிறது: “சரிபங்காகப் பங்கிடுவார்களாக” [1 சாமுவேல் 30:24].

  • இயேசு இன்றும் தம்முடைய ஜனங்களுக்காக யுத்தம் பண்ணுகிறார்:

    • ஒருவராலும் திறக்க முடியாத கதவுகளை அவர் திறக்கிறார்.

    • நம்மால் தோற்கடிக்க முடியாத எதிரிகளை அவர் தோற்கடிக்கிறார்.

    • அவர் இருதயங்களை மாற்றி நம்மைப் பாதுகாக்கிறார்.

    • கலக்கத்திற்குப் பதிலாக இயற்கைக்கு அப்பாற்பட்ட சமாதானத்தையும் ஞானத்தையும் அவர் தருகிறார்.

    [கொலோசெயர் 2:15]  துரைத்தனங்களையும் அதிகாரங்களையும் உரிந்துகொண்டு, வெளியரங்கமான கோலமாக்கி, அவைகளின்மேல் சிலுவையிலே வெற்றிசிறந்தார்.

    [1 கொரிந்தியர் 15:57]  நம்முடைய கர்த்தராகிய இயேசுகிறிஸ்துவினாலே நமக்கு ஜெயங்கொடுக்கிற தேவனுக்கு ஸ்தோத்திரம்.

    [ரோமர் 8:37]  இவையெல்லாவற்றிலேயும் நாம் நம்மில் அன்புகூருகிறவராலே முற்றும் ஜெயங்கொள்ளுகிறவர்களாயிருக்கிறோமே.

  • நாம் ஜெயத்திற்காகப் போராடவில்லை, ஜெயத்திலிருந்தே போராடுகிறோம்.

 

 

யுத்தத்தில் செய்யக்கூடாதவை (Do Nots)

1. இருமனதோடு யுத்தம் செய்யாதீர்கள் [உபாகமம் 20:5-7]

  • தன் புதிய வீட்டிலோ, திராட்சைத் தோட்டத்திலோ அல்லது தன் மணவாட்டியிடத்திலோ தன் இருதயத்தை வைத்திருக்கும் ஒருவன், பிளவுபட்ட  இருதயமுள்ள போர்வீரன் ஆவான். அவன் கவனச்சிதறலோடு போரிடுவதை விட, அவனை வீட்டிற்குத் திருப்பி அனுப்புவதையே தேவன் விரும்புகிறார்.

  • [லூக்கா 9:62]  அதற்கு இயேசு: கலப்பையின்மேல் தன் கையை வைத்துப் பின்னிட்டுப்பார்க்கிற எவனும் தேவனுடைய ராஜ்யத்துக்குத் தகுதியுள்ளவன் அல்ல என்றார்.

 

2. பயத்தைப் பரவ விடாதீர்கள் [உபாகமம் 20:8]

  • அவன் தன் சகோதரரின் இருதயத்தைத் தன் இருதயத்தைப்போலக் கரைந்துபோகப்பண்ணாதபடிக்கு, தன் வீட்டுக்குத் திரும்பிப் போகக்கடவன்.” இது 3 ஆம் வசனத்தில் உள்ள அதே வார்த்தையாகும்; ஒருவருடைய இருதயம் தளர்ந்துபோவது ஒருவரிடமிருந்து மற்றவருக்குப் பரவுகிறது. பயந்த ஒரு மனிதன் மற்றவர்களையும் தளரச் செய்கிறான்.

  • ஆனால், விசுவாசமும் மற்றவர்களுக்குப் பரவக்கூடியது. யோசுவாவும் காலேபும் முழு கூட்டத்திற்கும் எதிராக உறுதியாக நின்றனர்:

  • [எண்ணாகமம் 14:9]  கர்த்தருக்கு விரோதமாகமாத்திரம் கலகம்பண்ணாதிருங்கள்; அந்த தேசத்தின் ஜனங்களுக்கு நீங்கள் பயப்படவேண்டியதில்லை; அவர்கள் நமக்கு இரையாவார்கள்; அவர்களைக் காத்த நிழல் அவர்களை விட்டு விலகிப்போயிற்று; கர்த்தர் நம்மோடே இருக்கிறார்; அவர்களுக்குப் பயப்படவேண்டியதில்லை என்றார்கள்.

  • மீதியானியருடனான போருக்கு முன்பாக கிதியோன் இதே சட்டத்தைப் பயன்படுத்தினார். இஸ்ரவேலர்கள் தங்கள் சொந்தப் பலமே தங்களை இரட்சித்தது என்று பெருமைபாராட்டாதபடிக்கு தேவன் சேனையைக் குறைத்தார்.

  • [நியாயாதிபதிகள் 7:3]  ஆகையால் பயமும் திகிலும் உள்ளவன் எவனோ அவன் திரும்பி, கீலேயாத் மலைகளிலிருந்து விரைவாய் ஓடிப்போகக்கடவன் என்று, நீ ஜனங்களின் செவிகள் கேட்கப் பிரசித்தப்படுத்து என்றார்; அப்பொழுது ஜனத்தில் இருபத்தீராயிரம்பேர் திரும்பிப் போய்விட்டார்கள்; பதினாயிரம்பேர் மீதியாயிருந்தார்கள்.

 

3. கொள்ளைப்பொருளை உங்களுக்காகவே வைத்துக்கொள்ளாதீர்கள் [உபாகமம் 20:13-15]

  • •   “…உன் தேவனாகிய கர்த்தர் உனக்கு ஒப்புக்கொடுத்த உன் சத்துருக்களின் கொள்ளைப்பொருளை அநுபவிப்பாயாக…” — கொள்ளைப்பொருளும் கூட தேவனுடைய ஈவே. தேவன் விசுவாசிகளைத் தாலந்துகள், பொருளாதாரம், செல்வாக்கு, கல்வி, தொழில், வாய்ப்புகள் மற்றும் ஆவிக்குரிய வரங்களால் ஆசீர்வதிக்கிறார். இவையே நமது “கொள்ளைப்பொருட்கள்.

  • •   இஸ்ரவேலர்களைப் போல், நாம் இவற்றைத் தோற்கடிக்கப்பட்ட எதிரிகளிடமிருந்து யுத்தத்தின் மூலமாகப் பெற்றுக்கொள்வதில்லை. கிறிஸ்துவின் வெற்றிக்குப் பிறகு, தேவன் தம்முடைய ஜனங்களை உக்கிராணக்காரர்களாக நியமித்து ஆசீர்வாதங்களை அவர்களிடம் ஒப்படைக்கிறார். வெற்றிவீரராகிய அவரே வரங்களைப் பகிர்ந்தளிக்கிறார்:

  • [எபேசியர் 4:8]  ஆதலால், அவர் உன்னதத்திற்கு ஏறி, சிறைப்பட்டவர்களைச் சிறையாக்கி, மனுஷர்களுக்கு வரங்களை அளித்தார் என்று சொல்லியிருக்கிறார்.

  • [1 கொரிந்தியர் 4:7]  அன்றியும் உன்னை விசேஷித்தவனாகும்படி செய்கிறவர் யார்? உனக்கு உண்டாயிருக்கிறவைகளில் நீ பெற்றுக்கொள்ளாதது யாது? நீ பெற்றுக்கொண்டவனானால் பெற்றுக்கொள்ளாதவன்போல் ஏன் மேன்மைபாராட்டுகிறாய்?

  • •   கேள்வி இதுதான்: நாம் தேவனுடைய ஆசீர்வாதங்களை சுயநலமாகப் பயன்படுத்துவோமா, அல்லது அவருடைய ராஜ்யத்திற்காக அவற்றை உக்கிராணத்துவத்தோடு பயன்படுத்துவோமா? கொள்ளைப்பொருள் தேவனுடைய மகிமைக்கானது; ஆகவே, அதை அவருடைய மகிமைக்காகப் பயன்படுத்துங்கள்:

    • தேவன் உங்களைப் பொருளாதார ரீதியாக ஆசீர்வதித்திருந்தால், சபைக்கும் ஏழைகளுக்கும் தாராளமாகக் கொடுங்கள்.

    • தேவன் உங்களுக்கு வெளிப்பாட்டின் ஆவிக்குரிய வரங்களைக் கொடுத்திருந்தால், அவற்றை மக்களுக்காக ஜெபிக்கவும் அவர்களைப் பக்திவிருத்தி அடையச் செய்யவும் பயன்படுத்துங்கள்; புறணி பேசுவதற்கோ அல்லது மற்றவர்களிடம் சொல்லித் திரிவதற்கோ பயன்படுத்தாதீர்கள்.

 

4. மனிதர்களோடு போராடாதீர்கள் — பாவத்தோடு போராடுங்கள் [உபாகமம் 20:16-18]

  • இன்று தேவன் மனிதர்களை அழிக்கும்படி விசுவாசிகளுக்குக் கட்டளையிடுவதில்லை. பாவத்தை அழிக்கும்படி அவர் நமக்குக் கட்டளையிடுகிறார். கானானியர்கள் பாவ இச்சைகளுக்கும், பழைய பாவ சுபாவத்திற்கும், விக்கிரகங்களுக்கும், கிறிஸ்துவுடன் போட்டியிடும் பழக்கவழக்கங்களுக்கும் ஒரு அடையாளமாக இருக்கிறார்கள்.

  • பவுலும் இதே போன்ற சொற்றொடரைப் பயன்படுத்துகிறார்: பூமிக்குரிய சுபாவத்தை அதாவது மாம்சத்திற்குரிய மனுஷனை அழித்துப் போடுங்கள்.

  • [கலாத்தியர் 5:24]  கிறிஸ்துவினுடையவர்கள் தங்கள் மாம்சத்தையும் அதின் ஆசை இச்சைகளையும் சிலுவையில் அறைந்திருக்கிறார்கள்.

  • [ரோமர் 8:13]  மாம்சத்தின்படி பிழைத்தால் சாவீர்கள்; ஆவியினாலே சரீரத்தின் செய்கைகளை அழித்தால் பிழைப்பீர்கள்.

  • மாம்சம் என்பது நமது சொந்தப் பழைய பாவ சுபாவமாகும். எதிரி அதைச் சோதனையின் மூலம் பயன்படுத்துகிறான்; நாம் அதற்கு இடங்கொடுக்கும்போது, அவனுக்கு வாய்ப்பளிக்கிறோம். ஆவியானவரின் பெலத்தினாலே நாம் மாம்சத்தைச் சிலுவையில் அறையும்போது, அவனுடைய பிடிமானம் இழக்கப்பட்டு, நாம் பிழைக்கிறோம்.

  • [ரோமர் 7:18]  அதெப்படியெனில், என்னிடத்தில், அதாவது, என் மாம்சத்தில், நன்மை வாசமாயிருக்கிறதில்லையென்று நான் அறிந்திருக்கிறேன்; நன்மை செய்யவேண்டுமென்கிற விருப்பம் என்னிடத்திலிருக்கிறது நன்மை செய்வதோ என்னிடத்திலில்லை.

  • [யாக்கோபு 1:14]  அவனவன் தன்தன் சுய இச்சையினாலே இழுக்கப்பட்டு, சிக்குண்டு, சோதிக்கப்படுகிறான்.

  • [எபேசியர் 4:27]  பிசாசுக்கு இடங்கொடாமலும் இருங்கள்.

 

5. பாவத்தை சமாளித்துக்கொண்டிருக்காதீர்கள் — அது ஒரு கண்ணியாக மாறிவிடும்

  • இஸ்ரவேலர்கள் அந்த வேலையை முழுமையாக முடிக்கவில்லை. தேசத்தில் மீதியாக விடப்பட்ட ஜாதிகள் அவர்களுக்குப் பொறிகளாகவும், அவர்களுடைய தேவர்கள் கண்ணிகளாகவும் மாறினார்கள். அழிக்கச் சொல்லி தேவன் கட்டளையிட்டதை சவுல் தப்பவிட்டான்; அதனால் தன் ராஜ்யத்தை இழந்தான். அரைகுறையான கீழ்ப்படிதல் கீழ்ப்படியாமையே ஆகும்.

  • [நியாயாதிபதிகள் 2:2-3]  நீங்கள் இந்த தேசத்தின் குடிகளோடே உடன்படிக்கைபண்ணாமல், அவர்கள் பலிபீடங்களை இடித்துவிடக்கடவீர்கள் என்றும் சொன்னேன்; ஆனாலும் என் சொல்லைக் கேளாதேபோனீர்கள்; ஏன் இப்படிச் செய்தீர்கள்? ஆகையால் நான் அவர்களை உங்கள் முகத்திற்கு முன்பாகத் துரத்துவதில்லை என்றேன்; அவர்கள் உங்களை நெருக்குவார்கள்; அவர்களுடைய தேவர்கள் உங்களுக்குக் கண்ணியாவார்கள் என்றார்.

  • [சங்கீதம் 106:34-36]  கர்த்தர் தங்களுக்குச் சொன்னபடி, அவர்கள் அந்த ஜனங்களை அழிக்கவில்லை. ஜாதிகளுடனே கலந்து, அவர்கள் கிரியைகளைக் கற்று; அவர்களுடைய விக்கிரகங்களைச் சேவித்தார்கள்; அவைகள் அவர்களுக்குக் கண்ணியாயிற்று.

 

நாம் வெற்றியிலிருந்தே போராடுகிறோம்

பணக்காரனுக்கு அவனுடைய போராட்டக் கதை உண்டு. ஏழைக்கு அவனுடைய போராட்டக் கதை உண்டு. இயேசுவைப் பின்பற்றுகிற நமக்கும் நம்முடைய போராட்டங்கள் இருக்கும். ஆனால், நாம் தனியாகப் போராடுவதில்லை; உலகம் போராடுகிற விதமாகவும் நாம் போராடுவதில்லை.

  • தேவன் ஏற்கனவே செய்தவற்றைத் திரும்பிப் பாருங்கள்; இன்றைய யுத்தத்திற்கான விசுவாசம் எழும்பும்.

  • தேவனுடைய சர்வாயுதவர்க்கத்தைத் தரித்துக்கொள்ளுங்கள்; ஜெபமும் தேவனுடைய வார்த்தையும் உங்களுக்கு முன்பாகச் செல்லட்டும்.

  • பயம் உங்கள் இருதயத்தை ஆள விடாதீர்கள்; பாவத்தை அரைகுறையாகக் கையாளாதீர்கள்.

 

மோவாபின் சமவெளிகளில் மோசே இஸ்ரவேலர்களுக்குக் கொடுத்த வார்த்தைகள் இன்றும் நமக்கான தேவனுடைய வார்த்தையாகவே இருக்கின்றன:

[உபாகமம் 20:4]  உங்களுக்காக உங்கள் சத்துருக்களோடே யுத்தம்பண்ணவும் உங்களை இரட்சிக்கவும் உங்களோடேகூடப் போகிறவர் உங்கள் தேவனாகிய கர்த்தர் என்று சொல்லவேண்டும்.

 உலகம் வெற்றிக்காகப் போராடுகிறது. நாம் வெற்றியிலிருந்து போராடுகிறோம்.

Comments

Rated 0 out of 5 stars.
No ratings yet

Add a rating

Subscribe Form

Thanks for submitting!

©2026 by TheWay. Proudly created with Wix.com

bottom of page